ବରଗଡ଼,୯।୮(ପ୍ରେମାନନ୍ଦ ଖମାରୀ): ବରଗଡ଼ ସହର ସମେତ ଜିଲାରେ କିଛିଦିନର ଆଇନ ଶୃଙ୍ଖଳା ହୁଗୁଳା ହୋଇପଡ଼ିଛି। କିଛିଦିନର ନୀରବତା ପରେ ଏଠାରେ ଅପରାଧୀମାନେ ସକ୍ରିୟ ହୋଇପଡ଼ିଛନ୍ତି। ଏଭଳି ସ୍ଥିତିରେ ସହରବାସୀ ତଥା ସାଧାରଣ ଲୋକଙ୍କ ସୁରକ୍ଷା ବିପଦରେ ରହିଛି। ଏଠାରେ ସାଧାରଣ ଜନତା ତ ଦୂରର କଥା, ବିଭିନ୍ନ ସମୟରେ ସାମାଜିକ କର୍ମୀଙ୍କଠାରୁ ଆରମ୍ଭ କରି ଆଇନଜୀବୀ, ଚାଷୀନେତାଙ୍କଠାରୁ ଖବରଦାତା, ଛାତ୍ରୀଛାତ୍ରଙ୍କଠାରୁ ଡାକ୍ତର ଦିନ ଦ୍ୱିପ୍ରହରରେ ଆକ୍ରମଣ, ଅସଦାଚରଣର ସମ୍ମୁଖୀନ ହେଉଛନ୍ତି। ସହରରେ ୨ ପୋଲିସ ଫାଣ୍ଡି, ୨ ଥାନାଠାରୁ ଆରମ୍ଭ କରି ଏସ୍ଡିପିଓ ଏବଂ ଏସ୍ପିଙ୍କ କାର୍ଯ୍ୟାଳୟ ରହିଛି। ଏହା ସହିତ ସହର ଉପକଣ୍ଠ ବରାହଗୋଡ଼ାରେ ଗ୍ରାମାଞ୍ଚଳ ଥାନା ମଧ୍ୟ ରହିଛି। ଏହାସତ୍ତ୍ୱେ ଅପରାଧୀମାନେ ଦିନକୁ ଦିନ ସକ୍ରିୟ ହୋଇ ପଡ଼ିଛନ୍ତି। ଏଭଳି ଅପରାଧ ରୋକିବା ଗୋଟିଏପଟେ ସ୍ଥାନୀୟ ପୋଲିସ ପାଇଁ ଚ୍ୟାଲେଞ୍ଜ ହୋଇପଡ଼ି ଥିବାବେଳେ ଅନ୍ୟପଟେ ସ୍ଥାନୀୟ ଲୋକଙ୍କୁ ସୁରକ୍ଷା ଚିନ୍ତା ଘାରିଛି।
ସହର ମଧ୍ୟରେ ରହିଥିବା ସହରାଞ୍ଚଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଜଣେ କାର୍ଯ୍ୟରତ ଡାକ୍ତରଙ୍କୁ ଆକ୍ରମଣ ଘଟଣାକୁ ନେଇ ଚର୍ଚ୍ଚା ଥମି ନ ଥିବାବେଳେ ଦୁଇଦିନ ତଳେ ଦିନ ଦ୍ୱିପ୍ରହରରେ ବରଗଡ଼ କୋର୍ଟ ସମ୍ମୁଖ ବିଚ୍ରାସ୍ତା ଉପରେ ଜିଲା ଓକିଲ ସଂଘ ସଭାପତି ଭୀଷ୍ମଦେବ ସରାଫ୍ଙ୍କୁ ମଦ ବୋତଲରେ ମରଣାନ୍ତକ ଆକ୍ରମଣ ପରେ ସହରରେ ଆଇନ ଶୃଙ୍ଖଳା ପଦାରେ ପଡ଼ି ଯାଇଛି। କେବଳ ଏହି ୨ଘଟଣା ନୁହେଁ, ଏହାର କିଛିଦିନ ପୂର୍ବରୁ ସ୍ଥାନୀୟ ପଞ୍ଚାୟତ କଲେଜ ରାସ୍ତାରେ ସର୍ବସମ୍ମୁଖରେ ରାସ୍ତା ଉପରେ ଜଣେ ଯୁବକ ବିଚ୍ ରାସ୍ତା ଉପରେ ଅନ୍ୟଜଣେ କଲେଜ ଛାତ୍ରୀଙ୍କୁ ଅସଦାଚରଣ ପ୍ରଦର୍ଶନ କରିଥିଲେ। ସେହିପରି ପ୍ରାୟ ବର୍ଷକତଳେ ବରଗଡ଼ ସହର ଉପକଣ୍ଠ ଡାଙ୍ଗ ଛକ ନଦୀପଡ଼ା ସାର ଫ୍ୟାକ୍ଟ୍ରି ସମ୍ମୁଖ ଦୋକାନରେ ଜଣେ ସାମାଜିକ କର୍ମୀ ତଥା ସ୍ବେଚ୍ଛାସେବୀଙ୍କୁ ସଂଘବଦ୍ଧ ଆକ୍ରମଣ ହୋଇଥିବା ବେଳେ କଲାପାଣି ଛକ ନିକଟରେ ଜଣେ ଚାଷୀନେତାଙ୍କୁ କିଛି ଦୁର୍ବୃତ୍ତ ନିସ୍ତୁକ ମାଡ଼ ମାରିଥିବା ଅଭିଯୋଗ ହୋଇଥିଲା।
