ଅନୁଗୋଳ ଅଫିସ, ୬ା୯: ସାତକୋଶିଆ ଅଭୟାରଣ୍ୟର କୋର୍ ଅଞ୍ଚଳରୁ ସ୍ଥାନାନ୍ତର ପ୍ରକ୍ରିୟାରେ କଟରଙ୍ଗ ଗ୍ରାମର ୨୧ ପରିବାର କ୍ଷତିପୂରଣ ପ୍ୟାକେଜ୍ରୁ ବଞ୍ଚିତ ହୋଇଥିବା ଅଭିଯୋଗ ହୋଇଛି। ଏ ନେଇ ବଞ୍ଚିତ ପରିବାର ସୋମବାର ଅନୁଗୋଳ ଉପଜିଲାପାଳ ବଇତୁରା ଦୀପ୍ଙ୍କୁ ସାକ୍ଷାତ କରିଥିଲେ। ଅଭିଯୋଗ ଉପରେ ଏକ ଯୁଗ୍ମ ତଦନ୍ତ ଓ ସର୍ଭେ କରି ପୁନର୍ବାର ତାଲିକା ପ୍ରସ୍ତୁତ କରାଯିବ ବୋଲି ଆଶ୍ୱାସନା ଦେଇଥିଲେ।
ସମ୍ପୃକ୍ତ ୨୧ ପରିବାର ଗ୍ରାମର ବାସିନ୍ଦା ହୋଇଥିବା ନେଇ ସମସ୍ତ ପ୍ରମାଣପତ୍ର ଉପଜିଲାପାଳଙ୍କୁ ହନ୍ତାନ୍ତର କରିଥିଲେ। ଏହାପରେ ଉପଜିଲାପାଳ ତୁରନ୍ତ ସାତକୋଶିଆ ବନଖଣ୍ଡର ଡିଏଫ୍ଓ ସରୋଜ ପଣ୍ଡା, ତହସିଲଦାର ବିମଳ କୁମାର ଲେଙ୍କା ଏବଂ ଅନ୍ୟ ଅଧିକାରୀଙ୍କୁ ଡାକି ଆଲୋଚନା କରିଥିଲେ। ସମ୍ପୃକ୍ତ ପରିବାର ପଲ୍ଲିସଭାରେ ଅଂଶ ଗ୍ରହଣ କରିଥିଲେ ମଧ୍ୟ ପ୍ୟାକେଜରୁ ସେମାନଙ୍କୁ ବଞ୍ଚିତ କରାଯାଇଥିବା ଅଭିଯୋଗ କରିଥିଲେ। ଉପଜିଲାପାଳ ସ୍ଥାନାନ୍ତର ପ୍ରକ୍ରିୟାରେ ରହିଥିବା ସରକାରୀ ନୀତି ନିୟମ, ଜାତୀୟ ବ୍ୟାଘ୍ର ସଂରକ୍ଷଣ କର୍ତ୍ତୃପକ୍ଷଙ୍କ ସ୍ଥାନାନ୍ତର ମାର୍ଗଦର୍ଶିକା, ରାଜ୍ୟ ସରକାରଙ୍କ ନିୟମାବଳୀ ଏବଂ ପୁନର୍ବସତି ଓ ଥଇଥାନ ନିୟମାବଳୀ ଆଧାରରେ ରହିଥିବା ବ୍ୟବସ୍ଥା ଉପରେ ଆଲୋଚନା କରିଥିଲେ। ଏକ ଯୁଗ୍ମ ତଦନ୍ତ ଓ ସର୍ଭେ ପରେ ପୁନର୍ବାର ତାଲିକା ପ୍ରସ୍ତୁତ କରାଯିବ ବୋଲି ବୈଠକରେ ସ୍ଥିର କରାଯାଇଥିଲା। ପଲ୍ଲିସଭା ହୋଇଥିବା ୨୦୨୧ ଡିସେମ୍ବର ୧୮କୁ ନେଇ ବୟସ ଆଧାରରେ ତାଲିକା ନିର୍ଣ୍ଣୟ କରାଯିବାକୁ କୁହାଯାଇଥିଲା। ଆଲୋଚନାର ନିଷ୍ପତ୍ତି ନେଇ ଅଭିଯୋଗକାରୀ ୨୧ ପରିବାର ସହମତି ପ୍ରକାଶ କରିବା ସହ ଆନ୍ଦୋଳନ ଓ ଅନଶନ ପ୍ରତ୍ୟାହାର କରିନେଇଥିବା ଜଣାଇଥିଲେ। ପ୍ରଶାସନ ଓ ସରକାରଙ୍କ ପକ୍ଷରୁ ଯୁଗ୍ମ ତଦନ୍ତ, ଅନ୍ୟାନ୍ୟ ସର୍ଭେ ଏବଂ ଆଲୋଚନାକୁ ସେମାନେ ପୂର୍ଣ୍ଣ ସହଯୋଗ କରିବାକୁ ପ୍ରକାଶ କରିଥିଲେ।
