ଶ୍ରୀନଗର, ୫।୮: ଜମ୍ମୁ-କଶ୍ମୀରର ନିୟନ୍ତ୍ରଣ ରେଖାରେ ଭାରତୀୟ ସେନା ପାକିସ୍ତାନକୁ କଡ଼ା ଜବାବ ଦେଇଛନ୍ତି। ଲଗାତାର ଅସ୍ତ୍ରବିରତି ଉଲ୍ଲଂଘନ କରୁଥିବା ପାକିସ୍ତାନୀ ସୈନ୍ୟ ଭାରତୀୟ ସେନାଙ୍କ ପାଲଟା ଜବାବରେ ସ୍ତବ୍ଧ ହୋଇଯାଇଛନ୍ତି। ପୁଞ୍ଚ୍ ଜିଲାର କ୍ରିଷ୍ଣାଘାଟି ଏବଂ ମାନକୋଟ ସେକ୍ଟର ଉପରେ ପାକିସ୍ତାନର ଫରଓ୍ବାର୍ଡ ପୋଷ୍ଟରୁ ମୋର୍ଟାର ଶେଲିଂ ମାଡ଼ କରାଯାଇଥିଲା। ଏହାର ଜବାବରେ ଭାରତୀୟ ସେନା ପକ୍ଷରୁ ଗୁଳିଗୋଳା ମାଡ଼ ଆରମ୍ଭ ହୋଇଥିଲା। ଏଥିରେ ତତ୍ତାପାଣି ଅଞ୍ଚଳରେ ଥିବା ପାକିସ୍ତାନୀ ସୈନ୍ୟ ଶିବିର ଧ୍ୱଂସ ହେବା ସହିତ ୧୦ରୁ ଅଧିକ ସୈନ୍ୟଙ୍କ ମୃତ୍ୟ ଘଟିଥିବା କୁହାଯାଉଛି। ବହୁ ପାକିସ୍ତାନୀ ସୈନ୍ୟ ଆହତ ହୋଇଥିବା ଭାରତୀୟ ସେନା ପକ୍ଷରୁ କୁହାଯାଇଛି। ଆହତଙ୍କ ମଧ୍ୟରେ କେତେକଙ୍କ ଅବସ୍ଥା ଗୁରୁତର ଥିବା ଭାରତୀୟ ସେନା କହିଛି। ଅଚାନକ ପାକିସ୍ତାନ ଫରଓ୍ବାର୍ଡ ପୋଷ୍ଟରୁ ମୋର୍ଟାର ଶେଲିଂ ମାଡ ହେବାର ସୀମାରେ ଥିବା ଗ୍ରାମବାସୀ ଦୌଡ଼ି ବଙ୍କର ମଧ୍ୟରେ ପଶି ଯାଇଥିଲେ। ସେମାନେ ସୁରକ୍ଷିତ ଥିବା ଭାରତୀୟ ସେନା କହିଛି।
