ହାଇଦ୍ରାବାଦ,୧୫।୧୦: ୱେଷ୍ଟଇଣ୍ଡିଜ ବିପକ୍ଷ ଚତୁର୍ଥ ଟି-୨୦ ମ୍ୟାଚ୍ରେ ପରାଜୟ ସତ୍ତ୍ୱେ ଭାରତୀୟ କ୍ରିକେଟ ଦଳ ନିଜ ନାଁରେ ଏକ ବଡ଼ ରେକର୍ଡ କରିଛି। ଟି-୨୦ ଅନ୍ତର୍ଜାତୀୟ କ୍ରିକେଟ୍ରେ ୨୦୦୦ କିମ୍ବା ତା’ଠାରୁ ଅଧିକ ଛକା ମାରିବାରେ ଭାରତ ବିଶ୍ୱର ଦ୍ୱିତୀୟ ଦଳ ହୋଇଛି। ଏହା ସହ ଅନ୍ତର୍ଜାତୀୟ ଟି-୨୦ରେ ୪୦୦୦ ଚୌକା ମାରିବାରେ ମଧ୍ୟ ଭାରତ ପ୍ରଥମ ଦଳ ହେବାର ଗୌରବ ହାସଲ କରିଛି।
ଅକ୍ଟୋବର ୧୪ରେ ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମ୍ରେ ଭାରତ ଓ ୱେଷ୍ଟଇଣ୍ଡିଜ ମଧ୍ୟରେ ଚତୁର୍ଥ ଟି-୨୦ ମ୍ୟାଚ ଖେଳାଯାଇଥିଲା। ଏହି ମ୍ୟାଚ୍ରେ ଭାରତ ୨୪ ରନ୍ରେ ପରାସ୍ତ ହୋଇଥିଲେ ମଧ୍ୟ ଛକା ସଂଖ୍ୟାରେ ୨୦୦୦ ଅତିକ୍ରମ କରିଛି।
ଉପଲବ୍ଧ ତଥ୍ୟ ଅନୁସାରେ, ଭାରତ ୨୯୭ଟି ଅନ୍ତର୍ଜାତୀୟ ଟି-୨୦ ମ୍ୟାଚ୍ରେ ମୋଟ ୨୦୧୦ଟି ଛକା ମାରିଛି। ଏହି ତାଲିକାରେ ୱେଷ୍ଟଇଣ୍ଡିଜ ୨୦୨୬ଟି ଛକା ସହ ପ୍ରଥମ ସ୍ଥାନରେ ରହିଛି। ନ୍ୟୁଜିଲାଣ୍ଡ ୧୫୮୫ଟି ଛକା ସହ ତୃତୀୟ ସ୍ଥାନରେ ଅଛି।
ଅନ୍ତର୍ଜାତୀୟ ଟି-୨୦ରେ ସର୍ବାଧିକ ଛକା ମାରିଥିବା ଦଳ
– ୱେଷ୍ଟଇଣ୍ଡିଜ ୨୦୨୬ ଛକା
– ଭାରତ ୨୦୧୦ ଛକା
– ନ୍ୟୁଜିଲାଣ୍ଡ ୧୫୮୫ ଛକା
– ପାକିସ୍ତାନ ୧୫୦୭ ଛକା
– ଦକ୍ଷିଣ ଆଫ୍ରିକା ୧୪୦୭ ଛକା
ଛକା ରେକର୍ଡ ସହ ଭାରତୀୟ ଦଳ ଚୌକା କ୍ଷେତ୍ରରେ ମଧ୍ୟ ଇତିହାସ ରଚିଛି। ଅନ୍ତର୍ଜାତୀୟ ଟି-୨୦ରେ ୪୦୦୦ ଚୌକା ପୂରଣ କରିବାରେ ଭାରତ ପ୍ରଥମ ଦଳ ହୋଇଛି। ଏହି ତାଲିକାରେ ପାକିସ୍ତାନ ୩୭୨୨ଟି ଚୌକା ସହ ଦ୍ୱିତୀୟ ସ୍ଥାନରେ ରହିଛି।
ଅନ୍ୟପଟେ, ଚତୁର୍ଥ ଟି-୨୦ରେ ୱେଷ୍ଟଇଣ୍ଡିଜ ୨୪ ରନ୍ରେ ବିଜୟୀ ହେବା ପରେ ପାଞ୍ଚ ମ୍ୟାଚ ବିଶିଷ୍ଟ ସିରଜ୍ରେ ଉଭୟ ଦଳ ୨-୨ରେ ସମାନ ସ୍ଥିତିରେ ରହିଛନ୍ତି। ତେଣୁ ଶେଷ ମ୍ୟାଚ ଉଭୟ ଦଳ ପାଇଁ ନିର୍ଣ୍ଣାୟକ ହେବ।
Dharitri – Odisha’s No.1 Odia Daily
