ଭବାନୀପାଟଣା,୯।୯(ଡି.ଏନ୍.ଏ.): କରଡ଼ି ବିଷୟରେ ସାଧାରଣତଃ ରାଜ୍ୟ ତଥା ଦେଶର ସବୁ ସ୍ଥାନରେ ଲୋକେ ଜାଣି ନଥାନ୍ତି। ଉତ୍ତର ପୂର୍ବାଞ୍ଚଳ ଭଳି ପଶ୍ଚିମ ଓଡ଼ିଶାର ଘରେ ଘରେ ପରିଚିତ ଏହି କରଡି। ଏବେ ଲକ୍ଡାଉନ୍ କାଳରେ ବନବାସୀଙ୍କ ଜୀବନ ଜୀବିକାର ରାହା ସାଜିଛି ଏହି ଜଙ୍ଗଲଜାତ ଦ୍ରବ୍ୟ। ଆଦିବାସୀ ଅଧ୍ୟୁଷିତ କଳାହାଣ୍ଡି ଜିଲା ଲେକେ ଏ ଦୁର୍ଦ୍ଦିନରେ କରଡି ବିକ୍ରି କରି ଅର୍ଥ ରେଜଗାର କରୁଥିବା ଦେଖିବାକୁ ମିଳିଛି। ଦିନ ଥିଲା କରଡିକୁ କେବଳ ଆଦିବାସୀମାନେ ନିଜର ଖାଦ୍ୟ ଭାବେ ବ୍ୟବହାର କରୁଥିଲେ। କରଡିକୁ କଞ୍ଚା ତରକାରି କରି ଖାଇବା ସହିତ ଶୁଖାଇ ଗୁଣ୍ଡ କରି ସାଇତି ରଖୁଥିଲେ। ଜୁଲାଇ ଆରମ୍ଭରୁ ବାଉଁଶ ଗଛ ମୂଳରେ ଗଜା ବାହାରେ। ଏହି ବାଉଁଶ ଗଜା ବା କରଡି ସଂଗ୍ରହ ପାଇଁ ଆଦିବାସୀ ମାନେ ତପତ୍ର ହୋଇ ଉଠନ୍ତି। ଆଦିବାସୀ ମହିଳାମାନେ ଜଙ୍ଗଲରେ ବୁଲି ବୁଲି ବାଉଁଶ ମୂଳରୁ ଗଜାକୁ ସଂଗ୍ରହ କରି ନିକଟସ୍ଥ ବଜାରରେ ବିକ୍ରି କରି ଭଲ ଦୁଇ ପାଇସା ରୋଜଗାର କରନ୍ତି। କରଡି ବର୍ଷକୁ ଥରେ ମିଳୁଥିବା ଯୋଗୁ ଏହାର ଚାହିଦା ମଧ୍ୟ ରହିଛି।
