ନୂଆଦିଲ୍ଲୀ, ୧।୭- ଆତଙ୍କବାଦୀ ଆକ୍ରମଣ କାରଣରୁ ଭାରତ ଓ ପାକିସ୍ତାନ ମଧ୍ୟରେ ବହୁବର୍ଷ ହେବ ଦ୍ୱିପାକ୍ଷିକ କ୍ରିକେଟ୍ ସିରିଜ ଅନୁଷ୍ଠିତ ହୋଇନାହିଁ। ଦୁଇଦେଶର କ୍ରିକେଟ୍ ପ୍ରଶଂସକ ଏବେବି ଚାହିଁ ରହିଛନ୍ତି ଯେ କେବେ ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ ସିରିଜ ଆରମ୍ଭ ହେବ ଏବଂ ସେମାନେ ଏକ ରୋମାଞ୍ଚକ ମ୍ୟାଚ୍ର ମଜା ଉଠାଇବେ। ଦୁଇ ଦେଶ ମଧ୍ୟରେ ଯେବେବି କ୍ରିକେଟ୍ ମ୍ୟାଚ୍ ଅନୁଷ୍ଠିତ ହୋଇଛି ସେତେବେଳେ ରୋମାଞ୍ଚ ଶୀର୍ଷସ୍ତରରେ ପହଞ୍ଚତ୍ଥାଏ। ବିଶେଷ କରି ପଡ଼ିଆ ମଧ୍ୟରେ ଉଭୟ ଦଳର ଖେଳାଳିଙ୍କ ମଧ୍ୟରେ ଝଗଡ଼ା ଲାଗିବାର ଅନେକ ଦୃଷ୍ଟାନ୍ତ ମଧ୍ୟ ରହିଛି। କିନ୍ତୁ ଭାରତ ଓ ପାକିସ୍ତାନ ଖେଳାଳିଙ୍କ ମଧ୍ୟରେ ଉତ୍ତମ ବନ୍ଧୁତା ମଧ୍ୟ ରହିଛି। ଯାହାକୁ ହୁଏତ ଅନେକ ପ୍ରଶଂସକ ଜାଣି ନ ଥିବେ। ୨୦୦୪ ମସିହାରେ ଭାରତ ଯେତେବେଳେ ଦ୍ୱିପାକ୍ଷିକ ସିରିଜ ଖେଳିବା ଲାଗି ପାକିସ୍ତାନ ଗସ୍ତରେ ଯାଇଥିଲା ସେତେବେଳେ ପାକିସ୍ତାନ ଅଧିନାୟକ ଇଞ୍ଜାମାମ ଉଲ୍ ହକ୍ ସମସ୍ତ ଭାରତୀୟ ଖେଳାଳିଙ୍କୁ ଟି-ଶାର୍ଟ ଉପହାର ଆକାରରେ ପ୍ରଦାନ କରିଥିବା ଜଣାପଡ଼ିଛି। ନିକଟରେ ଏକ ସାକ୍ଷାତ୍କାର ଅବସରରେ ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ଆକାଶ ଚୋପ୍ରା ଏହି ଘଟଣାର ଖୁଲାସା କରିଛନ୍ତି। ଆକାଶ କହିଛନ୍ତି, ‘୨୦୦୪ରେ ଯେତେବେଳେ ଆମେ ପାକିସ୍ତାନ ଗସ୍ତରେ ଯାଇଥିଲୁ ସେତେବେଳେ ଇଞ୍ଜି ଭାଇ ତାଙ୍କ ଘରକୁ ପୁରା ଟିମ୍କୁ ନିମନ୍ତ୍ରଣ କରିଥିଲେ। ସେତେବେଳେ ତାଙ୍କର ଏକ ଗାର୍ମେଣ୍ଟ ଫ୍ୟାକ୍ଟ୍ରିର ଥିଲା। ଯେଉଁଠାରେ ଟି-ଶାର୍ଟ ପ୍ରସ୍ତୁତ କରାଯାଉଥିଲା। ସେ ଆମ ପାଖକୁ ଆସି ଟି-ଶାର୍ଟର ଏକ ବଣ୍ଡଲ୍ ଦେଇଥିଲେ। ସେତେବେଳେ ପୁରା ଦଳ ଏହି ଟି-ଶାର୍ଟ ବ୍ୟବହାର କରିଥିଲେ। ଇଞ୍ଜି ଭାଇ କହିଥିଲେ ଯେତେବେଳେ ଖେଳାଳି ଓ ଟିମ୍ କଥା ଉଠିଥାଏ ତେବେ କୌଣସି ସମସ୍ୟା ନାହିଁ। ଆମେ ସମସ୍ତେ ଖେଳାଳି ଓ ଭଲ ବନ୍ଧୁ’।
