ଚେନ୍ନାଇ,୯।୨: ଇଂଲଣ୍ଡ ବିପକ୍ଷରେ ଖେଳାଯାଇଥିବା ପ୍ରଥମ ଟେଷ୍ଟରେ ଲଜ୍ଜାଜନକ ପରାଜୟ ହାସଲ କରିଛି ଭାରତୀୟ ଟିମ୍। ଦୀର୍ଘ ୨୨ ବର୍ଷ ପରେ ଚେନ୍ନାଇରେ ଦଳ ଟେଷ୍ଟ ମ୍ୟାଚ୍ ହାରିଛି। ଏହାକୁ ନେଇ ଅଧିନାୟକ ବିରାଟ କୋହଲି ପ୍ରତିକ୍ରିୟା ରଖି ସବୁ ଦୋଷ ବୋଲର୍ଙ୍କୁ ଦେଇଛନ୍ତି।
କୋହଲି କହିଛନ୍ତି, ଇଂଲଣ୍ଡ ଦଳ ଭାରତଠାରୁ ଭଲ ପ୍ରଦର୍ଶନ କରିଛି। ଏହାର ପରିଣାମ ତାଙ୍କୁ ମିଳିଛି। ଏଭଳି ସମୟରେ ବୋଲର୍ମାନଙ୍କ ଉପରେ ବିଶ୍ୱାସ କରାଯାଇଥାଏ। ସେମାନେ ବ୍ୟାଟ୍ସମ୍ୟାନ୍ଙ୍କ ସହ ଏକଜୁଟ୍ ହୋଇ ଉଲ୍ଲେଖନୀୟ ପ୍ରଦର୍ଶନ କରିବା ଉଚିତ। ହେଲେ ତାହା ହେଲା ନାହିଁ। ଯୋଜନାଗୁଡ଼ିକୁ ଠିକ୍ ଭାବେ ପ୍ରଣୟନ କରାଯାଇପାରିଲା ନାହିଁ। ଦଳ ହିସାବରେ ଭୁଲରୁ ଶିଖି ଆସୁଛୁ। ଟେଷ୍ଟ କ୍ରିକେଟ ଏକ ଚକ୍କି ପରି। ଇଂଲଣ୍ଡ ଏଥିପାଇଁ ପ୍ରସ୍ତୁତ ଥିଲା। ଖେଳାଳିମାନଙ୍କ ପ୍ରଦର୍ଶନ ପ୍ରଶଂସନୀୟ ଥିଲା। ଫିଲ୍ଡିଂ ଭଲ ହେବା ସହ ଦୃଢ଼ ମାନସିକତା ଯୋଗୁ ଭାରତକୁ ହରାଇବାରେ ସଫଳ ହୋଇଛି ଦଳ। ହେଲେ ଭାରତୀୟ ଟିମ୍ ନିଜ ଭୂଲ ସୁଧାରିବା ସହ ପୁଣିଥରେ ପ୍ରତ୍ୟାବର୍ତ୍ତନ କରିବ ବୋଲି ସେ କହିଛନ୍ତି।
ପ୍ରକାଶ ଯେ, ଟସ୍ ଜିତି ପ୍ରଥମେ ବ୍ୟାଟିଂ କରିଥିଲା ଇଂଲଣ୍ଡ ଦଳ। ପ୍ରଥମ ପାଳିରେ ଦଳ ୫୭୮ ରନ୍ କରିଥିଲା। ଏହାର ଜବାବରେ ଭାରତୀୟ ଟିମ୍ ୩୩୭ରେ ଅଲ୍ଆଉଟ୍ ହୋଇଯାଇଥିଲା। ୨୪୧ରନ୍ର ଅତିରିକ୍ତ ରନ୍ ସହ ଇଂଲଣ୍ଡ ଦ୍ୱିତୀୟ ପାଳି ୧୭୮ ରନ୍ କରି ଅଲ୍ଆଉଟ୍ ହୋଇଥିଲା। ପରେ ଭାରତୀୟ ଟିମ୍ ଦ୍ୱିତୀୟ ପାଳି ୧୯୨ରନ୍ରେ ସମାପ୍ତ ହୋଇଥିଲା। ଫଳରେ ୨୨୭ରନ୍ର ଲଜ୍ଜାଜନକ ପରାଜୟ ହାସଲ କରିଛି ଦଳ।
