ନୂଆଦିଲ୍ଲୀ,୧୩।୬:ଓମାନ ଉପକୂଳ ନିକଟରେ ଏକ ବାଣିଜି୍ୟକ ଜାହାଜ ଉପରେ ଆମେରିକା ନୌସେନାର କାର୍ଯ୍ୟାନୁଷ୍ଠାନରେ ୩ ଜଣ ଭାରତୀୟ ନାବିକଙ୍କ ମୃତ୍ୟୁ ପରେ ଭାରତ ଆମେରିକା ନିକଟରେ କଡ଼ା ପ୍ରତିବାଦ ଜଣାଇଛି। ବୈଦେଶିକ ମନ୍ତ୍ରୀ ଏସ. ଜୟଶଙ୍କର ଆମେରିକାର ବୈଦେଶିକ ସଚିବ ମାର୍କୋ ରୁବିଓଙ୍କ ସହ ଫୋନ ଯୋଗେ କଥା ହୋଇ ଭାରତର ଅସନ୍ତୋଷ ପ୍ରକାଶ କରିଛନ୍ତି। ସେ କହିଛନ୍ତି ଯେ, ବାଣିଜି୍ୟକ ଜାହାଜ ବିରୋଧରେ ଏପରି ଘାତକ ସାମରିକ କାର୍ଯ୍ୟାନୁଷ୍ଠାନ ଯେକୌଣସି ପରିସ୍ଥିତିରେ ଅନୁଚିତ। ଭାରତ କୂଟନୈତିକ ସ୍ତରରେ ମଧ୍ୟ ଏହି ଘଟଣା ଉପରେ ଦୃଢ଼ ମତ ପୋଷଣ କରିଛି।
ବୈଦେଶିକ ମନ୍ତ୍ରୀ ଏସ. ଜୟଶଙ୍କର ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଶେୟାର କରିଛନ୍ତି, ସେ ଆମେରିକାର ବୈଦେଶିକ ସଚିବ ମାର୍କୋ ରୁବିଓଙ୍କ ସହ କଥା ହୋଇଛନ୍ତି ଏବଂ ଉପସାଗରୀୟ ଅଞ୍ଚଳରେ ଆମେରିକା ନୌସେନାର କାର୍ଯ୍ୟାନୁଷ୍ଠାନରେ ୩ ଜଣ ଭାରତୀୟ ନାବିକଙ୍କ ମୃତ୍ୟୁ ସମ୍ପର୍କରେ ଭାରତର ପ୍ରତିବାଦକୁ ପୁନରାବୃତ୍ତି କରିଛନ୍ତି। ବାଣିଜି୍ୟକ ଜାହାଜକୁ ଟାର୍ଗେଟ କରିବା ଗ୍ରହଣୀୟ ନୁହେଁ ଏବଂ ଏପରି ଘଟଣା ବିଶ୍ୱ ସାମୁଦ୍ରିକ ସୁରକ୍ଷା ଉପରେ ଗମ୍ଭୀର ପ୍ରଭାବ ପକାଏ।
ଘଟଣା ପରେ, ଭାରତର ବୈଦେଶିକ ମନ୍ତ୍ରଣାଳୟ ଦ୍ୱିତୀୟ ଥର ପାଇଁ ନୂଆଦିଲ୍ଲୀରେ ଆମେରିକୀୟ କୂଟନୀତିଜ୍ଞ ଜେସନ ମିକ୍ସଙ୍କୁ ସମନ କରିଛି। ବାଣିଜି୍ୟକ ଜାହାଜ ଉପରେ ଆକ୍ରମଣକୁ ‘ଗମ୍ଭୀର ଚିନ୍ତାଜନକ’ବୋଲି ବର୍ଣ୍ଣନା କରି, ଭାରତ ଆମେରିକା ନିକଟରେ ଏହି ପ୍ରସଙ୍ଗକୁ ଦୃଢ଼ ଭାବରେ ଉଠାଇଛି ଏବଂ ଭବିଷ୍ୟତରେ ଏପରି ଘଟଣା ରୋକିବା ପାଇଁ ପଦକ୍ଷେପ ନେବାକୁ ଦାବି କରିଛି।
