ନୂଆଦିଲ୍ଲୀ,୮।୧୦: ଭାରତୀୟ କ୍ରିକେଟ୍ ଦଳର ଷ୍ଟାର୍ ଦ୍ରୁତ ବୋଲର ମହମ୍ମଦ ଶାମିଙ୍କୁ ନେଇ ଉତ୍ତରପ୍ରଦେଶ ରାଜନୀତିରେ ଚର୍ଚ୍ଚା ଜୋର ଧରିଛି। କିଛି ମାସ ପୂର୍ବରୁ ଶାମି ରାଷ୍ଟ୍ରୀୟ ଲୋକ ଦଳ (RLD) ଅଧ୍ୟକ୍ଷ ଜୟନ୍ତ ଚୌଧୁରୀଙ୍କୁ ଭେଟିବା ପରେ ସେ ୨୦୨୭ ୟୁପି ବିଧାନସଭା ନିର୍ବାଚନ ଲଢ଼ିପାରନ୍ତି ବୋଲି ଚର୍ଚ୍ଚା ହୋଇଥିଲା। ଏହା ପରେ ତାଙ୍କ ପତ୍ନୀ ହସିନ ଜହାଁ ମଧ୍ୟ ଶାମି ଓ ତାଙ୍କ ପରିବାରକୁ ନିର୍ବାଚନୀ ଚ୍ୟାଲେଞ୍ଜ ଦେଇଥିଲେ। ଏବେ ଦୀର୍ଘ ସମୟ ପରେ ଏହି ପ୍ରସଙ୍ଗରେ ଶାମି ନିଜର ପ୍ରତିକ୍ରିୟା ରଖିଛନ୍ତି।
ସେପ୍ଟେମ୍ବର ଶେଷ ଆଡ଼କୁ ହସିନ ଜହାଁ କହିଥିଲେ ଯେ, ଶାମିଙ୍କ ପରିବାରରୁ କେହି ନିର୍ବାଚନ ଲଢ଼ିଲେ ସେ ତାଙ୍କ ବିରୋଧରେ ନିର୍ବାଚନ ଲଢ଼ିବେ । ଗତ କିଛି ବର୍ଷ ଧରି ଶାମି ଓ ହସିନ ଜହାଁଙ୍କ ମଧ୍ୟରେ ବିବାଦ ଚାଲିଆସୁଛି ଏବଂ ଦୁହିଁଙ୍କ ଛାଡ଼ପତ୍ର ମାମଲା ମଧ୍ୟ କୋର୍ଟରେ ଚାଲୁଥିବା କୁହାଯାଉଛି। ଏହି ବୟାନ ପରେ ଶାମିଙ୍କ ପ୍ରତିକ୍ରିୟାକୁ ନେଇ ଚର୍ଚ୍ଚା ହେଉଥିଲା। ଏବେ ରୁଡ଼କିରେ ସ୍ୱାଧୀନ ବିଧାୟକ ଉମେଶ କୁମାରଙ୍କୁ ଭେଟିବା ସମୟରେ ଖବରଦାତାଙ୍କ ପ୍ରଶ୍ନର ଉତ୍ତର ଦେଇ ଶାମି କହିଛନ୍ତି, “ଯିଏ ଯେଉଁଠୁ ନିର୍ବାଚନ ଲଢ଼ିବାକୁ ଚାହୁଁଛି ଲଢ଼ୁ, ମୋର କୌଣସି ଆପତ୍ତି ନାହିଁ। ଏହା ତ ପୂରା ଖୋଲା ମଇଦାନ, ଯିଏ ଆସିବାକୁ ଚାହୁଁଛି ଆସୁ।”
ଶାମିଙ୍କ ଏହି ବୟାନକୁ ନେଇ ତାଙ୍କ ରାଜନୀତିରେ ପ୍ରବେଶ ସମ୍ଭାବନା ନେଇ ପୁଣିଥରେ ଚର୍ଚ୍ଚା ଜୋର ଧରିଛି । ତେବେ ଶାମି ନିଜେ ନିର୍ବାଚନ ଲଢ଼ିବେ କି ନାହିଁ, ସେନେଇ କୌଣସି ସ୍ପଷ୍ଟ ଘୋଷଣା କରିନାହାନ୍ତି । ଅନ୍ୟପଟେ ଶାମିଙ୍କ କ୍ରିକେଟ୍ କ୍ୟାରିୟରକୁ ନେଇ ମଧ୍ୟ ଚର୍ଚ୍ଚା ବଢ଼ିଛି। ନିକଟରେ ଦ୍ରୁତ ବୋଲର ଭୁବନେଶ୍ୱର କୁମାର ଭାରତୀୟ ଦଳକୁ ଫେରିବା ପରେ ଶାମିଙ୍କ କମବ୍ୟାକ୍ ନେଇ ମଧ୍ୟ ଆଶା ବଢ଼ିଛି।
ଶାମି ଶେଷଥର ପାଇଁ ୨୦୨୫ ଚାମ୍ପିଅନ୍ସ ଟ୍ରଫିରେ ଭାରତ ପାଇଁ ଖେଳିଥିଲେ। ଏହା ପରେ ଆହତ ହୋଇଥିବାରୁ ସେ କିଛି ସମୟ କ୍ରିକେଟ୍ଠାରୁ ଦୂରେ ରହିଥିଲେ। ଫିଟ୍ ହେବା ପରେ ଘରୋଇ କ୍ରିକେଟ୍ରେ ସେ ନିୟମିତ ଖେଳୁଛନ୍ତି ଏବଂ ଭଲ ପ୍ରଦର୍ଶନ ମଧ୍ୟ କରୁଛନ୍ତି । ଘରୋଇ କ୍ରିକେଟ୍ରେ ଶାମିଙ୍କ ପ୍ରଦର୍ଶନ ଭଲ ରହିଥିଲେ ମଧ୍ୟ ତାଙ୍କୁ ଟିମ୍ ଇଣ୍ଡିଆକୁ ବାରମ୍ବାର ଫେରାଇ ନିଆଯାଇନାହିଁ। ଏବେ ଚୟନକର୍ତ୍ତା ମଣ୍ଡଳୀରେ ପରିବର୍ତ୍ତନ ପରେ ଆଗାମୀ ନ୍ୟୁଜିଲାଣ୍ଡ ବିପକ୍ଷ ଦିନିକିଆ କିମ୍ବା ଟେଷ୍ଟ ସିରିଜରେ ଶାମିଙ୍କୁ ସୁଯୋଗ ମିଳିପାରେ ବୋଲି ଚର୍ଚ୍ଚା ହେଉଛି।
