ନୂଆଦିଲ୍ଲୀ,୨୩।୮: ଦେଶର ଘରୋଇ ରୋଷେଇ ଗ୍ୟାସ ବ୍ୟବସ୍ଥାରେ ବଡ଼ ପରିବର୍ତ୍ତନ ଆଣିବା ଦିଗରେ କେନ୍ଦ୍ର ସରକାର ପଦକ୍ଷେପ ନେଉଛନ୍ତି । ଯେଉଁ ଅଞ୍ଚଳରେ ପୂର୍ବରୁ PNG (Piped Natural Gas) ପାଇପଲାଇନ୍ ନେଟୱର୍କ ଉପଲବ୍ଧ ଅଛି, ସେଠାରେ ଘରୋଇ ଉପଭୋକ୍ତାଙ୍କୁ LPG ସିଲିଣ୍ଡର ବଦଳରେ ପାଇପ୍ ଯୋଗେ ଗ୍ୟାସ ବ୍ୟବହାର ଦିଗରେ ନେବାକୁ ଯୋଜନା କରାଯାଉଛି ।
ଏଥିପାଇଁ ପେଟ୍ରୋଲିୟମ ମନ୍ତ୍ରଣାଳୟ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ଜିଲାସ୍ତରରେ ନୋଡାଲ ଅଧିକାରୀ ନିଯୁକ୍ତ କରିବାକୁ ନିର୍ଦ୍ଦେଶ ଦେଇଥିବା ଖବର ପ୍ରକାଶ ପାଇଛି । ଗ୍ୟାସ ବିତରଣ କମ୍ପାନୀ ଓ ତୈଳ କମ୍ପାନୀଗୁଡ଼ିକ ମଧ୍ୟରେ ସମନ୍ୱୟ ବଢ଼ାଇ ଅଧିକରୁ ଅଧିକ ଘରକୁ PNG ସଂଯୋଗ ଦେବା ଏହାର ମୁଖ୍ୟ ଉଦ୍ଦେଶ୍ୟ। ପ୍ରସ୍ତାବିତ ବ୍ୟବସ୍ଥା ଅନୁଯାୟୀ, ଯେଉଁ ଅଞ୍ଚଳରେ PNG ନେଟୱର୍କ ଉପଲବ୍ଧ ଅଛି, ସେଠାରେ ଉପଭୋକ୍ତାଙ୍କ ପାଖରେ ଏକାସାଙ୍ଗେ LPG ସିଲିଣ୍ଡର ଓ PNG ସଂଯୋଗ ରହିବା ଉପରେ ନିୟନ୍ତ୍ରଣ ଆସିପାରେ । ଯଦି କୌଣସି ଅଞ୍ଚଳରେ PNG ପାଇପଲାଇନ୍ ଉପଲବ୍ଧ ଥିବା ସତ୍ତ୍ୱେ ଉପଭୋକ୍ତାଙ୍କୁ ନୋଟିସ୍ ଦେବା ପରେ ମଧ୍ୟ ସେ PNG ସଂଯୋଗ ପାଇଁ ଆବେଦନ ନକରନ୍ତି, ତେବେ ତାଙ୍କ LPG ସିଲିଣ୍ଡର ଯୋଗାଣ ବନ୍ଦ ହୋଇପାରେ ବୋଲି ରିପୋର୍ଟରେ କୁହାଯାଇଛି । ତେବେ ଏହି ବ୍ୟବସ୍ଥା କେବଳ PNG ପାଇପଲାଇନ୍ ବାସ୍ତବରେ ଉପଲବ୍ଧ ଥିବା ଅଞ୍ଚଳ ପାଇଁ ଲାଗୁ ହେବ।
PNG ସଂଯୋଗ ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ପ୍ରତ୍ୟେକ ଜିଲାରେ ‘PNG କୋଅର୍ଡିନେସନ କମିଟି’ (PCC) ଗଠନ କରାଯିବାର ବ୍ୟବସ୍ଥା ରହିଛି । ଏହି କମିଟି ହାଉସିଂ ସୋସାଇଟି, ମହଲ୍ଲା ଓ ଅନ୍ୟାନ୍ୟ ଅଞ୍ଚଳ ଚିହ୍ନଟ କରିବା ସହ ଲୋକଙ୍କୁ PNG ସଂଯୋଗ ସମ୍ପର୍କରେ ସଚେତନ କରିବ ।ଏଥିସହ ନୂଆ PNG କନେକ୍ସନ୍ ନେବା ପ୍ରକ୍ରିୟାକୁ ସହଜ ଓ ଦ୍ରୁତ କରିବା ଉପରେ ମଧ୍ୟ ଗୁରୁତ୍ୱ ଦିଆଯିବ । ସରକାରଙ୍କ ଯୁକ୍ତି ଅନୁଯାୟୀ, PNG ଘରୋଇ ରୋଷେଇ ପାଇଁ ସୁବିଧାଜନକ ଏବଂ LPG ସିଲିଣ୍ଡର ତୁଳନାରେ ଅନେକ କ୍ଷେତ୍ରରେ ଅଧିକ ସୁରକ୍ଷିତ ଓ ଖର୍ଚ୍ଚସାଧ୍ୟ ହୋଇପାରେ । ଏହାଛଡ଼ା LPG ଚାହିଦାର ଏକ ଅଂଶ ଆମଦାନୀ ଉପରେ ନିର୍ଭରଶୀଳ ଥିବାରୁ ଆନ୍ତର୍ଜାତିକ ସଙ୍କଟ କିମ୍ବା ସମୁଦ୍ରପଥରେ ବାଧା ସୃଷ୍ଟି ହେଲେ ଯୋଗାଣ ପ୍ରଭାବିତ ହୋଇପାରେ।
ଅନ୍ୟପକ୍ଷରେ, ଘରୋଇ PNG ଯୋଗାଣରେ ଦେଶରେ ଉତ୍ପାଦିତ ପ୍ରାକୃତିକ ଗ୍ୟାସକୁ ପ୍ରାଥମିକତା ଦିଆଯାଏ । ଏହା ଦ୍ୱାରା ବିଶ୍ୱସ୍ତରୀୟ ଯୋଗାଣ ବ୍ୟାଘାତର ପ୍ରଭାବ କମାଇବା ସହ ଗ୍ୟାସ ଯୋଗାଣ ବ୍ୟବସ୍ଥାକୁ ଅଧିକ ସ୍ଥିର କରିବା ଲକ୍ଷ୍ୟ ରହିଛି । ସହରାଞ୍ଚଳରେ ନିର୍ମାଣ ହୋଇସାରିଥିବା ଗ୍ୟାସ ପାଇପଲାଇନ୍ ଭିତ୍ତିଭୂମିର ସର୍ବାଧିକ ବ୍ୟବହାର କରିବା, LPG ସିଲିଣ୍ଡର ପରିବହନ ଓ ବିତରଣ ସହ ଜଡ଼ିତ ଲଜିଷ୍ଟିକ୍ସ ଖର୍ଚ୍ଚ କମାଇବା ଏବଂ ଅଧିକ ଘରକୁ ପାଇପ୍ ଯୋଗେ ଗ୍ୟାସ ପହଞ୍ଚାଇବା ସରକାରଙ୍କ ମୁଖ୍ୟ ଲକ୍ଷ୍ୟ ବୋଲି ରିପୋର୍ଟରେ ଦର୍ଶାଯାଇଛି ।
