ଦୁବାଇ, ୩୦।୯: ଆଇପିଏଲ୍-୧୩ତମ ସିଜନର ଏକାଦଶ ମ୍ୟାଚ୍ରେ ମଙ୍ଗଳବାର ସନ୍ରାଇଜର୍ସ ହାଇଦ୍ରାବାଦ୍ ୧୫ ରନରେ ଦିଲ୍ଲୀ କ୍ୟାପିଟାଲ୍ସକୁ ପରାସ୍ତ କରିଛି। ଏହି ମ୍ୟାଚ୍ରେ ଦିଲ୍ଲୀ ପରାସ୍ତ ହୋଇଥିଲେ ମଧ୍ୟ ଦ୍ରୁତ ବୋଲର କାଗିସୋ ରାବାଡା ଏଭଳି ଏକ ରେକର୍ଡ ପ୍ରତିଷ୍ଠା କରିଛନ୍ତି, ଯାହା ଆଇପିଏଲ୍ ଇତିହାସରେ ପୂର୍ବରୁ କୌଣସି ବୋଲର ହାସଲ କରି ନ ଥିଲେ। ରାବାଡା ମ୍ୟାଚ୍ରେ ୪ ଓଭର ବୋଲିଂ କରି ୨୧ ରନ୍ ବ୍ୟୟରେ ୨ଟି ଉଇକେଟ୍ ନେଇଥିଲେ। ଏଥିସହ ଆଇପିଏଲ୍ ଇତିହାସରେ ପ୍ରଥମ ବୋଲର ଭାବେ ସେ ଲଗାତର ୧୦ ମ୍ୟାଚ୍ରେ ୨ କିମ୍ବା ଏହାଠାରୁ ଊର୍ଦ୍ଧ୍ୱ ଉଇକେଟ୍ ହାସଲ କରିବାର ସୌଭାଗ୍ୟ ଲାଭ କରିଛନ୍ତି। ୭ ଏପ୍ରିଲରୁ ୨୯ ସେପ୍ଟେମ୍ବର ମଧ୍ୟରେ ଦିଲ୍ଲୀ ପକ୍ଷରୁ ଖେଳି ରାବାଡା ଏହି କୀର୍ତ୍ତିମାନ ଲାଭ କରିଛନ୍ତି। ରାବାଡା ଆଇପିଏଲ୍ରେ ନିଜର ଶେଷ ୧୦ ମ୍ୟାଚ୍ରେ ପ୍ରଦର୍ଶନ ଯଥାକ୍ରମେ ୨/୨୧, ୨/୪୨, ୨/୨୨, ୨/୩୮, ୨/୨୩, ୨/୩୭, ୨/୩୧, ୨/୨୮, ୨/୨୬ ଓ ୨/୨୧ ରହିଛି। ଚଳିତ ସିଜନରେ ପର୍ପଲ କ୍ୟାପ୍ ବର୍ତ୍ତମାନ ରାବାଡାଙ୍କ ନିକଟରେ ରହିଛି। ଗତ ସିଜନରେ ସେ ୧୨ ମ୍ୟାଚ୍ରୁ ୨୫ ଉଇକେଟ୍ ନେଇଥିଲେ। ଏହି ଦକ୍ଷିଣ ଆଫ୍ରିକା ଦ୍ରୁତ ବୋଲର ବର୍ତ୍ତମାନ ସୁଦ୍ଧା ଆଇପିଏଲ୍ରେ ୨୧ ମ୍ୟାଚ୍ ଖେଳି ମୋଟ୍ ୩୮ ଉଇକେଟ୍ ନେଇଛନ୍ତି।
