କାଠମାଣ୍ଡୁ,୨୯।୮: ନେପାଳ-ତିବ୍ବତ ସୀମାରେ ହିମସ୍ଖଳନ ଏବଂ ଗ୍ଲେସିଅର୍ ଫାଟିବା ଯୋଗୁ ଆସିଥିବା ବିନାଶକାରୀ ବନ୍ୟା ନେପାଳରେ ଭୟଙ୍କର ତାଣ୍ଡବ ରଚିଛି। ଏହି ପ୍ରାକୃତିକ ବିପତ୍ତିରେ ବର୍ତ୍ତମାନ ସୁଦ୍ଧା ୬୨୬ ଜଣଙ୍କର ମୃତ୍ୟୁ ଘଟିଥିବା ବେଳେ ୨,୪୦୦ରୁ ଅଧିକ ଲୋକ ନିଖୋଜ ଅଛନ୍ତି। ସଙ୍କଟର ଏହି ସମୟରେ ଭାରତ ଦ୍ୱାରା ଯୋଗାଇ ଦିଆଯାଉଥିବା ବ୍ୟାପକ ସହାୟତା ପାଇଁ ନେପାଳ ସରକାର ଗଭୀର କୃତଜ୍ଞତା ଜ୍ଞାପନ କରିଛନ୍ତି। ନେପାଳର ଅର୍ଥମନ୍ତ୍ରୀ ସ୍ୱର୍ଣ୍ଣିମ ୱାଗ୍ଲେ ଭାରତର ଉଦ୍ୟମକୁ ଉଚ୍ଚ ପ୍ରଶଂସା କରିବା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଅତ୍ୟନ୍ତ ଉଦାର ବୋଲି ଅଭିହିତ କରିଛନ୍ତି। ଏହାସହ ନୂଆଦିଲ୍ଲୀ ନେପାଳର ବିପନ୍ନ ମୌଳିକ ଢାଞ୍ଚାର ପୁନଃନିର୍ମାଣ ପାଇଁ ମଧ୍ୟ ସମ୍ପୂର୍ଣ୍ଣ ସହଯୋଗ ଯୋଗାଇଦେବାକୁ ଆଶ୍ୱାସନା ଦେଇଥିବା ସେ ପ୍ରକାଶ କରିଛନ୍ତି।
ଗ୍ଲେସିଅର୍ ଫାଟିବା ଫଳରେ ଆସିଥିବା ପ୍ରବଳ କାଦୁଅ ଓ ମାଟିଅତଡ଼ା ମଧ୍ୟ ନେପାଳର ଡଜନ୍ ଡଜନ୍ ଗ୍ରାମ, ସେତୁ, ରାସ୍ତାଘାଟ ଏବଂ ଜଳବିଦ୍ୟୁତ୍ ପ୍ରକଳ୍ପଗୁଡ଼ିକୁ ସମ୍ପୂର୍ଣ୍ଣ ଛାରଖାର କରିଦେଇଛି। ପ୍ରଭାବିତ ଅଞ୍ଚଳରେ ଲଗାତାର ବର୍ଷା ଜାରି ରହିଥିବା ସତ୍ତ୍ୱେ ଉଦ୍ଧାରକାରୀ ଦଳ ସମୟ ସହ ବାଜି ଲଗାଇ ଲୋକଙ୍କୁ ଉଦ୍ଧାର କରୁଛନ୍ତି। ନେପାଳର ଅନୁରୋଧ କ୍ରମେ ଭାରତ ଏପର୍ଯ୍ୟନ୍ତ ୫୭.୬ ଟନ୍ ଅତ୍ୟାବଶ୍ୟକ ରିଲିଫ୍ ସାମଗ୍ରୀ ପଠାଇସାରିଛି। ଏହା ବ୍ୟତୀତ ହାଇଡ୍ରୋପାୱାର୍ ଟନେଲ୍ରେ ଫସିରହିଥିବା ଶ୍ରମିକଙ୍କୁ ବାହାର କରିବା ପାଇଁ ଭାରତରୁ ଡାକ୍ତର ଏବଂ ଟନେଲ୍ ରେସ୍କିୟୁ ବିଶେଷଜ୍ଞଙ୍କୁ ନେଇ ଗଠିତ ୧୧ ଜଣିଆ ଏକ ସ୍ୱତନ୍ତ୍ର ଟିମ୍ ମଧ୍ୟ ନେପାଳରେ ପହଞ୍ଚି କାର୍ଯ୍ୟ ଆରମ୍ଭ କରିଛି।
