ନୂଆଦିଲ୍ଲୀ, ୨ା୭: ହ୍ୱାଟସଆପର ନୂତନ ୟୁଜରନେମ୍ ଫିଚରକୁ ନେଇ ବିବାଦ ଦେଖାଯାଇଥିବା ବେଳେ ମେଟା ସ୍ପଷ୍ଟୀକରଣ ଦେଇଛି । କମ୍ପାନୀ କହିଛି ଯେ ସରକାରଙ୍କ ଦ୍ୱାରା ଉଠାଯାଇଥିବା ଆଶଙ୍କାକୁ ଦୂର କରିବା ପାଇଁ ବହୁସ୍ତରୀୟ ସୁରକ୍ଷା ବ୍ୟବସ୍ଥା ପୂର୍ବରୁ ଗ୍ରହଣ କରାଯାଇଛି। ମେଟା ଦାବି କରିଛି ଯେ ୟୁଜରନେମ୍ ଫିଚରରେ ପରିଚୟ ଚୋରି ଏବଂ ଅନଲାଇନ୍ ଠକେଇକୁ ପ୍ରଭାବଶାଳୀ ଭାବରେ ରୋକିବା ପାଇଁ ଡିଜାଇନ୍ କରାଯାଇଥିବା ଅନେକ ବ୍ୟବସ୍ଥା ଅନ୍ତର୍ଭୁକ୍ତ କରାଯାଇଛି।
ରିପୋର୍ଟ ଅନୁଯାୟୀ, ଜଣେ WhatsApp ମୁଖପାତ୍ର କହିଛନ୍ତି ଯେ ସାଧାରଣ ବ୍ୟକ୍ତି, ସରକାରୀ ପ୍ରତିଷ୍ଠାନ ଏବଂ ସେଲିବ୍ରିଟିଙ୍କ ନାମ ସଂରକ୍ଷିତ ରଖାଯାଇଛି ଯାହା ଦ୍ୱାରା କେବଳ ସେମାନଙ୍କର ବୈଧ ମାଲିକମାନେ ସେଗୁଡ଼ିକୁ ବ୍ୟବହାର କରିପାରିବେ। ଏହା ବ୍ୟତୀତ, ଏହି ନାମଗୁଡ଼ିକ ସଦୃଶ ୟୁଜରନେମ୍ ମଧ୍ୟ ସଂରକ୍ଷିତ ରଖାଯାଇଛି ଯାହା ଦ୍ୱାରା କେହି ନକଲି ଆକାଉଣ୍ଟ ତିଆରି କରି ଲୋକଙ୍କୁ ଭ୍ରମିତ କରିପାରିବେ ନାହିଁ।
ହ୍ୱାଟ୍ସଆପର ମୂଳ କମ୍ପାନୀ ମେଟା ଘୋଷଣା କରିଛି ଯେ ନୂତନ ୟୁଜରନେମ୍ ଫିଚରଟି ବ୍ୟବହାରକାରୀମାନଙ୍କୁ ସେମାନଙ୍କର ମୋବାଇଲ୍ ନମ୍ବର ସେୟାର ନକରି ପରସ୍ପର ସହିତ ସଂଯୋଗ କରିବାକୁ ଅନୁମତି ଦେବା ପାଇଁ ଡିଜାଇନ୍ କରାଯାଇଛି। ଏହାର ଲକ୍ଷ୍ୟ ହେଉଛି ବ୍ୟବହାରକାରୀଙ୍କ ଗୋପନୀୟତାକୁ ଆହୁରି ବୃଦ୍ଧି କରିବା। ତଥାପି, କମ୍ପାନୀ ସ୍ପଷ୍ଟ କରିଛି ଯେ ପୂର୍ବ ପରି ହ୍ୱାଟ୍ସଆପ୍ ବ୍ୟବହାର କରିବା ପାଇଁ ଏକ ମୋବାଇଲ୍ ନମ୍ବର ଆବଶ୍ୟକ ହେବ; ୟୁଜରନେମ୍ କେବଳ କଥାବାର୍ତ୍ତା ଆରମ୍ଭ କରିବା ପାଇଁ ଏକ ଅତିରିକ୍ତ ବିକଳ୍ପ ଭାବରେ କାର୍ଯ୍ୟ କରିବ। ୟୁଜରନେମ୍ ଫିଚରଟି ସମସ୍ତ ୟୁଜରଙ୍କ ପାଇଁ ଏକକାଳୀନ ରୋଲ୍ ଆଉଟ୍ କରାଯିବ ନାହିଁ ବରଂ ପର୍ଯ୍ୟାୟକ୍ରମେ କାର୍ଯ୍ୟକାରୀ କରାଯିବ। ବର୍ତ୍ତମାନ, କିଛି ୟୁଜରଙ୍କୁ ସେମାନ ପସନ୍ଦର ୟୁଜରନେମ୍ ଚୟନ କରିବାକୁ କୁହାଯାଉଛି ।
ହ୍ୱାଟ୍ସଆପ୍ ଅନୁଯାୟୀ, ସିଷ୍ଟମରେ ନକଲି ପରିଚୟ, ଠକେଇ ଏବଂ ଅପବ୍ୟବହାରର ଢାଞ୍ଚା ଚିହ୍ନଟ କରିବା ପାଇଁ ଡିଜାଇନ୍ କରାଯାଇଥିବା ଅନେକ ସୁରକ୍ଷା ବ୍ୟବସ୍ଥା ଅନ୍ତର୍ଭୁକ୍ତ କରାଯାଇଛି, ଆବଶ୍ୟକ ହେଲେ ସେମାନଙ୍କୁ ତୁରନ୍ତ ବ୍ଲକ କରାଯିବ । କମ୍ପାନୀ ଉଲ୍ଲେଖ କରିଛି ଯେ ନୂତନ ଆକାଉଣ୍ଟଗୁଡ଼ିକୁ କେବଳ ସୀମିତ ସଂଖ୍ୟକ ନୂତନ ଲୋକଙ୍କ ସହିତ ଯୋଗାଯୋଗ କରିବାକୁ ଅନୁମତି ଦିଆଯିବ।
