ଦୁନିଆରେ ଧର୍ମ ଏବଂ ସମ୍ପ୍ରଦାୟକୁ ନେଇ ଅନେକ ବିଶ୍ୱାସ ରହିଛି। ବର୍ଷ ବର୍ଷ ଧରି ଲୋକେ ଏହି ପରମ୍ପରାକୁ ମାନି ଆସୁଛନ୍ତି। ଏହିପରି ଏକ ବିଶ୍ୱାସ ହେଉଛି ଥାଇଲାଣ୍ଡର ମଙ୍କି ବଫେ ଫେଷ୍ଟିଭାଲ।
ବ୍ୟାଙ୍କକ୍ଠାରୁ ପ୍ରାୟ ୧୫୦ କିଲୋମିଟର ଦୂରରେ ଲୋପବୁରୀ ନାମକ ଏକ ସହର ଅଛି। ପ୍ରତିବର୍ଷ ଏହି ସହରରେ ‘ମଙ୍କି ବଫେ ଫେଷ୍ଟିଭାଲ’ ପାଳନ କରାଯାଏ । ଏହି ପର୍ବର ବିଶେଷତ୍ୱ ହେଉଛି, ଏହା ଏକ ଶୋଭାଯାତ୍ରା ପରି ହୋଇଥାଏ। ଏଠାରେ ଖାଦ୍ୟ ପାଇଁ ମାଗଣା ବ୍ୟବସ୍ଥା କରାଯାଏ। ସାଜସଜ୍ଜା ବି କରାଯାଏ। କିନ୍ତୁ ଏସବୁ ମଣିଷ ପାଇଁ ନୁହେଁ, କେବଳ ମାଙ୍କଡ଼ମାନଙ୍କ ପାଇଁ।
ମହୋତ୍ସବ ଆୟୋଜକମାନେ ମାଙ୍କଡ଼ମାନଙ୍କ ପାଇଁ ତାଜା ଫଳ, ସାଲାଡ ଏବଂ ଥାଇ ମିଠା ରଖିଥାନ୍ତି। ଏବଂ ଏହି ପର୍ବକୁ ବହୁତ ବଡ଼ ଶୋଭାଯାତ୍ରାରେ ପାଳନ କରନ୍ତି। ଏବେ ପ୍ରଶ୍ନ ଉଠୁଛି, ଏପରି ପର୍ବ ପାଳନ କରିବାର କାରଣ କ’ଣ? ଲୋକମାନେ ବିଶ୍ୱାସ କରନ୍ତି, ଏହି ପର୍ବ ଏଠାରେ ଜଣେ ସ୍ଥାନୀୟ ବ୍ୟବସାୟୀଙ୍କ ଦ୍ୱାରା ଆରମ୍ଭ ହୋଇଥିଲା। ସେ ବିଶ୍ୱାସ କରୁଥିଲେ ଯେ, ଲୋପବୁରୀରେ ମାଙ୍କଡ଼ଙ୍କ ସଂଖ୍ୟା ଅଧିକ ଥିଲା, ଯେଉଁ କାରଣରୁ ପର୍ଯ୍ୟଟକମାନେ ଏଠାକୁ ଆସି ସେମାନଙ୍କୁ ଖାଇବାକୁ ଦେଉଥିଲେ। ଖୁବ୍ ଶୀଘ୍ର ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇଲା ଏବଂ ବ୍ୟବସାୟୀଙ୍କ ବ୍ୟବସାୟ ମଧ୍ୟ ବୃଦ୍ଧି ପାଇଲା। ଏଭଳି ପରିସ୍ଥିତିରେ ସେ ମାଙ୍କଡ଼ମାନଙ୍କୁ ପାର୍ଟି ଦେବା ଆରମ୍ଭ କରିଦେଲେ। ଯାହା ଫଳରେ ସହରରେ ଅଧିକରୁ ଅଧିକ ମାଙ୍କଡ଼ ବାସ କରୁଛନ୍ତି।
ଏକ ରିପୋର୍ଟ ଅନୁଯାୟୀ, ପୃଥିବୀର ବିଭିନ୍ନ ସ୍ଥାନରୁ ପର୍ଯ୍ୟଟକମାନେ ଏଠାକୁ ଆସୁଥିଲେ, ଯେଉଁମାନେ ମାଙ୍କଡ଼ମାନଙ୍କୁ ଖାଦ୍ୟ ଓ ପାନୀୟ ଦେଉଥିଲେ, କିନ୍ତୁ କରୋନା ମହାମାରୀ ଯୋଗୁ ଲୋକମାନେ ଆସିବା ବନ୍ଦ କରିଦେଲେ। ମାଙ୍କଡ଼ମାନେ ଭୋକ ଉପାସରେ ରହିଲେ। ଫଳରେ ସେମାନେ ଦୋକାନରୁ ସାମଗ୍ରୀ ଚୋରି କରି ଖାଉଛନ୍ତି।