ଅର୍ଥମନ୍ତ୍ରୀ ୱାଗ୍ଲେ ଜଣାଇଛନ୍ତି ଯେ ନେପାଳ ସରକାର ଏହି ମହାସଙ୍କଟକୁ ତିନୋଟି ପର୍ଯ୍ୟାୟରେ ମୁକାବିଲା କରୁଛନ୍ତି। ପ୍ରଥମେ ଫସିରହିଥିବା ଲୋକଙ୍କ ଜୀବନ ବଞ୍ଚାଇବାକୁ ପ୍ରାଥମିକତା ଦିଆଯାଉଛି, ଯେଉଁଥିରେ ନେପାଳ ସେନା ହେଲିକପ୍ଟର ଜରିଆରେ ବର୍ତ୍ତମାନ ସୁଦ୍ଧା ୧,୯୩୦ ଜଣଙ୍କୁ ସୁରକ୍ଷିତ ଏୟାରଲିଫ୍ଟ କରିସାରିଛି। ଧୁଞ୍ଚେ, ରସୁୱା ଏବଂ ସ୍ୟାଫ୍ରୁ ବେସୀ ପରି ବାହ୍ୟଜଗତରୁ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଥିବା ଅଞ୍ଚଳଗୁଡ଼ିକରେ ଆକାଶମାର୍ଗରୁ ରିଲିଫ୍ ସାମଗ୍ରୀ ପହଞ୍ଚାଯାଉଛି। ଏହା ପରେ ଦ୍ୱିତୀୟ ପର୍ଯ୍ୟାୟରେ ପ୍ରଭାବିତଙ୍କ ପାଇଁ ଅସ୍ଥାୟୀ ଆଶ୍ରୟସ୍ଥଳ ନିର୍ମାଣ କରାଯିବ ଏବଂ ଶେଷ ପର୍ଯ୍ୟାୟରେ ଛାରଖାର ହୋଇଯାଇଥିବା ଭିତ୍ତିଭୂମିର ପୁନଃନିର୍ମାଣ କରାଯିବ।
୨୦୧୫ର ଭୟଙ୍କର ଭୂକମ୍ପ ସମୟର ସ୍ମୃତିଚାରଣ କରି ସ୍ୱର୍ଣ୍ଣିମ ୱାଗ୍ଲେ କହିଛନ୍ତି ଯେ ସେତେବେଳେ ମଧ୍ୟ ସେ ସରକାରଙ୍କ ଅଂଶ ଥିଲେ ଏବଂ ଭାରତର ସହାୟତା ଅତ୍ୟନ୍ତ ପ୍ରଶଂସନୀୟ ଥିଲା। ଭାରତ ସରକାର ଓ ପ୍ରଧାନମନ୍ତ୍ରୀ ମୋଦିଙ୍କ ସହଯୋଗୀ ମନୋଭାବ ସବୁବେଳେ ନେପାଳ ସହ ରହିଆସିଛି। ଏଥର ମଧ୍ୟ କ୍ଷତିଗ୍ରସ୍ତ ଅଞ୍ଚଳଗୁଡ଼ିକର ପୁନଃନିର୍ମାଣ ପାଇଁ ଭାରତରୁ ମଜବୁତ ଏବଂ ଅଭୂତପୂର୍ବ ସହଯୋଗ ମିଳିବ ବୋଲି ସେ ଗଭୀର ଆଶା ପ୍ରକାଶ କରିଛନ୍ତି।
