ନୂଆଦିଲ୍ଲୀ,୧୩ ।୧୨: ରାଜନୀତିରେ ଏବେ ଅପରାଧି ନେତାଙ୍କ ସଂଖ୍ୟା ବଢିବାରେ ଲାଗିଛି । ୧୯୮୦ ଦଶକରୁ ରାଜନୀତିରେ ଅପରାଧିଙ୍କ ଏଣ୍ଟ୍ରି ପରଠାରୁ ଧିରେ ଧିରେ ଏହା ବ୍ୟାପକ ରୂପ ନେଲାଣି । ଅପରାଧିଙ୍କୁ ରାଜନୀତି କରିବାକୁ ରୋକିବା ଲାଗି ବହୁ ନିୟମ କାନୁନ କରାଯାଇଛି, ହେଲେ ସମସ୍ତ ନିୟମ ଯେମିତି କେବଳ କାଗଜ କଲମରେ ରହିଯାଇଛି । ଗୁଜରାଟ, ହିମାଚଳ ପ୍ରଦେଶର ଜାତା ସୂଚନା ଏହାର ସାକ୍ଷି ହୋଇଛି ।
ଏଡିଆରର ରିପୋର୍ଟ ଅନୁଯାୟୀ, ଗୁଜରାଟରେ ୧୮୨ରୁ ୪୦ ନୂଆ ବିଧାୟକଙ୍କ ବିରୋଧରେ ଆପରାଧିକ ମାମଲା ରହିଛି । ଏଥିରୁ ୨୯ ବିଧାୟକଙ୍କ ଉପରେ ଗୁରୁତର ଧାରାରେ ମାମଲା ଚାଲୁ ରହିଛି । ସେପଟେ ହିମାଚଳ ପ୍ରଦେଶରେ ବି ୬୮ ବିଧାୟକଙ୍କ ମଧ୍ୟରୁ ୨୮ ହେଉଛନ୍ତି ଦାଗି । ୧୨ ଜଣ ବିଧାୟକଙ୍କ ଉପରେ ହତ୍ୟା, ବଳାତ୍କାର ଭଳି ସଙ୍ଗିନ ଅପରାଧ ଧାରାରେ କେଶ ଚାଲିଛି ।
ନ୍ୟାଶନାଲ ଇଲେକ୍ସନ ୱାଚ ଓ ଏଡିଆର ୨୦୧୯ ଲୋକ ସଭା ନିର୍ବାଚନ ପରେ ଅପରାଧି ଛବି ଥିବା ଏମପିଙ୍କ ସଂଖ୍ୟା ଜାରି କରିଥିଲା । ରିପୋର୍ଟ ଅନୁଯାୟୀ, ୨୦୦୯ରେ ଗୁରୁତର ଅପରାଧ ମାମଲାରେ ଜଡିତ ଥିବା ଏମପିଙ୍କ ସଂଖ୍ୟା ୭୬ ଥିଲା, ହେଲେ ୨୦୧୯ରେ ଏହା ବଢି ୧୫୯ରେ ପହଞ୍ଚିଯାଇଥିଲା ।
ଭାଜପାର ୩୩୯ ଏମପିଙ୍କ ମଧ୍ୟରୁ ୬୪, କଂଗ୍ରେସର ୯୭ ଜଣଙ୍କ ମଧ୍ୟରୁ ୮ ଓ ରାଷ୍ଟୀୟ ଜନତା ଦଳର ୯ରୁ ୬ ଜଣ ଲୋକ ସଭା ରାଜ୍ୟ ସଭା ଏମପିଙ୍କ ବିରୋଧରେ ଗୁରୁତର ଆପରାଧିକ ମାମଲା ରହିଛି । ଅର୍ଥାତ୍ ଦାଗି ନେତା ସବୁ ଦଳରେ ରହିଛନ୍ତି ।
