ନୂଆଦିଲ୍ଲୀ,୬।୧୦: ବଲିଉଡ୍ର ଲୋକପ୍ରିୟ ସିଙ୍ଗର୍ ମିକା ସିଂ ନିଜର ବେବାକ୍ ଅନ୍ଦାଜ ପାଇଁ ବେଶ୍ ପରିଚିତ। ଭାରତ-ପାକିସ୍ତାନ ସମ୍ପର୍କ ଏବଂ ଦୁଇ ଦେଶର କଳାକାରଙ୍କୁ ନେଇ ମଧ୍ୟ ସେ ପୂର୍ବରୁ ନିଜ ମତ ରଖିଛନ୍ତି। ଏବେ ‘ବାତେଁ ଦିଲ୍ ସେ ୱିଦ୍ ନବିକା କୁମାର’ ପଡ୍କାଷ୍ଟରେ ମିକା ସିଂ ପାକିସ୍ତାନ ସହ ନିଜର ବ୍ୟକ୍ତିଗତ ସମ୍ପର୍କ ଓ ସେଠାକାର ଲୋକଙ୍କ ସହ ଅନୁଭୂତି ବିଷୟରେ କହିଛନ୍ତି। ଏହି ସମୟରେ ପାକିସ୍ତାନୀ ମୁସଲମାନ ଏବଂ ଦୁବାଇର ମୁସଲମାନଙ୍କୁ ନେଇ ତାଙ୍କ ଏକ ମନ୍ତବ୍ୟ ଚର୍ଚ୍ଚାକୁ ଆସିଛି।
ପାକିସ୍ତାନ ବିଷୟରେ ମିକା କହିଛନ୍ତି ଯେ, ପାକିସ୍ତାନ କିମ୍ବା ସେଠାରେ ରହୁଥିବା ଲୋକମାନେ ସ୍ୱଭାବତଃ ଖରାପ ବୋଲି ସେ ଭାବନ୍ତି ନାହିଁ । ୨୦୧୯ରେ ପାକିସ୍ତାନ ଯାତ୍ରା ସମୟର ଅନୁଭୂତିକୁ ମନେ ପକାଇ ସେ ସେଠାକାର ଲୋକଙ୍କ ଆତିଥ୍ୟ ଓ ବ୍ୟବହାର ବିଷୟରେ କହିଛନ୍ତି। ପାକିସ୍ତାନରେ ତାଙ୍କୁ ଏଭଳି ଅନେକ ମୁସଲିମ୍ ଲୋକ ମିଳିଥିଲେ, ଯେଉଁମାନେ ଗୁରୁଦ୍ୱାରର ଯତ୍ନ ନେବା ସହ ପରିଷ୍କାର ପରିଚ୍ଛନ୍ନତା ଭଳି କାମରେ ମଧ୍ୟ ସହଯୋଗ କରିଥିଲେ। ସେମାନଙ୍କୁ ନିଜ ଭାଇ ଭଳି ମନେ କରନ୍ତି ବୋଲି ମିକା କହିଛନ୍ତି।
ମିକା ସିଂ କହିଛନ୍ତି ଯେ, ଭାରତରେ ପାକିସ୍ତାନୀ ମୁସଲିମ୍ଙ୍କୁ ନେଇ ଲୋକଙ୍କ ଧାରଣା ଭିନ୍ନ କାହିଁକି ରହିଛି, ତାହା ସେ ବୁଝିପାରନ୍ତି ନାହିଁ। ଅନ୍ୟପଟେ ଦୁବାଇର ମୁସଲିମ୍ଙ୍କୁ ନେଇ ଲୋକଙ୍କ ଧାରଣା ଅଲଗା ବୋଲି ସେ ଉଲ୍ଲେଖ କରିଛନ୍ତି। ତାଙ୍କ ଏହି ମନ୍ତବ୍ୟ ଏବେ ଚର୍ଚ୍ଚାର କାରଣ ପାଲଟିଛି । ବିଶେଷକରି ଭାରତ-ପାକିସ୍ତାନ ସମ୍ପର୍କକୁ ନେଇ ସମ୍ବେଦନଶୀଳ ପରିସ୍ଥିତି ମଧ୍ୟରେ ମିକାଙ୍କ ଏହି ବୟାନ ଆସିଛି।ପାକିସ୍ତାନ ସହ ନିଜର ସମ୍ପର୍କ କେବଳ କାମ କିମ୍ବା ପାରିଶ୍ରମିକ ପାଇଁ ନୁହେଁ ବୋଲି ମିକା କହିଛନ୍ତି। ପାକିସ୍ତାନରେ ଥିବା ଶିଖ୍ ଧର୍ମର ପ୍ରମୁଖ ତୀର୍ଥସ୍ଥଳୀ ତାଙ୍କ ପାଇଁ ବିଶେଷ ମହତ୍ତ୍ୱ ରଖେ।