ସହରରେ ବଢ଼ି ଚାଲିଥିବା ଅପରାଧଗୁଡ଼ିକ ମଧ୍ୟରୁ ଏହା କେବଳ ଗୋଟିଏ ଗୋଟିଏ ଦୃଷ୍ଟାନ୍ତ ମାତ୍ର। ସହର ତଥା ସହର ଉପକଣ୍ଠ ରାସ୍ତାରେ ଲୁଟ୍ପାଟ୍ ମଧ୍ୟ ବଢ଼ି ଚାଲିଛି। ଗତ କିଛିଦିନ ତଳେ ସହର ଉପକଣ୍ଠ ରାଜପଥରେ ରାହାଜାନି ବଢ଼ି ଚାଲିଥିଲା। ଲୁଟେରାମାନେ ଲୁଟ୍ ସମୟରେ ଧାରୁଆ ଅସ୍ତ୍ରରେ ଭୟଭୀତ କରିବା ସହିତ ଆକ୍ରମଣ ପାଇଁ ମଧ୍ୟ ପଛାଇ ନ ଥିବା ନଜିର ରହିଛି। ଏହି ସବୁ ଅପରାଧ ପଛରେ ସହରରେ ବୃଦ୍ଧି ପାଉଥିବା ନିଶା କାରବାର ହିଁ ପ୍ରମୁଖ କାରଣ ବୋଲି ସାଧାରଣରେ ମତପ୍ରକାଶ ପାଉଛି। ଜିଲା ଓକିଲ ସଂଘ ସଭାପତିଙ୍କୁ ମଦ ବୋତଲରେ ଆକ୍ରମଣ କରାଯିବା ଆହୁରି ଚକିତ କରି ପକାଇଛି। ପୋଲିସ ଥରକୁ ଥର ଚଢ଼ାଉ କରି ବିପୁଳ ପରିମାଣରେ କଫ ସିରପ୍, ବ୍ରାଉନସୁଗାର, ଗଞ୍ଜେଇ, ମଦ ଜବତ କରୁଛି। ତଥା ସହରରେ ଚାଲିଥିବା ନିଶା କାରବାରରେ ବ୍ରେକ୍ ଲାଗି ନ ପାରିବା ଚର୍ଚ୍ଚାର ବିଷୟ ହୋଇଛି।
ସହରର ବିଭିନ୍ନ ଗଳିକନ୍ଦିରେ ନିଶା କାରବାର ଚାଲୁଥିବା ଅଭିଯୋଗ ହେଉଛି। ଅନ୍ୟପଟେ ଅବକାରୀ ବିଭାଗ ନୀରବଦ୍ରଷ୍ଟା ସାଜିଛି। ପୋଲିସ ବିଭିନ୍ନ ସମୟରେ ଧରପଗଡ଼ କରୁଛି। ନିଶା ସାମଗ୍ରୀ ସହିତ ଅଭିଯୁକ୍ତମାନଙ୍କୁ ଗିରଫ ମଧ୍ୟ କରୁଛି। କିନ୍ତୁ ନିଶା କାରବାର ବନ୍ଦ ହେଉ ନାହିଁ। କିଛି ବଡ଼ବଡ଼ିଆଙ୍କ ଛତ୍ରଛାୟାରେ ରହି ନିଶା ବେପାରୀମାନେ ଅନାୟାସରେ ନିଶା କାରବାର ଚଳାଇ ଆସୁଥିବା ଅଭିଯୋଗ ହେଉଛି। ଏପରି କି ଗତ କିଛିଦିନ ତଳେ ବରଗଡ଼ ଟାଉନ ଥାନା ପୋଲିସ ବିପୁଳ ପରିମାଣରେ ବ୍ରାଉନ ସୁଗାର ଜବତ କରିବା ପରେ ଏକଦା ପୋଲିସ ଇନଫର୍ମର ସାଜିଥିବା ଜଣେ ଯୁବକ ଏକ ଖବରଦାତା ସମ୍ମିଳନୀରେ ନିଶା କାରବାରରେ କିଛି ପୋଲିସ କର୍ମଚାରୀଙ୍କ ହାତ ରହିଥିବା ଭଳି ସଙ୍ଗିନ ଅଭିଯୋଗ ଆଣିଥିଲେ। ଏଭଳି ସ୍ଥିତିରେ ସହରରୁ କେବେ ନିଶା କାରବାର ସମ୍ପୂର୍ଣ୍ଣ ଦମନ ହେବ ଏବଂ ଅପରାଧ ହ୍ରାସ ସହିତ ସହରବାସୀଙ୍କ ଜୀବନ ଜୀବିକା ସୁରକ୍ଷିତ ରହିବ, ତାକୁ ନେଇ ଏବେ ଚା ଖଟିରୁ ଆରମ୍ଭ କରି ସବୁଆଡ଼େ ଆଲୋଚନା ଜୋର୍ ଧରିଛି।
