ଜୟପୁର,୧୦।୭: ରାଜସ୍ଥାନରୁ ଏକ ଏଭଳି ହୃଦୟବିଦାରକ ଘଟଣା ସାମ୍ନାକୁ ଆସିଛି, ଯାହା ମାଆ-ଝିଅର ପବିତ୍ର ସମ୍ପର୍କକୁ କଳଙ୍କିତ କରିଦେଇଛି। ଜୟପୁରର ପ୍ରତାପ ନଗର ଅଞ୍ଚଳରେ ଜଣେ ୨୩ ବର୍ଷର ଝିଅ ଅନୁକମ୍ପାମୂଳକ ସରକାରୀ ଚାକିରି ଏବଂ କୋଟି କୋଟି ଟଙ୍କାର ସମ୍ପତ୍ତି ହଡ଼ପ କରିବା ପାଇଁ ନିଜ ବିଧବା ମାଆକୁ ୭ ଲକ୍ଷ ଟଙ୍କାର ସୁପାରି ଦେଇ ନିର୍ମମ ଭାବେ ହତ୍ୟା କରିଛନ୍ତି।
ଓକିଲାତି ପାଇଁ ପ୍ରସ୍ତୁତ ହେଉଥିବା ଝିଅ ଆୟୁଷୀ ଶର୍ମା ଏହି ସାରା ଘଟଣାକୁ ଏକ ସାଧାରଣ ‘ହିଟ-ଆଣ୍ଡ-ରନ’ ସଡ଼କ ଦୁର୍ଘଟଣାର ରୂପ ଦେବାକୁ ଚେଷ୍ଟା କରିଥିଲେ। ହେଲେ ପୋଲିସର ତୀକ୍ଷ୍ଣ ନଜର ଏବଂ ସିସିଟିଭି ଫୁଟେଜ ଏହି ଭୟଙ୍କର ଷଡ଼ଯନ୍ତ୍ରର ପର୍ଦ୍ଦାଫାଶ କରିଛି।
ପୋଲିସ ତଦନ୍ତରୁ ଜଣାପଡ଼ିଛି ଯେ, ମୁଖ୍ୟ ଅଭିଯୁକ୍ତ ଆୟୁଷୀ ଶର୍ମା ନିଜ ମାଆ ନୀରଜ ଶର୍ମାଙ୍କ ମୃତ୍ୟୁ ପରେ ଅନୁକମ୍ପାମୂଳକ ଭାବେ ସରକାରୀ ଚାକିରି ପାଇବାକୁ ଚାହୁଁଥିଲେ। ଆୟୁଷୀଙ୍କ ପିତା ବିଜୟ କୁମାର ଶର୍ମା କୋର୍ଟରେ ଜଣେ ଲୋୟର ଡିଭିଜନ କ୍ଲର୍କ (LDC) ଥିଲେ, ଯାହାଙ୍କର ଗୋଟିଏ ବର୍ଷ ପୂର୍ବେ ମୃତ୍ୟୁ ହୋଇଯାଇଥିଲା। ତାଙ୍କ ସ୍ଥାନରେ ମାଆ ନୀରଜ ଶର୍ମାଙ୍କୁ ଅନୁକମ୍ପାମୂଳକ ଚାକିରି ମିଳିଥିଲା। ଆୟୁଷୀ ନିଜେ ଏହି ଚାକିରି କରିବାକୁ ଚାହୁଁଥିଲେ ଏବଂ ନିଜ ଭବିଷ୍ୟତ ନଷ୍ଟ ହେବା ପାଇଁ ମାଆକୁ ଦାୟୀ ଭାବୁଥିଲେ।
ଏହା ବ୍ୟତୀତ, ନୀରଜ ଶର୍ମାଙ୍କ ନାମରେ ଜୟପୁରରେ ପ୍ରାୟ ୪ କୋଟି ଟଙ୍କାର ଦୁଇଟି ମାଲିକାନା ଘର ଏବଂ ଭରତପୁର ହାଇୱେରେ ପ୍ରାୟ ୧୦ କୋଟି ଟଙ୍କାର ମୂଲ୍ୟବାନ ଜମି ଥିଲା। ଏହି ସବୁ ସମ୍ପତ୍ତିକୁ ଆୟୁଷୀ ଏବଂ ତାଙ୍କର ସମ୍ପର୍କୀୟମାନେ ହଡ଼ପ କରିବାକୁ ଯୋଜନା କରିଥିଲେ।
ଡିସିପି ରଞ୍ଜିତା ଶର୍ମାଙ୍କ ସୂଚନା ଅନୁଯାୟୀ, ଏହି ଭୟଙ୍କର ହତ୍ୟାକାଣ୍ଡର ଷଡ଼ଯନ୍ତ୍ର ପ୍ରାୟ ତିନି ମାସ ପୂର୍ବରୁ ରଚାଯାଇଥିଲା। ଆୟୁଷୀ ଏହି ଷଡ଼ଯନ୍ତ୍ରରେ ନିଜ ବଡ଼ବାପା ମୋହନ ଏବଂ ଦାଦାପୁଅ ଭାଇ ବଳରାମ ଓରଫ ରବିଙ୍କୁ ସାମିଲ କରିଥିଲେ। ସେମାନେ ବୟାନାର ବାସିନ୍ଦା ହେମନ୍ତ ଶର୍ମାଙ୍କୁ ୭ ଲକ୍ଷ ଟଙ୍କାର ସୁପାରି ଦେଇ ହତ୍ୟାର ଚୁକ୍ତି କରିଥିଲେ। ହେମନ୍ତ ଏହି କାମ ପାଇଁ ନିଜର ଅନ୍ୟ ଚାରିଜଣ ସହଯୋଗୀ ଆକାଶ ଶର୍ମା, ଅରବିନ୍ଦ ଶର୍ମା, ମୋହିତ ଶର୍ମା ଏବଂ ରୋହିତ ଜାଟବଙ୍କୁ ନିଜ ସହ ମିଶାଇଥିଲା।
୩ ଜୁଲାଇ ୨୦୨୬ ସଞ୍ଜ ପ୍ରାୟ ୪ଟା ୪୫ ମିନିଟ ସମୟରେ, ଯେତେବେଳେ ନୀରଜ ଶର୍ମା ନିଜର ଦିବ୍ୟାଙ୍ଗ ପୁଅକୁ କୋଚିଂ କ୍ଲାସରେ ଛାଡ଼ି ପାଦରେ ଚାଲି ଚାଲି ଘରକୁ ଫେରୁଥିଲେ, ସେତିକିବେଳେ ପୂର୍ବ ଯୋଜନା ମୁତାବକ ଅଭିଯୁକ୍ତମାନେ ଏକ ହରିୟାଣା ନମ୍ବର ବିଶିଷ୍ଟ ଧଳା ରଙ୍ଗର ସ୍କର୍ପିଓ ଗାଡ଼ିରେ ତାଙ୍କୁ ଧକ୍କା ଦେଇଥିଲେ। ଗାଡ଼ିର ଗତି ପ୍ରାୟ ୧୨୦ ରୁ ୧୩୦ କିଲୋମିଟର ପ୍ରତି ଘଣ୍ଟା ଥିଲା। ଧକ୍କା ଏତେ ଜୋରଦାର ଥିଲା ଯେ ନୀରଜ ଶର୍ମା ଶୂନ୍ୟରେ ଉଡ଼ିଯାଇ ପ୍ରାୟ ୧୦୦ ଫୁଟ ଦୂରରେ ପଡ଼ିଥିଲେ ଏବଂ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଯାଇଥିଲା।
Odisha’s No.1 Odia Daily
