ନୂଆଦିଲ୍ଲୀ,୧୨।୧୨ : ରାଜନୀତିରେ ମହିଳାମାନଙ୍କର ଅଂଶଗ୍ରହଣ ବୃଦ୍ଧି ବିଷୟରେ ରାଜନୈତିକ ଦଳମାନେ ବହୁତ ଚର୍ଚ୍ଚା କରନ୍ତି, କିନ୍ତୁ ସଂସଦ ଏବଂ ରାଜ୍ୟ ବିଧାନସଭାରେ ସେମାନଙ୍କର ପ୍ରତିନିଧିତ୍ୱ ଏକ ନିରାଶଜନକ ଚିତ୍ର ଉପସ୍ଥାପନ କରିଥାଏ। ବାସ୍ତବତା ହେଉଛି ଦେଶର ୧୯ ଟି ରାଜ୍ୟର ବିଧାନସଭାରେ ମହିଳା ବିଧାୟକଙ୍କ ସଂଖ୍ୟା
୧୦ ପ୍ରତିଶତରୁ କମ ରହିଛି।
ଲୋକସଭାରେ ଆଇନ ଓ ନ୍ୟାୟ ମନ୍ତ୍ରୀ କିରେନ ରିଜିଜୁଙ୍କ ଦ୍ୱାରା ପ୍ରଦତ୍ତ ତଥ୍ୟ ଅନୁଯାୟୀ ଆନ୍ଧ୍ରପ୍ରଦେଶ, ଆସାମ, ଗୋଆ, ଗୁଜରାଟ, ହିମାଚଳ ପ୍ରଦେଶ, କେରଳ, କର୍ନାଟକ, ମଧ୍ୟପ୍ରଦେଶ, ମହାରାଷ୍ଟ୍ର, ମଣିପୁର, ଓଡ଼ିଶା , ସିକିମ, ତାମିଲନାଡୁ, ତେଲେଙ୍ଗାନା, ତ୍ରିପୁରା, ପୁଡୁଚେରୀ, ମିଜୋରାମ, ନାଗାଲାଣ୍ଡ, ଅରୁଣାଚଳ ପ୍ରଦେଶରେ ୧୦ ପ୍ରତିଶତରୁ କମ ମହିଳା ବିଧାୟକ ଅଛନ୍ତି।
ତଥ୍ୟ ଅନୁଯାୟୀ, ଯେଉଁ ରାଜ୍ୟଗୁଡିକର ବିଧାନସଭାରେ ୧୦ ପ୍ରତିଶତରୁ ଅଧିକ ମହିଳା ବିଧାୟକ ଅଛନ୍ତି ସେମାନଙ୍କ ମଧ୍ୟରେ ବିହାର (୧୦.୭୦), ଛତିଶଗଡ (୧୪.୪୪), ହରିୟାଣା (୧୦), ଝାଡଖଣ୍ଡ (୧୨.୩୫), ପଞ୍ଜାବ (୧୧.୧୧), ରାଜସ୍ଥାନ (୧୨), ଉତ୍ତରପ୍ରଦେଶ (୧୧.୪୩), ଉତ୍ତରପ୍ରଦେଶ (୧୧.୬୬), ପଶ୍ଚିମବଙ୍ଗ (୧୩.୭୦), ଦିଲ୍ଲୀ (୧୧.୪୩) ରହିଛି।
ସରକାରୀ ତଥ୍ୟ ଅନୁଯାୟୀ, ଲୋକସଭାରେ ମହିଳା ଏମପି ସଂଖ୍ୟା ୧୪.୪୯ ପ୍ରତିଶତ ଏବଂ ରାଜ୍ୟସଭାରେ ୧୪.୦୫ ପ୍ରତିଶତ ରହିଛି।
ଏଥି ସହିତ ସାରା ଦେଶରେ ବିଧାନସଭାରେ ମହିଳା ବିଧାୟକଙ୍କ ହାରାହାରି ସଂଖ୍ୟା ମାତ୍ର ୮ ପ୍ରତିଶତ ରହିଛି। ନିକଟରେ ଅନୁଷ୍ଠିତ ଗୁଜରାଟ ବିଧାନସଭା ନିର୍ବାଚନରେ ଜିତିଥିବା ମହିଳାଙ୍କ ସଂଖ୍ୟା ୮.୨ପ୍ରତିଶତ ହୋଇଥିବାବେଳେ ହିମାଚଳ ପ୍ରଦେଶରେ ଅନୁଷ୍ଠିତ ବିଧାନସଭା ନିର୍ବାଚନରେ ଏଥର କେବଳ ଜଣେ ମହିଳା ପ୍ରାର୍ଥୀ ଜିତିବାରେ ସଫଳ ହୋଇଛନ୍ତି।
