ଅନେକ କ୍ରିକେଟର ଅଛନ୍ତି ଯେଉଁମାନେ ଆର୍ଥିକ ସଙ୍କଟ ମଧ୍ୟରୁ ଆସି ନିଜ ପରିଚୟ ସୃଷ୍ଟି କରିପାରିଛନ୍ତି। ସେହିଭଳି ଜଣେ କ୍ରିକେଟର୍ ହେଉଛନ୍ତି ରିଙ୍କୁ ସିଂ। ସେ ୟୁପି ପାଇଁ ରଣଜୀ ଟ୍ରଫି ଏବଂ କୋଲକାତା ନାଇଟ ରାଇଡର୍ସ ପାଇଁ ଆଇପିଏଲ ଖେଳୁଛନ୍ତି। ଏହି ବାମହାତୀ ବ୍ୟାଟ୍ସମ୍ୟାନ ଆଇପିଏଲରେ ଖେଳିବା ପୂର୍ବରୁ ଅତ୍ୟନ୍ତ ଗରିବ ଥିଲେ ମାତ୍ର ଦୁଇବର୍ଷ ହେବ ତାଙ୍କ ଭାଗ୍ୟ ସମ୍ପୂର୍ଣ୍ଣ ବଦଳି ଯାଇଛି।
ବାମହାତୀ ବ୍ୟାଟ୍ସମ୍ୟାନ ରିଙ୍କୁ ସିଂ ୧୯୯୭ ମସିହାରେ ଆଲିଗଡରେ ଜନ୍ମଗ୍ରହଣ କରିଥିଲେ। ତାଙ୍କ ପିତା ଘର ଘର ବୁଲି ଗ୍ୟାସ୍ ସିଲିଣ୍ଡର ଦିଅନ୍ତି। ତାଙ୍କ ୫ ଭାଇଭଉଣୀ ଅଛନ୍ତି। ସେମାନଙ୍କ ମଧ୍ୟରୁ ରିଙ୍କୁ ତୃତୀୟ। ତାଙ୍କ ବଡ ଭାଇ ଏକ ଅଟୋ ରିକ୍ସା ଚଳାଉଥିବାବେଳେ ଅନ୍ୟ ଭାଇ ଏକ କୋଚିଂ ସେଣ୍ଟରରେ କାମ କରନ୍ତି। ରିଙ୍କୁ ଜଣେ କ୍ରିକେଟର୍ ହେବାକୁ ଚାହୁଁଥିଲେ। କିନ୍ତୁ ଆର୍ଥିକ ସଙ୍କଟ ଯୋଗୁ ସେ ଟ୍ରେନିଂ ନେଇପାରି ନ ଥିଲେ। ଟଙ୍କା ରୋଜଗାର ପାଇଁ ବଡ ଭାଇ ତାଙ୍କୁ କହିଥିଲେ। ୯ମ ଫେଲ୍ ଯୋଗୁ ତାଙ୍କୁ ଝାଡୁଦାର ପାଇଁ ଅଫର୍ ମିଳିଥିଲା। ପରେ ରିଙ୍କୁ ଅନୁଭବ କରିଥିଲେ ଯେ ବର୍ତ୍ତମାନ ସେ କେବଳ କ୍ରିକେଟ ମାଧ୍ୟମରେ ନିଜ ଜୀବନକୁ ପରିବର୍ତ୍ତନ କରିପାରିବେ। ରିଙ୍କୁ ୨୦୧୫ ରଣଜୀ ଟ୍ରଫି ମଧ୍ୟ ଖେଳିଥିଲେ। ରଣଜୀ ଟ୍ରଫିରେ ଚମତ୍କାର ପ୍ରଦର୍ଶନ କରିଥିଲେ। ୟୁପି ଅଣ୍ଡର ୧୯ ଟିମରୁ ରିଙ୍କୁ ସିଂ ଯାହା ଟଙ୍କା ପାଉଥିଲେ, ସେ ଘରର ଖର୍ଚ୍ଚ ଦେଉଥିଲେ। କିନ୍ତୁ ପ୍ରଥମ ଶ୍ରେଣୀ କ୍ରିକେଟରେ ରିଙ୍କୁ ସିଂ ବ୍ୟାଟିଂ ଜାରି ରଖିଥିଲେ ଏବଂ ୨୦୧୮ ମସିହାରେ ତାଙ୍କ ଜୀବନ ବଦଳି ଯାଇଥିଲା।
୨୦୧୮ ଆଇପିଏଲ ନିଲାମରେ ରିଙ୍କୁ ସିଂଙ୍କ ଜୀବନ ବଦଳିଗଲା। ରିଙ୍କୁ ସିଂଙ୍କୁ ଶାହରୁଖ ଖାନଙ୍କ ଆଇପିଏଲ ଦଳ କୋଲକାତା ନାଇଟ ରାଇଡର୍ସ ୮୦ ଲକ୍ଷ ଟଙ୍କାରେ କିଣିଥିଲା। ଶାହାରୁଖ୍ ହିଁ ତାଙ୍କ ଜୀବନ ବଦଳାଇ ଥିବା ସେ କହିଛନ୍ତି।
