ଉମରକୋଟ/ରାଇଘର,୧୭ା୭(ସ୍ବ.ପ୍ର./ଡି.ଏନ୍.ଏ.): ରାଜ୍ୟ କ୍ରୀଡ଼ା ଓ ଯୁବବ୍ୟାପାର ମନ୍ତ୍ରୀ ତୁଷାରକାନ୍ତି ବେହେରା ୩ ଦିନିଆ ନବରଙ୍ଗପୁର ଜିଲା ଗସ୍ତ କରିଛନ୍ତି। ଶନିବାର ସେ ଉମରକୋଟ ଯାଇଥିଲେ। ତେବେ ମନ୍ତ୍ରୀଙ୍କ ଗସ୍ତକୁ ବିରୋଧ କରିଛି ଭାଜପା। ମନ୍ତ୍ରୀ ଉମରକୋଟ ଏବଂ ରାଇଘର ଗସ୍ତ ବେଳେ ଉଭୟ ସ୍ଥାନରେ ତାଙ୍କୁ କଳାପତାକା ପ୍ରଦର୍ଶନ କରାଯାଇଥିଲା।
ଉମରକୋଟ ନୂତନ ବସ୍ଷ୍ଟାଣ୍ଡ ନିକଟରେ ଭାଜପାକର୍ମୀମାନେ ମନ୍ତ୍ରୀଙ୍କୁ କଳାପତାକା ଦେଖାଇଥିଲେ। ଏହାକୁ ନେଇ ଉଭୟ ଭାଜପା ଏବଂ ବିଜେଡି କର୍ମୀଙ୍କ ମଧ୍ୟରେ ଧସ୍ତାଧସ୍ତି ପରିସ୍ଥିତି ଉପୁଜିଥିଲା। ଏହି ଘଟଣାରେ ପୋଲିସ ୩ ଜଣ ଭାଜପା କର୍ମୀଙ୍କୁ ଉମରକୋଟ ଥାନାରେ ଅଟକ ରଖିଛି। ସେହିପରି ରାଇଘରଠାରେ ମଧ୍ୟ ମନ୍ତ୍ରୀଙ୍କୁ କଳାପତାକା ଦେଖାଇ ଆଉ ୨ ଭାଜପା କର୍ମୀ ଅଟକଥିବା ଜଣାପଡ଼ିଛି। ଅନ୍ୟପକ୍ଷରେ ଉମରକୋଟ ବିଧାୟକ ନିତ୍ୟାନନ୍ଦ ଗଣ୍ଡ ଏକ ଖବରଦାତା ସମ୍ମିଳନୀରେ ମନ୍ତ୍ରୀଙ୍କ ଗସ୍ତକୁ ବିରୋଧ କରିଛନ୍ତି। ମନ୍ତ୍ରୀଙ୍କ ଗସ୍ତବେଳେ ବିଧାୟକଙ୍କୁ ଅପମାନ କରାଯାଇଥିବା ସେ ଅଭିଯୋଗ କରିଛନ୍ତି।
ବିଧାୟକଙ୍କ ଅଭିଯୋଗ ମୁତାବକ, ଉମରକୋଟ ମିନି ଷ୍ଟାଡିୟମଠାରେ ଶନିବାର ଏକ ଶିଳାନ୍ୟାସ କାର୍ଯ୍ୟକ୍ରମ ରହିଥିଲା। ତାଙ୍କୁ ଉମରକୋଟ ପୌର ପରିଷଦ ଅଧ୍ୟକ୍ଷଙ୍କ ବ୍ୟତୀତ ଅନ୍ୟ କେହି ଯୋଗାଯୋଗ କରି ନ ଥିଲେ। ଏପରି କି ମନ୍ତ୍ରୀଙ୍କ ଗସ୍ତର ସୂଚୀ ମଧ୍ୟ ତାଙ୍କୁ ଦିଆଯାଇ ନ ଥିଲା। ପୌର ପରିଷଦ ଅଧ୍ୟକ୍ଷଙ୍କ ମାଧ୍ୟମରେ ପାଇଥିବା ଖବର ଅନୁଯାୟୀ ବିଧାୟକ ପୂର୍ବାହ୍ନ ୧୦ଟାରେ କାର୍ଯ୍ୟକ୍ରମ ସ୍ଥଳରେ ପହଞ୍ଚିଥିଲେ। ସେଠାରେ ୪୦ମିନିଟ୍ ଅପେକ୍ଷାକରି ମନ୍ତ୍ରୀ ନ ପହଞ୍ଚିବାରୁ ଫେରିଥିଲେ। ମନ୍ତ୍ରୀ ତାଙ୍କ ନିର୍ଦ୍ଧାରିତ ଗସ୍ତ ସମୟ ପୂର୍ବାହ୍ନ ୧୧ଟାରେ ପହଞ୍ଚିଥିଲେ। ତେବେ ବିଧାୟକ ପୂର୍ବରୁ ପହଞ୍ଚି ଫେରିଥିବା ବେଳେ ମନ୍ତ୍ରୀ ପହଞ୍ଚିବା ପରେ ତାଙ୍କୁ କାହିଁକି ସୂଚନା ଦିଆଗଲା ନାହିଁ ବୋଲି ବିଧାୟକ ନିତ୍ୟାନନ୍ଦ ପ୍ରଶ୍ନ କରିଛନ୍ତି। ଏହା ଏକ ଅସାମ୍ବିଧାନିକ କାର୍ଯ୍ୟ ଓ ସ୍ଥାନୀୟ ବିଧାୟକଙ୍କ ପ୍ରତି ଅପମାନ ବୋଲି ସେ କହିଛନ୍ତି।
ସେହିପରି କଳାପତାକା ପ୍ରଦର୍ଶନ ଅଭିଯୋଗରେ ଭାଜପା କର୍ମୀଙ୍କୁ ଅଟକ ଘଟଣାର ପ୍ରତିବାଦ କରି ବିଧାୟକ ଦଳୀୟ କର୍ମୀଙ୍କ ସହ ଉମରକୋଟ ଥାନା ସମ୍ମୁଖରେ ଧାରଣାରେ ବସିଛନ୍ତି। ଅଟକ କର୍ମୀଙ୍କୁ ଥାନାରୁ ନ ଛାଡ଼ିବା ପର୍ଯ୍ୟନ୍ତ ଧାରଣା ଜାରି ରହିବ ବୋଲି ସେ କହିଛନ୍ତି। ଅପରପକ୍ଷରେ ନବରଙ୍ଗପୁର ଜିଲାର ଉନ୍ନତି ପାଇଁ ଆସିଥିବା ମନ୍ତ୍ରୀଙ୍କୁ ବିରୋଧ କରି କଳାପତାକା ପ୍ରଦର୍ଶନ ଘଟଣାର ପ୍ରତିବାଦ କରି ବିଜୁ ଛାତ୍ର ଜନତା ଦଳର ସଭାପତି ସୁଧାଂଶୁ ଦାସଙ୍କ ନେତୃତ୍ୱରେ ଦଳୀୟ କର୍ମୀ ଉମରକୋଟ ଥାନାରେ ଅଭିଯୋଗ କରିବାକୁ ଆସିଥିଲେ। ହେଲେ ଥାନା ଅଧିକାରୀ ଉଭୟ ଦଳର କର୍ମୀଙ୍କୁ ବୁଝାଶୁଝା କରିଥିଲେ।
