ମହାମାରୀ କରୋନା ଭାଇରସ ଯୋଗୁ ସାରା ଦେଶରେ ଲକଡାଉନ ଜାରି ହୋଇଥିଲା। ଏହି ସମୟରେ ଭାରତୀୟ କ୍ରିକେଟରମାନେ ସୋସିଆଲ ମିଡିଆରେ ନିଜ ପ୍ରଶଂସକଙ୍କୁ ଖୁସି ଖବର ଶୁଣାଇଥିଲେ। ତେବେ ଏହି ତାଲିକାରେ ଗୁରୁବାର ଭାରତୀୟ ଅଧିନାୟକ ବିରାଟ କୋହଲି ମଧ୍ୟ ସାମିଲ ହୋଇଛନ୍ତି। ସେମାନେ କିଏ ଏବଂ କ’ଣ ଖୁସି ଖବର ଜଣାଇଛନ୍ତି ଆସନ୍ତୁ ଜାଣିବା…
ହାର୍ଦ୍ଦିକ ପାଣ୍ଡ୍ୟା
ଲକ୍ଡାଉନ ପୂର୍ବରୁ ଭାରତୀୟ କ୍ରିକେଟ ଦଳର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ନତାଶା ଷ୍ଟାନକୋଭିକଙ୍କୁ ବିବାହ କରିଥିଲେ। ଲକଡାଉନ ସମୟରେ ସେ ପିତା ହେବାକୁ ଯାଉଛନ୍ତି ବୋଲି କହି ପ୍ରଶଂସକଙ୍କୁ ଆଶ୍ଚର୍ଯ୍ୟ କରିଥିଲେ। ଜୁଲାଇ ୩୧ରେ ପାଣ୍ଡ୍ୟା ସୋସିଆଲ ମିଡିଆରେ ଏକ ଫଟୋ ଶେୟାର କରିଥିଲେ। ଯେଉଁଥିରେ ସେ ନିଜ ପୁତ୍ର ସହ ନଜର ଆସିଥିବା ଦେଖିବାକୁ ମିଳିଥିଲା।
ସୁରେଶ ରାଇନା
ନିକଟରେ କ୍ରିକେଟରୁ ଅବସର ନେଇଥିବା ସୁରେଶ ରାଇନା ମଧ୍ୟ ଲକଡାଉନରେ ପ୍ରଶଂସକଙ୍କୁ ଖୁସି ଖବର ଦେଇଛନ୍ତି। ମାର୍ଚ୍ଚ ୨୩ରେ ରାଇନା ତାଙ୍କ ସ୍ତ୍ରୀ ପ୍ରିୟଙ୍କା ଚୌଧୁରୀଙ୍କ ସହ ଏକ ଫଟୋ ଇନ୍ଷ୍ଟାଗ୍ରାମରେ ଶେୟାର କରିଥିଲେ। ଯେଉଁଥିରେ ଉଭୟେ ତାଙ୍କ ପୁଅଙ୍କ ସହ ଏକାଠି ଦେଖାଯାଇଥିଲେ। ରାଇନା କହିଥିଲେ ପ୍ରିୟଙ୍କା ଏକ ଶିଶୁପୁତ୍ର ଜନ୍ମ ଦେଇଛନ୍ତି। ଯାହାର ନାମ ରିଓ ରଖାଯାଇଛି।
ୟୁଜବେନ୍ଦ୍ର ଚହଲ
ଭାରତୀୟ କ୍ରିକେଟ୍ ଟିମର ବୋଲର ୟୁଜବେନ୍ଦ୍ର ଚହଲ ନିଜ ପ୍ରଶଂସକଙ୍କୁ ମଧ୍ୟ ଖୁସି ଖବର ଶୁଣାଇଛନ୍ତି। ଚହଲ ତାଙ୍କ ପ୍ରେମିକା ଧନଶ୍ରୀ ବର୍ମାଙ୍କ ସହ ପ୍ରଥମ ଥର ପାଇଁ ଇନ୍ଷ୍ଟାଗ୍ରାମରେ ଏକ ଫଟୋ ଶେୟାର କରିଥିଲେ। ପରିବାରର ସହମତିକ୍ରମେ ଉଭୟେ ବିବାହ କରିବାକୁ ନିଷ୍ପତ୍ତି ନେଇଥିବା ଚହଲ ପ୍ରକାଶ କରିଥିଲେ।
ବିଜୟ ଶଙ୍କର
ଭାରତୀୟ କ୍ରିକେଟ ଟିମର ଅଲରାଉଣ୍ଡର ବିଜୟ ଶଙ୍କର ମଧ୍ୟ ଲକଡାଉନରେ ନିଜ ପ୍ରଶଂସକଙ୍କୁ ଖୁସି ଖବର ଶୁଣାଇଛନ୍ତି। ବୈଶାଲି ବିଶ୍ୱେସରାଣଙ୍କ ସହ ତାଙ୍କର ନିର୍ବନ୍ଧ ହୋଇଛି। ଏ ନେଇ ବିଜୟ ସୋସିଆଲ ମିଡିଆରେ ବୈଶାଲିଙ୍କ ସହ ଏକ ଫଟୋ ଶେୟାର କରିଥିଲେ।
ବିରାଟ କୋହଲି
ଭାରତୀୟ ଅଧିନାୟକ ବିରାଟ କୋହଲି ମଧ୍ୟ ତାଙ୍କ ପ୍ରଶଂସକଙ୍କୁ ଖୁସି ଖବର ଶୁଣାଇଛନ୍ତି। କୋହଲି ତାଙ୍କ ସ୍ତ୍ରୀ ଅନୁଷ୍କା ଶର୍ମାଙ୍କ ସହ ଗୁରୁବାର ସୋସିଆଲ ମିଡିଆରେ ଏକ ଫଟୋ ଶେୟାର କରିଥିଲେ। ଖୁବଶିଘ୍ର ସେ ପିତା ହେବାକୁ ଯାଉଥିବା କୋହଲି ପ୍ରକାଶ କରିଛନ୍ତି।
