ଆରଡି, ୧୯ା୭, (ଡି.ଏନ.ଏ.)-ଭଦ୍ରକ ଜିଲା ଚାନ୍ଦବାଲି ବ୍ଲକର ଆରଡି ଅଞ୍ଚଳରେ ଏବେ ମେଗା ଜଳପ୍ରକଳ୍ପ ନିର୍ମାଣାଧୀନ କାର୍ଯ୍ୟକୁ ନେଇ ସଙ୍କଟ ଉପୁଜିଛି। ଆଖଣ୍ଡଳ ମଣି – ଭଦ୍ରକ, ଆଖଣ୍ଡଳମଣି-ଯାଜପୁର ରାସ୍ତା ପାର୍ଶ୍ୱ ଏବେ ଠିକାଦାର ନିଜ ଇଚ୍ଛା ଅନୁସାରେ ଖୋଳି ଚାଲିଛନ୍ତି। ଜେସିବି ଲଗାଇ ରାସ୍ତା ପାର୍ଶ୍ୱ ଖୋଳିବା ସହ ସେହି ମାଟିକୁ ରାସ୍ତା ଉପରେ ପକାଇ ରଖୁଛନ୍ତି। ପ୍ରାୟ ୧ କି.ମି. ଯାଏ ଖୋଳି ସାରିବା ପରେ ୨ରୁ ୩ ଦିନ ପରେ ସେଠାରେ ପାଇପ ବିଛାଣ କରାଯାଉଥିବା ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି। ଓଳଗ ପଞ୍ଚାୟତର ସାଠିବାଙ୍କୁଡା ନିକଟରେ ପୂର୍ବରୁ ଥିବା ପାନୀୟଜଳ ପ୍ରକଳ୍ପ ପାଇପ ରାସ୍ତା ପାର୍ଶ୍ୱ ଖୋଳାଯୋଗୁ ଫାଟି ଯାଇଛି। ଫଳରେ ଓଳଗ ଜଳ ପ୍ରକଳ୍ପ ଉପରେ ନିର୍ଭର କରୁଥିବା କୁଳେଇପଦା, ମଠଡିହ, ଅମୃତମଣୋହି, ସାଠିବାଙ୍କୁଡା ଆଦି ଗାଁର ଲୋକମାନେ ୨ଦିନ ହେଲା ପାଣି ପାଇପାରୁ ନାହାନ୍ତି।
ସେହିପରି ରାସ୍ତାରେ ମାଟି ପଡିଥିବାରୁ ବର୍ଷା ହେଲେ ବାଇକ ଓ ସାଇକେଲ ଚାଳକଙ୍କ ଜୀବନ ପ୍ରତି ବିପଦ ସୃଷ୍ଟି ହୋଇଛି। ରାସ୍ତା ପାର୍ଶ୍ୱ ଖୋଳା ହୋଇଥିବା ଯୋଗୁ ଗାଈଗୋରୁ ବିଭିନ୍ନ ସମୟରେ ପଶିଯାଇ କ୍ଷତ ବିକ୍ଷତ ହେଉଛନ୍ତି। ଏଠାରେ କୋଭିଡ ନିୟମ ଊଲ୍ଲଂଘନ କରି ଠିକାଦାର ସ୍ଥାନୀୟ ଅଞ୍ଚଳର ଶ୍ରମିକଙ୍କୁ କାମରେ ନଲଗାଇ ବାହାର ସ୍ଥାନର ଶ୍ରମିକ ମାନଙ୍କୁ ନେଇ କାମ କରୁଛନ୍ତି। ଯାହାଦ୍ୱାରା କୋଭିଡ ବ୍ୟାପିବାର ସମ୍ଭାବନା ଦେଖାଦେଇଛି। ଏଥିରେ ଜିଲା ପ୍ରଶାସନ ହସ୍ତକ୍ଷେପ କରି ସେହି ଠିକାଦାରଙ୍କ ବିରୋଧରେ କାର୍ଯାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ଅଞ୍ଚଳରେ ଦାବି କରାଯାଇଛି। ଏ ସମ୍ପର୍କରେ ଚାନ୍ଦବାଲି ତହସିଲଦାର ସୁଶାନ୍ତକୁମାର ସୁତାରଙ୍କୁ ପଚରିବାରୁ ମେଗା ଜଳପ୍ରକଳ୍ପ କାର୍ଯ୍ୟ ନିର୍ଦ୍ଦିଷ୍ଟ ନିୟମାନୁସାରେ ଚାଲିବା ଉଚିତ। ତେବେ ଏ ସମ୍ପର୍କରେ ସେ ଅବଗତ ନାହାନ୍ତି। ତଦନ୍ତ କରି କାର୍ଯାନୁଷ୍ଠାନ ଗ୍ରହଣ କରାଯିବ ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।
