ବଞ୍ଚୋ,୯ା୯(ପ୍ରଦୋଷ ବିଶ୍ୱାଳ): ଆନନ୍ଦପୁର ଥାନା ଅଞ୍ଚଳର ଜଣେ ୧୭ ବର୍ଷୀୟା ନାବାଳିକାଙ୍କୁ ବଳାତ୍କାର କରାଯାଇଥିବା ଅଭିଯୋଗରେ ଜଣେ ୧୭ ବର୍ଷ ୧୦ ମାସ ବୟସର ନାବାଳକଙ୍କୁ ପୋଲିସ ଅଟକ ରଖିଛି। ଏନେଇ ଆନନ୍ଦପୁର ଥାନାରେ ମାମଲା ନମ୍ବର ୨୪୦/୨୬ ରୁଜୁ ହୋଇଛି।
ସୂଚନାନୁଯାୟୀ, ଚଳିତ ବର୍ଷ ଜାନୁଆରୀ ମାସରେ ନାବାଳିକା ଜଣକ ନିଜ ଗାଁର ଅନ୍ୟମାନଙ୍କ ସହ ଧାନ କାଟିବା କାମ ପାଇଁ ଯାଜପୁର ଜିଲା କୋରେଇ ଥାନା ଅଧୀନ ତାରାକୋଟ ଅଞ୍ଚଳକୁ ଯାଇଥିଲେ। ସେଠାରେ ଜଣେ ନାବାଳକ ତାଙ୍କୁ ବଳାତ୍କାର କରିଥିବା ଅଭିଯୋଗ ହୋଇଛି। ଘଟଣା ପରେ ନାବାଳିକା ଜଣକ ବର୍ତ୍ତମାନ ପ୍ରାୟ ୮ ମାସର ଗର୍ଭବତୀ ଥିବା ପୋଲିସ ପକ୍ଷରୁ କୁହାଯାଇଛି। ପ୍ରଥମେ ଏହି ଘଟଣାକୁ ନେଇ କେନ୍ଦ୍ରାପଡ଼ା ଜିଲା କୁଦାନଗରୀ ଥାନାରେ ଶୂନ୍ୟ ଅଭିଯୋଗ ମାମଲା ରୁଜୁ ହୋଇଥିଲା। ତଦନ୍ତ ସମୟରେ ଘଟଣାଟି ଆନନ୍ଦପୁର ଥାନା ଅଧୀନର ବୋଲି ଜଣାପଡ଼ିବା ପରେ ମାମଲାଟି ଆନନ୍ଦପୁର ଥାନାକୁ ହସ୍ତାନ୍ତର ହୋଇଥିଲା। ଘଟଣାରେ ସମ୍ପୃକ୍ତ ନାବାଳକଙ୍କୁ ପୋଲିସ ଅଟକ ରଖିଥିବା ବେଳେ ଆବଶ୍ୟକ ଆଇନଗତ ପ୍ରକ୍ରିୟା ଶେଷ ପରେ ତାଙ୍କୁ କେନ୍ଦୁଝରସ୍ଥିତ ପ୍ରଧାନ ନାବାଳକ ନ୍ୟାୟ ବୋର୍ଡ ନିକଟରେ ଉପସ୍ଥାପନ କରାଯିବ। ଏନେଇ ଆନନ୍ଦପୁର ଉପଖଣ୍ଡ ପୋଲିସ ଅଧିକାରୀ କମଳ କୁମାର ପଣ୍ଡା ସୂଚନା ଦେଇଛନ୍ତି। ନାବାଳିକାଙ୍କ ପରିଚୟ ଆଇନ ଅନୁଯାୟୀ ସମ୍ପୂର୍ଣ୍ଣ ଗୋପନ ରଖାଯାଇଛି।
