ମୁମ୍ବାଇ: ଗୋଟିଏ ପର୍ବ, ଦାମୀ ବିଜ୍ଞାପନ, ବଲିଉଟର ଜଣେ ବଡ଼ ଚେହେରା ଏବଂ ସୋସିଆଲ ମିଡିଆରେ ବିବାଦ। ରକ୍ଷାବନ୍ଧନ ପାଇଁ ତିଆରି ହୋଇଥିବା ଏକ ଜୁଏଲାରୀ ବିଜ୍ଞାପନକୁ ନେଇ ଅଭିନେତ୍ରୀ କ୍ରିତି ସାନନ ବିବାଦରେ ଫସିଛନ୍ତି। ଏହି ବିଜ୍ଞାପନ ନେଇ ସୋସିଆଲ ମିଡିଆରେ ବିଭିନ୍ନ ପ୍ରକାର ପ୍ରତିକ୍ରିୟା ଆସୁଛି।
ବିଜ୍ଞାପନରେ କ୍ରିତି ନିଜ ଭାଇଙ୍କ ସହ ରକ୍ଷାବନ୍ଧନ ପାଳନ କରୁଥିବା ଦେଖାଯାଇଛି। ଏହାପରେ ସେ ନିଜ ପୋଷା କୁକୁରକୁ ମଧ୍ୟ ରାକ୍ଷୀ ବାନ୍ଧୁଛନ୍ତି। କିଛି ଲୋକଙ୍କୁ ଏହି ଅନ୍ଦାଜ ପସନ୍ଦ ଆସିଥିବା ବେଳେ ଅନେକ ୟୁଜର କ୍ରିତିଙ୍କ ପୋଷାକ, ପୂଜା ଥାଳି ନଥିବା ଏବଂ ପର୍ବକୁ ଦେଖାଯାଇଥିବା ଶୈଳୀକୁ ନେଇ ପ୍ରଶ୍ନ ଉଠାଇଛନ୍ତି। କ୍ରିତି ସାନନ GIVAର ରକ୍ଷାବନ୍ଧନ କ୍ୟାମ୍ପେନରେ ଅଫ-ହୱାଇଟ ବ୍ରାଲେଟ ଷ୍ଟାଇଲ ବ୍ଲାଉଜ, କେପ ଏବଂ ଡ୍ରେପ୍ଡ ସ୍କର୍ଟରେ ନଜର ଆସିଛନ୍ତି। ବିଜ୍ଞାପନରେ ପ୍ରଥମେ ସେ ନିଜ ଭାଇଙ୍କୁ ଏବଂ ପରେ ନିଜ ପୋଷା କୁକୁରକୁ ରାକ୍ଷୀ ବାନ୍ଧୁଛନ୍ତି। କିଛି ସୋସିଆଲ ମିଡିଆ ୟୁଜରଙ୍କ ମତରେ, ଏହି ପୋଷାକ ରକ୍ଷାବନ୍ଧନ ଭଳି ପର୍ବ ପାଇଁ ଉପଯୁକ୍ତ ନୁହେଁ। ଆଉ କିଛି ୟୁଜର ପ୍ରଶ୍ନ କରିଛନ୍ତି ଯେ ବିଜ୍ଞାପନରେ ପୂଜା ଥାଳି, ତିଳକ ଭଳି ପାରମ୍ପରିକ ରୀତିନୀତି କାହିଁକି ଦେଖାଯାଇନାହିଁ। ଅନ୍ୟପଟେ ପେଟ ଲଭର୍ସମାନେ କହିଛନ୍ତି ଯେ ପୋଷା ଜୀବଜନ୍ତୁ ମଧ୍ୟ ପରିବାରର ଅଂଶ ଏବଂ ତେଣୁ ସେମାନଙ୍କୁ ରକ୍ଷାବନ୍ଧନରେ ସାମିଲ କରିବାରେ କିଛି ଭୁଲ ନାହିଁ। ଏହି ବିବାଦ କେବଳ କ୍ରିତି ସାନନଙ୍କୁ ନେଇ ସୀମିତ ନାହିଁ। ବିଜ୍ଞାପନ ପ୍ରସ୍ତୁତ କରିଥିବା ଟିମ, ଏହାକୁ ଅନୁମୋଦନ କରିଥିବା ବ୍ରାଣ୍ଡ ଏବଂ ସମ୍ପୂର୍ଣ୍ଣ କ୍ୟାମ୍ପେନର ଚିନ୍ତାଧାରା ଉପରେ ମଧ୍ୟ ପ୍ରଶ୍ନ ଉଠୁଛି। ବାସ୍ତବରେ ଏଠାରେ ବିବାଦର ମୁଖ୍ୟ କାରଣ ହେଉଛି ପାରମ୍ପରିକ ପର୍ବକୁ ଆଧୁନିକ ଶୈଳୀରେ ଦେଖାଇବା। ଯାହାକୁ ବିଜ୍ଞାପନ ନିର୍ମାତାମାନେ ସାଧାରଣ ଭାବେ ନେଇଛନ୍ତି, ତାହା ଏବେ ସୋସିଆଲ ମିଡିଆରେ ବଡ଼ ଚର୍ଚ୍ଚାର ବିଷୟ ପାଲଟିଛି।
