ବରଗଡ଼,୨୪।୬(ପ୍ରେମାନନ୍ଦ ଖମାରୀ):ବରଗଡ଼ ଜିଲା ମୁଖ୍ୟ କେନାଲରୁ ବାହାରିଥିବା ରେଶମ ପ୍ରଶାଖା କେନାଲ ବ୍ରିଜ୍ ନିକଟରୁ ରବିବାର ଜବତ ହୋଇଥିବା ମୃତ ମହିଳାଙ୍କ ମୃତ୍ୟୁ ରହସ୍ୟ ଉନ୍ମୋଚନ ହୋଇଛି। ମୃତ ମହିଳା ହେଲେ ବଲାଙ୍ଗୀର ଜିଲା ଦେଓଗାଁ ଥାନା ଅନ୍ତର୍ଗତ ସାହାଜବାହାଲ ଗ୍ରାମର ମମତା ହୋତା(୫୭)। ଅର୍ଥ ଦେଣନେଣ କାରବାରରୁ ଉପୁଜିଥିବା ଶତ୍ରୁତାରୁ ତାଙ୍କୁ ହତ୍ୟା କରାଯାଇଥିବା ପୋଲିସ ତଦନ୍ତରୁ ଜଣାପଡ଼ିଛି। ବରଗଡ଼ ଜିଲା ବରପାଲି ଥାନା ପୋଲିସ ହତ୍ୟା ଅଭିଯୁକ୍ତ ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ଥାନା ଅନ୍ତର୍ଗତ ବେହେରାମାଲ ଗ୍ରାମର ରମାକାନ୍ତ ପୂଜାରୀ(୫୬)ଙ୍କୁ ଗିରଫ କରିଛି। ତାଙ୍କ ପାଖରୁ ହତ୍ୟାକାଣ୍ଡରେ ବ୍ୟବହୃତ ଟାଙ୍ଗିଆ, ବାଇକ୍(ନଂ.ଓଆର୧୭ଡି ୬୧୧୦) ଜବତ ହୋଇଛି। ଏହା ସହିତ ମୃତ ମହିଳାଙ୍କ ଚପଲ, ଅନ୍ୟ ପରିଧାନ ଏବଂ ମୋବାଇଲ ଜବତ ହୋଇଛି। ଗିରଫ ଅଭିଯୁକ୍ତଙ୍କୁ ମଙ୍ଗଳବାର କୋର୍ଟଚାଲାଣ କରାଯାଇଛି। ଜାମିନ ନାମଞ୍ଜୁର ହେବାରୁ ତାଙ୍କୁ ଜିଲା କାରାଗାରକୁ ପଠାଇ ଦିଆଯାଇଛି। ଏ ନେଇ ବରପାଲି ଥାନାରେ ଏକ ହତ୍ୟା ମାମଲା(ନଂ.୨୫୫/୨୬) ରୁଜୁ ହୋଇଛି।
ଜିଲା ପୋଲିସ ମୁଖ୍ୟାଳୟ ସମ୍ମିଳନୀ କକ୍ଷରେ ମଙ୍ଗଳବାର ଅନୁଷ୍ଠିତ ଖବରଦାତା ସମ୍ମିଳନୀରେ ବରଗଡ଼ ଏସ୍ପି ରବୀନ୍ଦ୍ରନାଥ ଶତପଥୀ ସୂଚନା ଦେଇଥିଲେ। ଗତ ୨୧ ତାରିଖ ସକାଳେ ମହିଳାଙ୍କ ମୃତଦେହ ଜବତ ହୋଇଥିଲା। ସେତେବେଳେ ମହିଳାଙ୍କ ପରିଚୟ ମିଳିଥିବାବେଳେ ତାଙ୍କ ମୁଣ୍ଡ ତଥା ଶରୀରର ବିଭିନ୍ନ ସ୍ଥାନରେ କ୍ଷତଚିହ୍ନ ରହିଥିଲା। ଏ ନେଇ ସ୍ଥାନୀୟ ସତଲମା ସରପଞ୍ଚଙ୍କ ସ୍ବାମୀ ରାଘବ ନାଏକ ଲିଖିତ ରିପୋର୍ଟ କରିବା ପରେ ସାଇବର ସେଲ୍ ଓ ସାଇଣ୍ଟିଫିକ୍ ଟିମ୍ ସହାୟତାରେ ପୋଲିସର ୩ ଟିମ୍ ତଦନ୍ତ ଆରମ୍ଭ କରିଥିଲା। ସୋସିଆଲ ମିଡିଆରେ ମୃତାଙ୍କ ଫଟୋ ପୋଷ୍ଟ କରିବା ପରେ ତାଙ୍କ ପରିବାର ଲୋକ ପୋଲିସ ସହ ଯୋଗାଯୋଗ କରିଥିଲେ। ମୃତ ମହିଳାଙ୍କ ପରିବାର ପହଞ୍ଚିବା ପରେ ମୃତଦେହ ବ୍ୟବଚ୍ଛେଦ ହୋଇଥିଲା ଏବଂ ପରିବାର ଲୋକଙ୍କୁ ପଚରାଉଚରା କରିବା ପରେ ହତ୍ୟା ଗୁମର ଖୋଲିଥିଲା। ଗିରଫ ଅଭିଯୁକ୍ତଙ୍କ ସହିତ ଦୀର୍ଘଦିନ ଧରି ମୃତ ମହିଳାଙ୍କ ଟଙ୍କା ଦେଣନେଣ କାରବାର ଚାଲିଥିଲା ଏବଂ ମୃତ ମହିଳା ପ୍ରତିମାସ ତାଙ୍କଠାରୁ ନେଇଥିବା ଟଙ୍କା ଆଣିବା ପାଇଁ ଅଭିଯୁକ୍ତଙ୍କ ପାଖକୁ ଯିବାଆସିବା କରୁଥିଲେ ବୋଲି ପରିବାର ଲୋକେ ପୋଲିସକୁ କହିଥିଲେ।
ତେବେ ହତ୍ୟା ଅଭିଯୁକ୍ତ କୋର୍ଟରେ ଜଣେ ଦଲିଲ୍ ଲେଖକଭାବେ କାମ କରୁଥିବାବେଳେ ସେ ଧରାପଡ଼ିବା ପରେ ହତ୍ୟା ଘଟଣାକୁ ସ୍ବୀକାର କରିଥିଲେ ଏବଂ ହତ୍ୟାରେ ବ୍ୟବହୃତ ଟାଙ୍ଗିଆକୁ ମଧ୍ୟ ଜବତ କରାଯାଇଛି। ଗିରଫ ଅଭିଯୁକ୍ତଙ୍କ ପାଖରେ ମୃତ ମହିଳାଙ୍କ ଲକ୍ଷାଧିକ ଟଙ୍କା ବକେୟା ରହିଥିଲା। ଘଟଣାର ୨ ଦିନ ପୂର୍ବରୁ ମହିଳା ଜଣକ ଅଭିଯୁକ୍ତଙ୍କ ପାଖକୁ ୧ ଲକ୍ଷ ଟଙ୍କା ନେବା ପାଇଁ ଆସିଥିଲେ। ମାତ୍ର ଅଭିଯୁକ୍ତ ତାହା ପ୍ରଦାନ କରିବା ବଦଳରେ ନାନା ଆଳ ଦେଖାଇ ବୁଲାଇଥିଲେ। ଏପରିକି ହତ୍ୟାକାଣ୍ଡର ପୂର୍ବ ରାତିରେ ଅଭିଯୁକ୍ତ ବରପାଲି ଶୀତଳଷଷ୍ଠୀ ଯାତ୍ରାକୁ ମୃତ ମହିଳାଙ୍କୁ ବାଇକ୍ରେ ଆଣିଥିଲେ ଏବଂ ରାତିସାରା ବୁଲାଇବା ପରେ ପରଦିନ ଭୋର୍ରେ ଟାଙ୍ଗିଆରେ ହତ୍ୟାକରି ଖସିଯିବାକୁ ଉଦ୍ୟମ କରିଥିଲେ ବୋଲି ଏସ୍ପି ଖବରଦାତା ସମ୍ମିଳନୀରେ ସୂଚନା ଦେଇଥିଲେ। ଖବରଦାତା ସମ୍ମିଳନୀରେ ବରଗଡ଼ ଏସ୍ଡିପିଓ ପଦାରବିନ୍ଦ ତ୍ରିପାଠୀ ମଧ୍ୟ ଉପସ୍ଥିତ ଥିଲେ।
