ନୂଆଦିଲ୍ଲୀ, ୩ା୪(ପି.ଟି.) : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଭୋପାଳରେ ଉଦ୍ବୋଧନ ଦେଲାବେଳେ ତାଙ୍କ ଛବିକୁ ଖରାପ କରିବା ପାଇଁ କେତେଜଣ ବଦ୍ଧପରିକର ଏବଂ ସେମାନେ ଏଥିପାଇଁ ସୁପାରି ଦେଇଛନ୍ତି ବୋଲି କହିଥିଲେ। ଭାରତରେ ତଥା ଦେଶ ବାହାରେ କେତେଜଣ ଏହି ଗୁପ୍ତ ଯୋଜନାରେ ସାମିଲ ଥିବା ସେ ଅଭିଯୋଗ କରିଥିଲେ। କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ରବିବାର ଏହାର ଦୃଢ଼ ଜବାବ ଦେଇଛନ୍ତି।
ଆପଣ ଲୋକଙ୍କ ପକେଟ ଲୁଟିବାକୁ ସୁପାରି ନେଇଛନ୍ତି ବୋଲି ଖାର୍ଗେ ପ୍ରଧାନମନ୍ତ୍ରୀଙ୍କୁ କହିଛନ୍ତି। କେତେକ ଅତ୍ୟାବଶ୍ୟକ ଔଷଧର ଦାମ୍ ବଢ଼ାଇ ଦିଆଯାଇଥିବାରୁ ଖାର୍ଗେ ଏଭଳି ଅଭିଯୋଗ ଆଣିଛନ୍ତି। ଏପ୍ରିଲ ୧ରୁ ୩୮୪ଟି ଅତ୍ୟାବଶ୍ୟକ ଔଷଧ ଏବଂ ୧,୦୦୦ରୁ ଊର୍ଦ୍ଧ୍ୱ ଫର୍ମୁଲେଶନର ଦାମ୍ ୧୧ ପ୍ରତିଶତ ବଢ଼ିବ ବୋଲି ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଥିବାରୁ ଖାର୍ଗେ ପ୍ରଧାନମନ୍ତ୍ରୀଙ୍କ ଉପରେ ବର୍ଷିଛନ୍ତି।
ଛବି ମଳିନ କରିବା ଲାଗି କେଉଁମାନେ ସୁପାରି ଦେଇଛନ୍ତି, ପ୍ରଧାନମନ୍ତ୍ରୀ ସେମାନଙ୍କ ନାମ ପ୍ରକାଶ କରନ୍ତୁ ବୋଲି ବରିଷ୍ଠ କଂଗ୍ରେସ ନେତା ତଥା ରାଜ୍ୟ ସଭା ସଦସ୍ୟ କପିଲ ସିବଲ କହିଛନ୍ତି। ଅଭିଯୁକ୍ତମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ସେ ଆହ୍ବାନ ଦେଇଛନ୍ତି।
