ଗୋପାଳପୁର,୨୭ା୬: ମହିଳାଙ୍କୁ ଯୌତୁକ ଜନିତ ହତ୍ୟା ଅଭିଯୋଗରେ ଗୋପାଳପୁର ପୋଲିସ ଜଣେ ଯବାନଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେ ହେଲେ ଗୋଳାବନ୍ଧ ସ୍ଥିତ ଆର୍ମି ଏଡ଼ି କଲେଜର ନାଏକ ଭାବେ କାର୍ଯ୍ୟ କରୁଥିବା ଆନନ୍ଦ ସିଂ (୩୦)।
ମିଳିଥିବା ସୂଚନା ମୁତାବକ, ଉତ୍ତରପ୍ରଦେଶ ରାଜ୍ୟ ପ୍ରୟାଗରାଜ ଜିଲା ଧରବାର ଗ୍ରାମର ମାନ ସିଂଙ୍କ ଝିଅ କାମିନୀ ସିଂଙ୍କୁ ଝାରସୁଗୁଡ଼ା ଅଞ୍ଚଳର ଆନନ୍ଦ ସିଂ ୨୦୧୯ ମାର୍ଚ୍ଚରେ ବିବାହ କରିଥିଲେ। ବିବାହର କିଛି ମାସ ପରେ ଆନନ୍ଦ ଅଧିକ ଯୌତୁକ ଦାବି କରିବା ସହ ଓ ଝିଅ ଜନ୍ମ ହେଲା ବୋଲି ସ୍ତ୍ରୀ କାମିନୀଙ୍କୁ ନିର୍ଯାତନା ଦେଉଥିଲେ। ଏନେଇ ବିଭିନ୍ନ ସମୟରେ ସ୍ବାମୀ ସ୍ତ୍ରୀଙ୍କ ମଧ୍ୟରେ ପାଟିତୁଣ୍ଡ ଲାଗି ରହୁଥିଲା। ଗତ ୨୩ ତାରିଖ ରାତିରେ କାମିନୀ ବେକରେ ଲୁଗା ଲଗାଇ ଫ୍ୟାନ୍ରେ ଓହଲି ପଡିଥିବା ନେଇ ଆନନ୍ଦ ତାଙ୍କର ବାପାଙ୍କୁ ଖବର ଦେଇଥିଲେ। ୨୪ ତାରିଖରେ ପୋଲିସ ମୃତଦେହ ଜବତ କରି ଏକ ଅପମୃତ୍ୟୁ ମାମଲା(ନଂ. ୮/୨୧) ରୁଜୁ କରିଥିଲା। ହେଲେ ଶନିବାର ମୃତ କାମିନୀଙ୍କ ବାପା ଝିଅକୁ ଯୌତୁକ ଏବଂ ଝିଅ ଜନ୍ମ ହେଲା ବୋଲି ନିର୍ଯାତନା ହେବା ସହ ଗୋପାଳପୁର ଥାନାରେ ଏକ ହତ୍ୟା ଅଭିଯୋଗ କରିଥିଲେ। ପରବର୍ତ୍ତୀ ସମୟରେ ପୋଲିସ ଯୌତୁକ ନିର୍ଯାତନା ସହ ଏକ ହତ୍ୟା ମାମଲା(ନଂ. ୯୫/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା। ତଦନ୍ତ ପରେ ପୋଲିସ ଯବାନ ଆନନ୍ଦଙ୍କୁ ଗିରଫ କରିଥିଲା।