ପଡ୍କାଷ୍ଟରେ ପାକିସ୍ତାନୀ କଳାକାରଙ୍କ ଭାରତ ଆସିବା ଓ ସେମାନଙ୍କ ସହ କାମ କରିବାକୁ ନେଇ ମଧ୍ୟ ମିକାଙ୍କୁ ପ୍ରଶ୍ନ କରାଯାଇଥିଲା। ସେ କହିଛନ୍ତି ଯେ, ପାକିସ୍ତାନୀ ଗାୟକମାନେ ଭାରତ ଆସିଲେ ତାଙ୍କର କୌଣସି ଆପତ୍ତି ନାହିଁ। ତାଙ୍କ ଅନୁସାରେ, ଅନେକ ପାକିସ୍ତାନୀ କଳାକାର ଭାରତ ଆସିଛନ୍ତି ଏବଂ ବଲିଉଡ୍ରେ ସେମାନଙ୍କୁ ସମ୍ମାନ ମଧ୍ୟ ମିଳିଛି। ତେବେ କୌଣସି କଳାକାର ବ୍ୟକ୍ତିଗତ କାର୍ଯ୍ୟକ୍ରମ ପାଇଁ ପାକିସ୍ତାନ ଯିବା ଓ ତାହାକୁ ସାର୍ବଜନୀନ ଭାବେ ପ୍ରଚାର କରିବା ଦୁଇଟି ଭିନ୍ନ ବିଷୟ ବୋଲି ସେ କହିଛନ୍ତି।
ମିକା ସିଂ ୨୦୧୯ରେ ପାକିସ୍ତାନର କରାଚିରେ ଏକ ବିବାହ ପୂର୍ବ କାର୍ଯ୍ୟକ୍ରମରେ ପରଫର୍ମ କରିଥିଲେ । ସେହି ସମୟରେ ଭାରତ-ପାକିସ୍ତାନ ମଧ୍ୟରେ ତିକ୍ତତା ଜାରି ରହିଥିବାରୁ ମିକାଙ୍କ ପାକିସ୍ତାନ ଯାତ୍ରା ଓ ପରଫର୍ମାନ୍ସକୁ ନେଇ ଭାରତରେ ବିବାଦ ସୃଷ୍ଟି ହୋଇଥିଲା।ଏହାପରେ ଅଲ୍ ଇଣ୍ଡିଆ ସିନେ ୱାର୍କର୍ସ ଆସୋସିଏସନ୍ ଏବଂ ଫେଡେରେସନ୍ ଅଫ୍ ୱେଷ୍ଟର୍ନ ଇଣ୍ଡିଆ ସିନେ ଏମ୍ପ୍ଲୟିଜ୍ ପକ୍ଷରୁ ମିକାଙ୍କ ବିରୋଧରେ ପଦକ୍ଷେପ ନିଆଯାଇଥିଲା। ପରେ ମିକା ସିଂ ସାର୍ବଜନୀନ ଭାବେ କ୍ଷମା ମାଗିଥିଲେ। ଏହାପରେ ତାଙ୍କ ଉପରେ ଲାଗିଥିବା ବ୍ୟାନ୍ ହଟାଯାଇଥିଲା। ପାକିସ୍ତାନ, ସେଠାକାର ଲୋକ ଏବଂ ଦୁଇ ଦେଶର କଳାକାରଙ୍କ ସମ୍ପର୍କକୁ ନେଇ ମିକା ସିଂହଙ୍କ ଏହି ନୂଆ ବୟାନ ଏବେ ମନୋରଞ୍ଜନ ଜଗତରେ ଚର୍ଚ୍ଚାର ବିଷୟ ହୋଇଛି ।
