ନୂଆଦିଲ୍ଲୀ,୧୭।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିନ ଅବସରରେ ରୁଷିଆରୁ ଆସିଛି ଶୁଭେଚ୍ଛା ବାର୍ତ୍ତା। ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ୍ ପ୍ରଧାନମନ୍ତ୍ରୀ ମୋଦିଙ୍କୁ ଜନ୍ମଦିନର ଶୁଭକାମନା ଜଣାଇବା ସହ ତାଙ୍କ ନେତୃତ୍ୱ, ରାଜନୈତିକ ଜ୍ଞାନ ଓ ଦୂରଦର୍ଶିତାର ପ୍ରଶଂସା କରିଛନ୍ତି ।
ପୁଟିନ୍ କହିଛନ୍ତି, ଭାରତୀୟଙ୍କ ମଧ୍ୟରେ ମୋଦିଙ୍କର ଉଚ୍ଚ ସମ୍ମାନ ରହିଛି ଏବଂ ବିଶ୍ୱ ମଞ୍ଚରେ ମଧ୍ୟ ତାଙ୍କର ବଡ଼ ପ୍ରଭାବ ରହିଛି । ଭାରତ-ରୁଷିଆ ମଧ୍ୟରେ ରହିଥିବା ରଣନୈତିକ ଭାଗିଦାରିକୁ ମଜବୁତ କରିବାରେ ମୋଦିଙ୍କ ଅବଦାନକୁ ଶବ୍ଦରେ ବର୍ଣ୍ଣନା କରିବା କଷ୍ଟକର ବୋଲି ସେ କହିଛନ୍ତି। ଗତ ସପ୍ତାହରେ ନୂଆଦିଲ୍ଲୀ ଗସ୍ତ ସମୟରେ ମିଳିଥିବା ଉତ୍ତମ ସ୍ୱାଗତ ଓ ଆତିଥ୍ୟ ପାଇଁ ମଧ୍ୟ ପୁଟିନ୍ ଧନ୍ୟବାଦ ଜଣାଇଛନ୍ତି । ଦୁଇ ନେତାଙ୍କ ମଧ୍ୟରେ ହୋଇଥିବା ଆଲୋଚନାକୁ ସେ ଗୁରୁତ୍ୱପୂର୍ଣ୍ଣ ବୋଲି କହିବା ସହ ଏହାର ଫଳାଫଳ ମଧ୍ୟ ମିଳିଥିବା ଉଲ୍ଲେଖ କରିଛନ୍ତି।
ମୋଦିଙ୍କ ସହ ଆଲୋଚନା କରିବା ସବୁବେଳେ ତାଙ୍କ ପାଇଁ ସୁଖଦ ଅନୁଭୂତି ବୋଲି ପୁଟିନ୍ କହିଛନ୍ତି। ଆଲୋଚନା ତାଙ୍କର ରାଜନୈତିକ ଜ୍ଞାନ ଓ ଦୂରଦର୍ଶିତାକୁ ପୁଣିଥରେ ପ୍ରମାଣିତ କରିଛି ବୋଲି ସେ ମତ ଦେଇଛନ୍ତି । ମିତ୍ର ଦେଶଗୁଡ଼ିକ ପାଇଁ ରୁଷିଆ ନିଜର ସହଯୋଗ ଜାରି ରଖିବ ବୋଲି ମଧ୍ୟ ପୁଟିନ୍ କହିଛନ୍ତି।
ସୂଚନାଯୋଗ୍ୟ, ନୂଆଦିଲ୍ଲୀରେ ବ୍ରିକ୍ସ ସମିଟ୍ ୨୦୨୬ ସମୟରେ ପ୍ରଧାନମନ୍ତ୍ରୀ ମୋଦି ଓ ରାଷ୍ଟ୍ରପତି ପୁଟିନଙ୍କ ମଧ୍ୟରେ ଦ୍ୱିପାକ୍ଷିକ ବୈଠକ ହୋଇଥିଲା। ଏହି ସମୟରେ ଦୁଇ ଦେଶ ମଧ୍ୟରେ ବିଭିନ୍ନ ପ୍ରସଙ୍ଗରେ ଆଲୋଚନା ସହ ଏକାଧିକ ବୁଝାମଣା ହୋଇଥିବା ଜଣାପଡ଼ିଥିଲା। ଏହି ବୈଠକକୁ ଭାରତ-ରୁଷିଆ ସମ୍ପର୍କ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ବୋଲି ଦେଖାଯାଇଥିଲା।
