ବ୍ରହ୍ମପୁର,୨୧ା୬(ସୁବାସ ଚନ୍ଦ୍ର ପାଢ଼ୀ ): ଅସୁସ୍ଥ ପ୍ରେମିକାଙ୍କୁ ଏମ୍କେସିଜି ମେଡିକାଲରେ ଛାଡି ପଳାଇଥିବା ଯୁବକ ବ୍ରହ୍ମପୁର ଶ୍ରୀରାମନଗର ୧୦ମ ଲାଇନର ତ୍ରିନାଥ ସାହୁ(୩୦)ଙ୍କୁ ବଡବଜାର ଥାନା ପୋଲିସ ଗିରଫ କରିଛି। ପୀଡ଼ିତା ମହିଳା ଓ ଅଭିଯୁକ୍ତଙ୍କ ଡାକ୍ତରୀ ମାଇନା କରାଯିବା ସହ ପୋଷାକ ଜବତ ହୋଇଛି। ବିବାହ ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖି ପ୍ରତାରଣା କରିବା ଅଭିଯୋଗରେ ପୋଲିସ ତ୍ରିନାଥଙ୍କୁ ମାମଲା ନଂ.୪୩୧/୨୬ରେ ରବିବାର କୋର୍ଟ ଚାଲାଣ କରିଛି ।
ପୀଡିତା ମହିଳା ଜଣକ ୨୦୧୫ରେ ଦିଗପହଣ୍ଡିରେ ବିବାହ କରିଥିଲେ । ତାଙ୍କର ୨ଟି ପୁଅ ଅଛନ୍ତି । ନିଜ ପରିବାର ସହ ସେ ପୁରୀରେ ରହୁଥିଲେ। ପୁରୀରେ ରହିବା ସମୟରେ ସ୍ବାମୀ, ସ୍ତ୍ରୀଙ୍କ ମଧ୍ୟରେ କୌଣସି କାରଣରୁ ବିବାଦ ଦେଖାଦେଲା। ମହିଳା ଜଣକ ୨ ପୁଅଙ୍କୁ ଧରି ବ୍ରହ୍ମପୁର ପଳାଇ ଆସିଥିଲେ। ପୁରୀରେ ଥିବା ବେଳୁ ତ୍ରିନାଥଙ୍କ ସହ ମହିଳାଙ୍କ ଫୋନରେ କଥାବାର୍ତ୍ତା ଚାଲିଥିଲା । ବ୍ରହ୍ମପୁର ଆସିବା ପରେ ତ୍ରିନାଥ ତାଙ୍କୁ ବିବାହ କରିବାର ପ୍ରଲୋଭନ ଦେଖାଇ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ।
ଗତ ମାର୍ଚ୍ଚରେ ତ୍ରିନାଥ ମହିଳାଙ୍କୁ ବିବାହର ପ୍ରତିଶ୍ରୁତି ଦେଇ କୁମ୍ଭାର ସାହିରେ ଏକ ଘରେ ରଖିଥିଲେ । ସେଠାରେ ଉଭୟ ସ୍ବାମୀ-ସ୍ତ୍ରୀ ଭଳି ଏକାଠି ରଖିଥିଲେ । ଜୁନ ୧୪ ତାରିଖରେ ମହିଳା ଜଣଙ୍କ ଅଧିକ ଅସୁସ୍ଥ ହୋଇପଡ଼ିବାରୁ ତ୍ରିନାଥ ତାଙ୍କୁ ଚିକିତ୍ସା ପାଇଁ ବ୍ରହ୍ମପୁର ଏମକେସିଜି ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରିଥିଲେ । ମହିଳା ଜଣକ ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ତ୍ରିନାଥ ତାଙ୍କୁ ସେଠାରେ ଏକାକୀ ଛାଡ଼ି ଫେରାର ହୋଇଯାଇଥିଲେ । ମହିଳା ଜଣକ ଗତ ୧୯ ତାରିଖରେ ବଡ଼ବଜାର ଥାନାରେ ଅଭିଯୋଗ କରିଥିଲେ।
