ନୂଆଦିଲ୍ଲୀ, ୧୫।୯: ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ତମ ସଂସ୍କରଣ ଆସନ୍ତା ୧୯ରୁ ୟୁଏଇରେ ଆରମ୍ଭ ହେବ। ଭାରତରେ କରୋନା ମହାମାରୀ ଜଟିଳ ପରିସ୍ଥିତିକୁ ଦେଖି ଚଳିତ ସଂସ୍କରଣ ୟୁଏଇରେ ଆୟୋଜନ କରିବାକୁ ବିସିସିଆଇ ନିଷ୍ପତ୍ତି ନେଇଛି। ଆଇପିଏଲ୍-୧୩ ଆରମ୍ଭ ହେବାକୁ ଆଉ ଗୋଟିଏ ସପ୍ତାହରୁ କମ୍ ସମୟ ବାକି ରହିଥିବାବେଳେ ସମସ୍ତ ୮ଟି ଟିମ୍ ଜୋର୍ଦାର ପ୍ରସ୍ତୁତି ଜାରି ରଖିଛନ୍ତି। ଯଦି ଆଇପିଏଲ୍ର ସର୍ବାଧିକ ରନ୍ ସଂଗ୍ରହକାରୀ ବ୍ୟାଟ୍ସମ୍ୟାନ ତାଲିକାକୁ ଦେଖିବା ତେବେ ଭାରତୀୟ ଦଳର ଅଧିନାୟକ ବିରାଟ କୋହଲି ସର୍ବାଗ୍ରେ ରହିଛନ୍ତି। ସେହିଭଳି ଟପ୍-୫ରେ ମଧ୍ୟ ୪ ଜଣ ଭାରତୀୟ ବ୍ୟାଟ୍ଦମ୍ୟାନ ରହିବାର ସୌଭାଗ୍ୟ ଲାଭ କରିଛନ୍ତି।
ଚ୍ୟାଲେଞ୍ଜର୍ସ ବାଙ୍ଗାଲୋର ଅଧିନାୟକ କୋହଲି ୧୭୭ ଆଇପିଏଲ୍ ମ୍ୟାଚ୍ ଖେଳି ୩୭.୮୪ ଆଭରେଜରେ ୫,୪୧୨ ରନ୍ ସଂଗ୍ରହ କରିଛନ୍ତି। ତାଙ୍କ ନାମରେ ୫ ଶତକ ଓ ୩୬ ଅର୍ଦ୍ଧଶତକ ରହିଛି। ଏହି ତାଲିକାରେ କୋହଲିଙ୍କ ପଛକୁ ଚେନ୍ନାଇ ସୁପର୍ କିଙ୍ଗ୍ସର ଅଭିଜ୍ଞ ଖେଳାଳି ସୁରେଶ ରାଇନା ରହିଛନ୍ତି। ରାଇନା ୧୯୩ ମ୍ୟାଚ୍ରୁ ୫,୩୬୮ ରନ କରିଛନ୍ତି। ରାଇନାଙ୍କ ଷ୍ଟ୍ରାଇକ ରେଟ୍ ୧୩୭ରୁ ଊର୍ଦ୍ଧ୍ୱ ରହିଥିବାବେଳେ ସେ ଗୋଟିଏ ଶତକ ଓ ୩୮ ଅର୍ଦ୍ଧଶତକ ମଧଧ୍ୟ ହାସଲ କରିଛନ୍ତି। ମୁମ୍ବାଇ ଇଣ୍ଡିଆନ୍ସର ଅଧିନାୟକ ରୋହିତ୍ ଶର୍ମା ଏହି ତାଲିକାର ୩ୟ ସ୍ଥାନରେ ରହିଛନ୍ତି। ରୋହିତ୍ ୧୮୮ ମ୍ୟାଚ୍ରୁ ୧ ଶତକ ଓ ୩୬ ଅର୍ଦ୍ଧଶତକ ସହାୟତାରେ ୪,୮୯୮ ରନ କରିଛନ୍ତି।
ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ ଡେଭିଡ୍ ଓ୍ବାର୍ନର ୪,୭୦୬ ରନ ସହ ଏହି ତାଲିକାର ୪ର୍ଥ ସ୍ଥାନରେ ରହିଛନ୍ତି। ସନ୍ରାଇଜର୍ସ ହାଇଦ୍ରାବାଦ୍ ପକ୍ଷରୁ ଖେଳୁଥିବା ଓ୍ବାର୍ନର ଆଇପିଏଲ୍ରେ ୪ ଶତକ ଓ ୪୪ ଅର୍ଦ୍ଧଶତକ ମଧ୍ୟ ହାସଲ କରିଛନ୍ତି। ଦିଲ୍ଲୀ କ୍ୟାପିଟାଲ୍ସର ଶିଖର ଧାଓ୍ବନ ୧୫୯ ମ୍ୟାଚ୍ରୁ ୪,୫୭୯ ରନ ସହ ସର୍ବାଧିକ ରନ୍ ସଂଗ୍ରହକାରୀ ବ୍ୟାଟ୍ସମ୍ୟାନ ତାଲିକାରେ ୫ମ ସ୍ଥାନ ଲାଭ କରିଛନ୍ତି। ୩୭ ଅର୍ଦ୍ଧଶତକ ହାସଲ କରିଥିବା ଧାଓ୍ବନ ଆଜି ପର୍ଯ୍ୟନ୍ତ ଆଇପିଏଲ୍ରେ ଶତକ ଅର୍ଜନ କରିପାରି ନାହାନ୍ତି।
