ରାୟଗଡ଼ା,୧୦ା୨(ସ୍ବ.ପ୍ର.):ରାୟଗଡ଼ା ଜିଲାରେ ଭୂତଳ ଜଳସ୍ତର କମିବାରେ ଲାଗିଛି। ରାସ୍ତା ଓ ନର୍ଦ୍ଦମାରେ ପ୍ରବାହିତ ହୋଇ ନଷ୍ଟ ହେଉଥିବା ବର୍ଷାଜଳକୁ ଛାତ ଉପରେ ସଂରକ୍ଷଣ କରାଯାଇ ପାରିଲେ ଆଗାମୀ ଦିନରେ ଜିଲାରେ ଜଳ ସଙ୍କଟ ରହିବ ନାହିଁ। ସରକାରଙ୍କ ପକ୍ଷରୁ ଏଥିପାଇଁ ଅର୍ଥ ଖର୍ଚ୍ଚ କରାଯାଉଛି। ହେଲେ ଅଧିକାରୀମାନେ ଏଭଳି ଏକ ଗମ୍ଭୀର ବିଷୟକୁ ଗୁରୁତର ସହ ନେଇ ଜଳ ସଂରକ୍ଷଣ ଦିଗରେ କାମ କରୁ ନ ଥିବା ଜଣାପଡ଼ିଛି। କରୋନା ସମୟରେ ରୁଫ୍ଟପ୍ରେ ବର୍ଷା ଜଳ ସଂରକ୍ଷଣ ପାଇଁ ପ୍ରାୟ ୨ଲକ୍ଷ ୫୦ ହଜାର ଟଙ୍କା ମଞ୍ଜୁର ହୋଇଥିଲା। ହେଲେ ହୋଇ ନ ଥିବା ଜଣାପଡ଼ିଛି।
ଜିଲାପାଳଙ୍କ କାର୍ଯ୍ୟାଳୟ ବ୍ୟତୀତ ଜିଲା ପରିଷଦ କାର୍ଯ୍ୟାଳୟ, ସର୍କିଟ ହାଉସ, ପୂର୍ତ୍ତ ବିଭାଗ ଡାକବଙ୍ଗଳା, ଜିଲା ନିୟୋଜନ କାର୍ଯ୍ୟାଳୟ, ପୌର ପରିଷଦ କାର୍ଯ୍ୟାଳୟ, ଆଞ୍ଚଳିକ ପରିବହନ କାର୍ଯ୍ୟାଳୟରେ ଏହି ଜଳ ସଂରକ୍ଷଣ ପ୍ରକଳ୍ପ କାର୍ଯ୍ୟ ୨୦୨୦ରେ ହାତକୁ ନିଆଯାଇଥିଲା। ୪ଟି କାର୍ଯ୍ୟାଳୟରେ ୨ଲକ୍ଷ ୫୦ ହଜାର ଓ ୩ ଟି କାର୍ଯ୍ୟାଳୟରେ ୨ ଲକ୍ଷ ଲେଖାଏ ଖର୍ଚ୍ଚ ଆକଳନ ପରେ ତାହାର ଅନୁଦାନ ଜଳସମ୍ପଦ ବିଭାଗ ପକ୍ଷରୁ ପ୍ରଦାନ କରାଯାଇଥିଲା। ପ୍ରଥମ ପର୍ଯ୍ୟାୟରେ ମୋଟ ୧୬ ଲକ୍ଷ ଟଙ୍କା ଆସିଥିଲା। ହେଲେ ୭ ସରକାରୀ କୋଠା ମଧ୍ୟରୁ କୌଣସି ଗୋଟିଏ ସ୍ଥାନରେ ମଧ୍ୟ ଏହି ପ୍ରକଳ୍ପ ନିର୍ମାଣ ହୋଇନାହିଁ। ଏମିତିକି ଅନ୍ୟ ସରକାରୀ କୋଠା ଗୁଡ଼ିକୁ ମଧ୍ୟ ଏବେ ଯୋଜନାରେ ସାମିଲ କରିବାକୁ ଯୋଜନା ଚାଲିଛି। ତେବେ ମହତ୍ ଉଦ୍ଦେଶ୍ୟରେ ଆରମ୍ଭ ହୋଇଥିବା ଏହି ଯୋଜନା ସଫଳ କିପରି ହେବ ତାହାକୁ ନେଇ ପ୍ରଶ୍ନ ଉଠିଛି। ରାୟଗଡ଼ା ବିଭାଜନ କାର୍ଯ୍ୟାଳୟରେ କୌଣସି କର୍ମଚାରୀ ନାହାଁନ୍ତି। ମୁଖ୍ୟ ଭୂତତ୍ତ୍ୱବିତ୍ ୩ ଜିଲା ଦାୟିତ୍ୱରେ ରହିଛନ୍ତି। ସେହିଭଳି ଏବେକାର ଯନ୍ତ୍ରୀ ୪ଟି ଜିଲା ଓ ଅନ୍ୟ କର୍ମଚାରୀମାନେ ୨ଜିଲା ଦାୟିତ୍ୱରେ ରହିଛନ୍ତି। ତେଣୁ ଅଧିକାରୀମାନଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ମଧ୍ୟ ସମ୍ଭବ ହୋଇପାରିନି। ବିଭାଗୀୟ କାର୍ଯ୍ୟାଳୟରେ ଥିବା କର୍ମଚାରୀଙ୍କୁ ଦାୟିତ୍ୱରେ ଥିବା ଯନ୍ତ୍ରୀଙ୍କ ମୋବାଇଲ ନମ୍ବର ମାଗିବାରୁ ସେ ଦେବାକୁ ମନା କରି ଦେଇଥିଲେ। ତେଣୁ ଭୂତଳ ଜଳ ସଂରକ୍ଷଣ ପ୍ରକଳ୍ପ କାମ କିପରି ଚାଲିଛି ତାହାର ତଦନ୍ତ କରି ଜିଲା ପ୍ରଶାସନ ଦୃଢ଼ କାର୍ଯ୍ୟାନୁଷ୍ଠାନ ନେବାର ଆବଶ୍ୟକତା ରହିଛି ବୋଲି ଜନସାଧାରଣ ଏବଂ ବୁଦ୍ଧିଜୀବୀ ମତପ୍ରକାଶ କରିଛନ୍ତି। ଏଥିସହ ତଦନ୍ତ ଦାୟିତ୍ୱ ଭିଜିଲାନ୍ସ ବିଭାଗକୁ ହସ୍ତାନ୍ତର କରିବାକୁ ଦାବି ହେଉଛି।
