କୋହିମା,୨୧।୨: ନାଗାଲାଣ୍ଡ ବିଧାନସଭା ନିର୍ବାଚନ ୨୦୨୩ ଲାଗି ଫେବୃଆରୀ ୨୭ରେ ମତଦାନ ହେବ। ଏହାପୂର୍ବରୁ ସମସ୍ତ ଦଳ ନିର୍ବାଚନ ପ୍ରଚାରରେ ବ୍ୟସ୍ତ ଅଛନ୍ତି। ଏହି କ୍ରମରେ କଂଗ୍ରେସ ରାଷ୍ଟ୍ରୀୟ ସଭାପତି ମଲ୍ଲିକାର୍ଜୁନ ଖାର୍ଗେ ମଧ୍ୟ ପହଞ୍ଚିଛନ୍ତି। ସେଠାରେ ସେ ଭାଜପା ବିରୋଧରେ ଅନେକ ଗମ୍ଭୀର ଅଭିଯୋଗ ଆଣିଛନ୍ତି। ମୁଖ୍ୟମନ୍ତ୍ରୀଙ୍କୁ ବ୍ଲାକମେଲ୍ କରି ଭାଜପା ସରକାର ଗଠନ କରିଥିବା ସେ କହିଛନ୍ତି।
ଚୁମୁକେଡିମାରେ ଦିଫୁପର ଗ୍ରାମରେ ଏକ ନିର୍ବାଚନୀ ସଭାକୁ ଉଦ୍ବୋଧନ ଦେଇ ଖାର୍ଗେ କହିଛନ୍ତି, ଗତ ୨୦ ବର୍ଷ ଧରି ନ୍ୟାଶନାଲିଷ୍ଟ ଡେମୋକ୍ରେଟିକ୍ ପ୍ରୋଗ୍ରେସିଭ ପାର୍ଟି(ଏନ୍ଡିପିପି), ନାଗା ପିପୁଲ୍ସ ଫ୍ରଣ୍ଟ (ଏନ୍ପିଏଫ) ଏବଂ ଭାରତୀୟ ଜନତା ପାର୍ଟି(ଭାଜପା) ରାଜ୍ୟକୁ ଲୁଟ କରିଛନ୍ତି। ଏବେ ନାଗାଲାଣ୍ଡର ଲୋକଙ୍କ ପାଇଁ ନ୍ୟାୟ ଏବଂ ଲୋକଙ୍କ ପାଇଁ କାର୍ଯ୍ୟ କରୁଥିବା ସରକାର ଆସିବାର ସମୟ ଆସିଛି।
ଖାର୍ଗେ ତାଙ୍କ ସମ୍ବୋଧନରେ କହିଛନ୍ତି, ମୁଖ୍ୟମନ୍ତ୍ରୀଙ୍କୁ ବ୍ଲାକମେଲ କରି ଭାଜପା ସରକାର ଗଠନ କରିଛି। କେବଳ ଏଠାରେ ନୁହେଁ, ଛଅରୁ ସାତୋଟି ରାଜ୍ୟରେ ସେମାନେ ବିଧାୟକଙ୍କ ଉପରେ ଚାପ ପକାଇ ସରକାର ଗଠନ କରିଛନ୍ତି। କର୍ନାଟକରେ ଆମର ଏକ ସଂଖ୍ୟାଗରିଷ୍ଠ ସରକାର ଥିଲା। ସେଠାରେ ସେ ବିଧାୟକ କିଣି ସରକାର ଗଠନ କରିଥିଲେ। ମଧ୍ୟପ୍ରଦେଶ, ମଣିପୁର, ଗୋଆ ଏବଂ ଉତ୍ତରାଖଣ୍ଡରେ ମଧ୍ୟ ଭାଜପା ଏଭଳି କରିଛି।
ତେବେ କଂଗ୍ରେସ ହିମାଚଳ ପ୍ରଦେଶ ଏବଂ ଛତିଶଗଡ଼ ଭଳି କ୍ଷମତାକୁ ଆସିଲେ ନାଗାଲାଣ୍ଡରେ ଥିବା ପୁରୁଣା ପେନସନ୍ ଯୋଜନାକୁ ଲାଗୁ କରାଯିବ। ସୁରକ୍ଷା ଏବଂ ଆଇନ ଶୃଙ୍ଖଳା ବ୍ୟବସ୍ଥାକୁ ବୃଦ୍ଧି କରିବା ସହ ମାସକୁ ୩୦୦୦ ଟଙ୍କା ବୃଦ୍ଧାବସ୍ଥା ପେନ୍ସନ, ସହରାଞ୍ଚଳ ସ୍ଥାନୀୟ ମହିଳାମାନଙ୍କ ପାଇଁ ୩୩% ସଂରକ୍ଷଣ, ଚାକିରୀ କାର୍ଡଧାରୀଙ୍କ ପାଇଁ ଏମ୍ଏନ୍ଆର୍ଇଜିଏରେ ୧୦୦% ବେତନ ପ୍ରଦାନ, ଉଚ୍ଚଶିକ୍ଷା ପାଇଁ ୦% ଋଣ ଭଳି ଗ୍ୟାରେଣ୍ଟି ଦେବ ବୋଲି ଖାର୍ଗେ ପ୍ରତିଶ୍ରୁତି ଦେଇଛନ୍ତି।
