ନୂଆଦିଲ୍ଲୀ,୧୦।୭: ବାଂଲାଦେଶ ଅଲରାଉଣ୍ଡର ମହମୁଦୁଲ୍ଲାଙ୍କ ଗୋଟିଏ ନିଷ୍ପତ୍ତି କ୍ରିକେଟଜଗତକୁ ସ୍ତବ୍ଧ କରିଦେଇଛି। ସେ ହଠାତ୍ ଟେଷ୍ଟ କ୍ରିକେଟରୁ ଅବସର ଘୋଷଣା କରିଛନ୍ତି। ବାଂଲାଦେଶ ଏବଂ ଜିମ୍ବାଓ୍ବେ ମଧ୍ୟରେ ଚାଲିଥିବା ଗୋଟିଏ ମାତ୍ର ଟେଷ୍ଟ ଶେଷ ହେବା ପରେ ଏହି କ୍ରିକେଟର ଟେଷ୍ଟ ଫର୍ମାଟରୁ ବିଦାୟ ନେବେ। ତେବେ ଦୁଇଦିନ ପୂର୍ବେ ଅର୍ଥାତ ଗୁରୁବାର ସେ ନିଜ କ୍ୟାରିୟରର ଶ୍ରେଷ୍ଠ ଇନିଂସ ଖେଳିଥିବା ବେଳେ ଦୁଇଦିନ ପରେ ତାଙ୍କର ଏଭଳି ଘୋଷଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
କହିରଖୁଛୁ, ମହମୁଦୁଲ୍ଲା ଜିମ୍ବାଓ୍ବେ ବିପକ୍ଷରେ ୧୫୦ରନ୍ର ଅପରାଜିତ ଇନିଂସ ଖେଳିଥିଲେ। ଏହା ତାଙ୍କ ଟେଷ୍ଟ କ୍ୟାରିୟରର ସର୍ବେତ୍ତମ ଇନିଂସ ଥିଲା। ମୋଟାମୋଟି ଦେଖଇଲେ ସେ ଖେଳିଥିବା ଟେଷ୍ଟ ମ୍ୟାଚ୍ର ୯୪ ପାଳିରେ ୨୯୧୪ରନ୍ କରିଛନ୍ତି। ଏହାଛଡ଼ା ସେ ୪୩ ଉଇକେଟ ମଧ୍ୟ ନେଇଛନ୍ତି। ସେ ୨୦୦୯ରେ ଟେଷ୍ଟ ଡେବ୍ୟୁ କରିଥିଲେ।
ମହମୁଦୁଲ୍ଲାଙ୍କ ଏଭଳି ନିଷ୍ପତ୍ତିକୁ ନେଇ ଆଶ୍ଚର୍ଯ୍ୟ ପ୍ରକଟ କରିଛନ୍ତି ବାଂଲାଦେଶ କ୍ରିକେଟ ବୋର୍ଡ(ବିସିବି) ସଭାପତି ନଜମୁଲ ହାସନ। ଏକ ସାକ୍ଷାତକାରରେ ସେ କହିଛନ୍ତି କିଏ ବି ଆଧିକାରୀକ ଭାବେ ମୋତେ କିଛି କହିନାହାନ୍ତି। କିନ୍ତୁ ଜଣେ ମୋତେ ଫୋନ କରି ମହମୁଦୁଲ୍ଲା ବର୍ତ୍ତମାନର ଟେଷ୍ଟ ମ୍ୟାଚ୍ ପରେ ଟେଷ୍ଟ କ୍ରିକେଟ ଖେଳିବାକୁ ଚାହୁଁନାହାନ୍ତି। ସେ ଏହି କଥା ଡ୍ରେସିଂ ରୁମ୍ରେ ଥିବା ସମସ୍ତଙ୍କୁ କହିଛନ୍ତି ବୋଲି କହିଥିଲେ। ମ୍ୟାଚ୍ ସରି ନ ଥିବା ଯୋଗୁ ଏହା ଅସାଧାରଣ ବୋଲି ଲାଗିଲା। ପୂର୍ବରୁ ସେ ତିନୋଟି ଫର୍ମାଟରେ ଖେଳିବାକୁ ଇଚ୍ଛା ରଖିଥିଲେ। ଏଥିପାଇଁ ତାଙ୍କୁ ଟେଷ୍ଟ ଦଳରେ ଅନ୍ତର୍ଭୁକ୍ତ କରାଯାଇଥିଲା। ହେଲେ ସେ ବର୍ତ୍ତମାନ ଅବସର ବିଷୟରେ କହି ଚକିତ କରିଛନ୍ତି ବୋଲି ସେ କହିଛନ୍ତି।
