ଗୁଡ଼ାରୀ,୧୧ା୭(ପ୍ରମୋଦ କୁମାର ପତି): କୋରାପୁଟ ଏମ୍ପି ସପ୍ତଗିରି ଉଲାକା ଗୋପାଳପୁର-ରାୟଗଡ଼ା ପ୍ରସ୍ତାବିତ ନୂତନ ରେଳପଥର ଫାଇନାଲ ଲୋକେଶନ ସର୍ଭେ(FLS)ରେ ସାମାନ୍ୟ ପରିବର୍ତ୍ତନ କରି ଗୁଡ଼ାରୀକୁ ରେଳ ସଂଯୋଗ ପ୍ରଦାନ କରିବା ପାଇଁ ଶନିବାର କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ପତ୍ର ଲେଖିଛନ୍ତି। ଏହି ରେଳପଥ ଜିଲାର ପଦ୍ମପୁର ନିକଟସ୍ଥ ଆଖୁସିଙ୍ଗରୁ ଗୁଡ଼ାରୀ ଦେଇ ରାମନାଗୁଡ଼ା ବ୍ଲକର ବାଙ୍କିଲି ନିକଟରେ ବର୍ତ୍ତମାନର ପ୍ରସ୍ତାବିତ ଗୁଣୁପୁର ଥେରୁବାଲି ରେଳପଥ ସହ ସଂଯୋଗ କରିବାକୁ ପ୍ରସ୍ତାବ ଦେଇଛନ୍ତି। ନିଜ ଚିଠିରେ ଏମ୍ପି ଉଲ୍ଲେଖ କରିଛନ୍ତି ଯେ, ରାମନାଗୁଡ଼ା ନିକଟରେ ବର୍ତ୍ତମାନ ପ୍ରସ୍ତାବିତ ଗୋପାଳପୁର-ରାୟଗଡ଼ା ରେଳପଥ ସଂଯୋଗ କରୁଥିବା ବେଳେ ଏହାକୁ ପରିବର୍ତ୍ତନ କରି ବାଙ୍କିଲି ନିକଟରେ ସଂଯୋଗ କରାଗଲେ ରେଳପଥର ଦୂରତା ପ୍ରାୟ ୧୨ରୁ ୧୫ କିଲୋମିଟର ପର୍ଯ୍ୟନ୍ତ କମିବ। ଏହାଛଡ଼ା ରାୟଗଡ଼ା ଜିଲାର ୧୦ମ ବ୍ଲକ ଭାବେ ଗୁଡ଼ାରୀ ସିଧାସଳଖ ରେଳପଥ ସହ ଯୋଡ଼ିହେବ। ପ୍ରସ୍ତାବିତ ରେଳପଥ ଗୁଡ଼ାରୀ ଓ ପଦ୍ମପୁର ବ୍ଲକ ମଧ୍ୟଦେଇ ଅତିକ୍ରମ କରିବା ଫଳରେ ଉଭୟ ବ୍ଲକ୍ର ପାଖାପାଖି ୨ ଲକ୍ଷ ଲୋକ ରେଳ ସେବାର ସୁବିଧା ପାଇପାରିବେ।
ସେହିପରି ଚନ୍ଦ୍ରପୁର ବ୍ଲକ ମଧ୍ୟ ଗୁଡ଼ାରୀ ରେଳ ଷ୍ଟେଶନ ଉପରେ ନିର୍ଭର କରିବ ଯାହା ଫଳରେ ସମଗ୍ର ଅଞ୍ଚଳର ଗମନା ଗମନ କ୍ଷେତ୍ରରେ ଏକ ନୂଆ ଅଧ୍ୟାୟ ସୃଷ୍ଟି ହେବ। ବର୍ତ୍ତମାନ ପେଟ ପୋଷିବା ନିମନ୍ତେ ଗୁଡ଼ାରୀ, ପଦ୍ମପୁର ଓ ଚନ୍ଦ୍ରପୁର ବ୍ଲକର ଲକ୍ଷାଧିକ ଲୋକ ଅନ୍ୟ ରାଜ୍ୟକୁ ଦାଦନ ଖଟିବାକୁ ଯାଉଥିବା ବେଳେ ଏହି ରେଳପଥ କାର୍ଯ୍ୟକାରୀ ହେଲେ ସ୍ଥାନୀୟ ଭାବେ ଶିଳ୍ପ, ବ୍ୟବସାୟ ଓ କର୍ମସଂସ୍ଥାନ ବୃଦ୍ଧି ପାଇବା ସହ ବଢୁଥିବା ଦାଦନ ସମସ୍ୟା ହ୍ରାସ ପାଇବା ଏବଂ ଲୋକଙ୍କ ଜୀବନ ଜୀବିକାରେ ପରିବର୍ତ୍ତନ ହୋଇପାରିବ। ଗୁଡ଼ାରୀ ଅଞ୍ଚଳରେ ବ୍ୟାପକ ପରିମାଣର ସରକାରୀ ଜମି ଉପଲବ୍ଧ ଥିବାରୁ ଭବିଷ୍ୟତରେ ଶିଳ୍ପ ପ୍ରତିଷ୍ଠା ପାଇଁ ବିପୁଳ ସମ୍ଭାବନା ରହିଛି। ଚିରସ୍ରୋତା ବଂଶଧାରା ନଦୀ ଉପରେ ପ୍ରସ୍ତାବିତ ପାଣିଡଙ୍ଗର ପ୍ରକଳ୍ପ କାର୍ଯ୍ୟକାରୀ ହେଲେ ଶିଳ୍ପ ପାଇଁ ଆବଶ୍ୟକ ଜଳ ଯୋଗାଣ ମଧ୍ୟ ସୁନିଶ୍ଚିତ ହେବ। ଏହା ଫଳରେ ଦକ୍ଷିଣ ଓଡ଼ିଶାର ଏହି ପଛୁଆ ଆଦିବାସୀ ଅଞ୍ଚଳରେ ଶିଳ୍ପାୟନ ଓ ଆର୍ଥିକ ବିକାଶର ନୂତନ ସମ୍ଭାବନା ସୃଷ୍ଟି ହେବ। ଗତ କିଛି ଦିନ ପୂର୍ବେ ଅନୁଷ୍ଠିତ ଦିଶା ବୈଠକରେ ଏମ୍ପି ରେଳ ବୋର୍ଡକୁ ଗୁଡ଼ାରୀକୁ ଏହି ରେଳପଥ ସହ ସଂଯୋଗ କରିବା ପାଇଁ ଏକ ବିସ୍ତୃତ ରିପୋର୍ଟ ଦାଖଲ କରିବାକୁ ଅନୁରୋଧ କରିଥିଲେ। ସ୍ଥାନୀୟ ବୁଦ୍ଧିଜୀବୀ, ‘ୟୁଥ ଫର ଚେଞ୍ଜ’ ଯୁବଗୋଷ୍ଠୀ, ବିଭିନ୍ନ ସାମାଜିକ ସଂଗଠନ ଏବଂ ‘ଗୁଡାରୀ ଉନ୍ନୟନ ପରିଷଦ’ର ସଦସ୍ୟମାନେ ଏମ୍ପିଙ୍କ ଏହି ପଦକ୍ଷେପକୁ ସ୍ବାଗତ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କୁ ଏହି ପ୍ରସ୍ତାବକୁ ସକାରାତ୍ମକ ଭାବେ ବିଚାର କରି ଶୀଘ୍ର ଅନୁମୋଦନ ଦେବାକୁ ଅନୁରୋଧ କରିଛନ୍ତି।