ସଂଯୁକ୍ତ ରାଷ୍ଟ୍ର ଏବଂ ଅନ୍ତର୍ଜାତୀୟ ସାମୁଦ୍ରିକ ସଂଗଠନ (IMO) ସମେତ ଅନେକ ଅନ୍ତର୍ଜାତୀୟ ସଂସ୍ଥା ଏହି ଘଟଣା ପରେ ଆମେରିକାର କାର୍ଯ୍ୟାନୁଷ୍ଠାନକୁ ସମାଲୋଚନା କରିଛନ୍ତି। IMO କହିଛି ଯେ, ଅନ୍ତର୍ଜାତୀୟ ଜାହାଜ ଚଳାଚଳ ଏବଂ ନାବିକମାନଙ୍କ ସୁରକ୍ଷାକୁ ଯେକୌଣସି ମୂଲ୍ୟରେ ସମ୍ମାନ କରାଯିବା ଉଚିତ। ସଂଗଠନର ମହାସଚିବ, ଆର୍ସେନିଓ ଡୋମିଙ୍ଗୁଏଜ କହିଛନ୍ତି ଯେ, ନାବିକମାନଙ୍କ ଜୀବନକୁ ବିପଦରେ ପକାଇଥିବା ଯେକୌଣସି କାର୍ଯ୍ୟକୁ ଦୃଢ଼ ନିନ୍ଦା କରାଯିବା ଉଚିତ।
କିଛି ଦିନ ପୂର୍ବରୁ, ଆମେରିକା ନୌସେନା ଓମାନ ଉପକୂଳ ନିକଟରେ ପାଲାଉ-ପତାକାଯୁକ୍ତ ତୈଳ ଟ୍ୟାଙ୍କର ‘MT ସେଟେବେଲୋ’ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ଜାହାଜରେ ମୋଟ ୨୪ ଜଣ ଭାରତୀୟ କ୍ରୁ ସଦସ୍ୟ ଥିଲେ। ୨୧ ଜଣଙ୍କୁ ସୁରକ୍ଷିତ ଭାବରେ ଉଦ୍ଧାର କରାଯାଇଥିଲା, ତିନି ଜଣ ଭାରତୀୟ ନାବିକଙ୍କ ମୃତ୍ୟୁ ନିଶ୍ଚିତ ହୋଇଥିଲା। ତିନି ଜଣ ଭାରତୀୟ ନାବିକ ନିହତ ହୋଇଥିଲେ।
ଆକ୍ରମଣରେ ପ୍ରାଣ ହରାଇଥିବା ଭାରତୀୟ ନାବିକମାନଙ୍କୁ ଡେକ କ୍ୟାଡେଟ ଆଦିତ୍ୟ ଶର୍ମା, ଇଞ୍ଜିନ ଫିଟର ଶିବାନନ୍ଦ ଚୌରାସିଆ ଏବଂ ମୁଖ୍ୟ ଇଞ୍ଜିନିୟର ପାଟନାଲା ସୁରେଶ ଭାବରେ ଚିହ୍ନଟ କରାଯାଇଛି। ସେମାନଙ୍କ ପରିବାର ଏବଂ ଭାରତ ସରକାର ଏହି ଘଟଣାରେ ଗଭୀର ଦୁଃଖ ପ୍ରକାଶ କରିଛନ୍ତି।
ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଛନ୍ତି ଯେ, ଭାରତୀୟ କର୍ମଚାରୀଙ୍କ ସହିତ ବାଣିଜ୍ୟ ଜାହାଜ ଉପରେ ଏପରି ଆକ୍ରମଣ ତୁରନ୍ତ ବନ୍ଦ ହେବା ଉଚିତ। ସେ ଏହି ଅଞ୍ଚଳରେ ଶାନ୍ତି ଏବଂ ସ୍ଥିରତା ଫେରାଇ ଆଣିବା ପାଇଁ ଆଲୋଚନା ଏବଂ କୂଟନୈତିକ ସମାଧାନର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।
Dharitri – Odisha’s No.1 Odia Daily
