ଭୁବନେଶ୍ୱର,୧୨ା୫(ବ୍ୟୁରୋ): ଦ୍ୱାରଶୁଣୀ ଘାଟି ମୟୂରଭଞ୍ଜ ଜିଲାର ବିପଦପୂର୍ଣ୍ଣ ସ୍ଥାନ। ପ୍ରତି ମାସରେ ଏଠି ୨ରୁ ୩ଟି ଦୁର୍ଘଟଣା ଘଟୁଛି। ଡିଆର୍ଏସ୍ସି ବୈଠକରେ ଏହି ସମସ୍ୟା ଉପରେ ନିୟମିତ ଆଲୋଚନା ହେଉଛି। ହେଲେ ଏନ୍ଏଚ୍ଏଆଇ ପକ୍ଷରୁ ଏନେଇ ଅସହଯୋଗ କରାଯାଉଛି। ଡିଆର୍ଏସ୍ସି ବୈଠକରେ ଯୋଗଦେବା ପାଇଁ ଡକାଯିବା ସତ୍ତ୍ବେ ଏନ୍ଏଚ୍ଏଆଇ, ବାଲେଶ୍ୱର ପିଡି ନିଜେ ଯୋଗ ଦେଉନାହାନ୍ତି କିମ୍ବା ତାଙ୍କର ପ୍ରତିନିଧିଙ୍କୁ ମଧ୍ୟ ପଠାଉନାହାନ୍ତି। ଏହା ସଡ଼କ ସୁରକ୍ଷା ଦିଗରେ ଏନ୍ଏଚ୍ଏଆଇର ଅବହେଳା ମନୋଭାବକୁ ଦର୍ଶାଉଛି। ମୟୂରଭଞ୍ଜ ଜିଲାପାଳଙ୍କ ଚିଠିକୁ ଆଧାରକରି ଏନେଇ ବାଣିଜ୍ୟ ଓ ପରିବହନ ବିଭାଗ ପ୍ରମୁଖ ସଚିବ ବିଷ୍ଣୁପଦ ସେଠୀ ଜାତୀୟ ରାଜପଥ ପ୍ରାଧିକରଣର ଚିଫ୍ ଜେନେରାଲ ମ୍ୟାନେଜର ଏବଂ ଆର୍ଓଙ୍କୁ ଚିଠି ଲେଖି ଏ ବାବଦରେ ମଙ୍ଗଳବାର ଅବଗତ କରାଇଛନ୍ତି। ଏଥିସହ ଦ୍ୱାରଶୁଣୀ ଘାଟିକୁ ସର୍ଭେ ପାଇଁ ବୈଷୟିକ ଅଧିକାରୀ ଏବଂ ଏନ୍ଏଚ୍ଏଆଇ, ବାଲେଶ୍ୱର ପିଡିଙ୍କୁ ନିର୍ଦ୍ଦେଶ ଦେବାକୁ ସେ ଅନୁରୋଧ କରିଛନ୍ତି।
ସଚିବ ସେଠୀ ତାଙ୍କ ଚିଠିରେ ଲେଖିଛନ୍ତି, ସଡ଼କ ଦୁର୍ଘଟଣା ଏବଂ ଏଥିଜନିତ ମୃତ୍ୟୁ କମାଇବା ଆମ ସମସ୍ତଙ୍କ ପାଇଁ ଚିନ୍ତାର ବିଷୟ। ଗତ ଦଶନ୍ଧିରେ ରାଜ୍ୟରେ ପ୍ରାୟ ୪୫ ହଜାର ଲୋକ ସଡ଼କ ଦୁର୍ଘଟଣାରେ ପ୍ରାଣ ହରାଇଛନ୍ତି। ମୃତକଙ୍କ ମଧ୍ୟରେ ଅନେକ ଯୁବ ଏବଂ ସେମାନେ ପରିବାରର ରୋଜଗାରିଆ ଥିଲେ। ସଡ଼କ ସୁରକ୍ଷା ଦୃଷ୍ଟିରୁ ମୟୂରଭଞ୍ଜ ଅତ୍ୟନ୍ତ ସମ୍ବେଦନଶୀଳ ଜିଲା। ୨୦୨୧ରେ ଜିଲାରେ ୫୪୦ ଦୁର୍ଘଟଣା ଘଟିଥିବାବେଳେ ଏଥିରେ ୩୧୨ ଲୋକଙ୍କ ଜୀବନ ଯାଇଛି। ୨୦୧୭-୧୯ ଦୁର୍ଘଟଣା ତଥ୍ୟ ଅନୁସାରେ ଜିଲାରେ ୧୩ଟି ବ୍ଲାକ୍ସ୍ପଟ୍ ରହିଥିବା ଚିହ୍ନଟ ହୋଇଛି। ମୟୂରଭଞ୍ଜ ଜିଲାପାଳଙ୍କ ସୂଚନାନୁଯାୟୀ ଡିଆର୍ଏସ୍ସି ବୈଠକରେ ଏ ସମସ୍ୟା ଉପରେ ନିୟମିତ ଆଲୋଚନା କରାଯାଉଛି। ହେଲେ ଏନ୍ଏଚ୍ଏଆଇର ବାଲେଶ୍ୱର ପିଡି ଏହି ବୈଠକରେ ଯୋଗ ନ ଦେଇ ତାଙ୍କର ଅସହଯୋଗ ମନୋଭାବକୁ ଦର୍ଶାଉଛନ୍ତି। ନିୟମିତ ଭାବେ ଡିଆର୍ଏସ୍ସି ବୈଠକ ପାଇଁ ସୁପ୍ରିମକୋର୍ଟ କମିଟି ଗୁରୁତ୍ୱ ଦେଇଛନ୍ତି। ବାଲେଶ୍ୱରର ଏନ୍ଏଚ୍ଏଆଇ ପିଡିଙ୍କ ତରଫରୁ ବୈଠକରେ ଯୋଗ ଦେଇଥିବା ପ୍ରତିନିଧି ୪ ଥାକିଆ କାମ ନ ସରିବା ଯାଏ ରାସ୍ତାର ମରାମତି ନେଇ ଅକ୍ଷମତା ପ୍ରକାଶ କରିଛନ୍ତି। ମୟୂରଭଞ୍ଜ ଆର୍ଟିଓଙ୍କ ଦ୍ୱାରା ଦ୍ୱାରଶୁଣୀ ଘାଟି ଉପରେ ଏକ ସର୍ଭେ କରାଯାଇଥିଲା ଏବଂ ବିଭିନ୍ନ ସ୍ଥାନରୁ ଫଟୋଗ୍ରାଫ୍ ନିଆଯାଇଥିଲା। ଏଗୁଡ଼ିକ ଅବଗତି ନିମନ୍ତେ ସଂଲଗ୍ନ କରାଯାଇଛି। ଫଟୋଗ୍ରାଫ୍ରୁ ସ୍ପଷ୍ଟ ଭାବେ ଜଣାଯାଉଛି ଯେ, ସେଠାରେ ବହୁ ଗର୍ତ୍ତ ଓ ବିପଦପୂର୍ଣ୍ଣ ରୋଡ୍ ସୋଲ୍ଡର ରହିଛି। ରାସ୍ତାରେ କୌଣସି ଡ୍ୟାମେଜ୍ କ୍ରାସ୍ ବ୍ୟାରିଅର ନ ଥିବାବେଳେ ସାଇନେଜ୍ କିମ୍ବା ରିଫ୍ଲେକ୍ଟିଭ୍ ଟେପ୍ ଆଦି ନାହିଁ। ସଡ଼କର ଘୋର ଅବ୍ୟବସ୍ଥା ଏହି ଫଟୋରେ ଦେଖାଯାଉଛି। ଜିଲାର ଏହି ଗୁରୁତ୍ୱପୂର୍ଣ୍ଣ ଘାଟି ରାସ୍ତାର ବିସ୍ତାର ଅତ୍ୟନ୍ତ ନିମ୍ନସ୍ତରର। ସଡ଼କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ରାଜ୍ୟରେ ଦୁର୍ଘଟଣା ଏବଂ ମୃତ୍ୟୁ କମାଇବା ଉପରେ ରାଜ୍ୟ ସରକାର ଗୁରୁତ୍ୱ ଦେଉଛନ୍ତି। ଏହି ପରିପ୍ରେକ୍ଷୀରେ ଦ୍ୱାରଶୁଣୀ ଘାଟି ପରିଦର୍ଶନ ସର୍ଭେ ପାଇଁ ବୈଷୟିକ ଅଧିକାରୀ ଏବଂ ଏନ୍ଏଚ୍ଏଆଇ, ବାଲେଶ୍ୱର ପିଡିଙ୍କୁ ନିର୍ଦ୍ଦେଶ ଦେବାକୁ ପ୍ରମୁଖ ସଚିବ ସେଠୀ ଚିଠି ମାଧ୍ୟମରେ ଅନୁରୋଧ କରିଛନ୍ତି। ଏହାସହ ମୟୂରଭଞ୍ଜ ଜିଲାପାଳ, ଆର୍ଟିଓଙ୍କ ସହ ପରାମର୍ଶ କରି ତ୍ରୁଟି ଚିହ୍ନଟ ସହ ଏହାକୁ ସୁଧାରିବା ପାଇଁ ନିର୍ଦ୍ଦେଶ ଦିଆଯାଉ ବୋଲି ସେ କହିଛନ୍ତି।
