ପାଖରେ ଟଙ୍କା ନ ଥିଲା, କିନ୍ତୁ କେରଳରୁ କଶ୍ମୀର ଯାଏ ଚା’ ବିକି ବିକି ସାଇକେଲରେ ଚାଲିଗଲେ ନିଧିନ ଏମ୍.କେ.। ଯିବା ସମୟରେ ଗୁଗଲ୍ ମ୍ୟାପ୍ ଥିଲା ତାଙ୍କ ଗାଇଡ୍। ଏଥିପାଇଁ ତାଙ୍କୁ ୧୦୦ ଦିନ ଲାଗିଛି। କେରଳର ଥ୍ରିସୁର୍ରୁ ବାହାରି ଜମ୍ମୁକଶ୍ମୀରରେ ପହଞ୍ଚିବା ଯାଏ ବାଟରେ କେବଳ ଚା’ବିକି ତାଙ୍କ ଖର୍ଚ୍ଚ ଉଠାଇଛନ୍ତି। ନିଧିନଙ୍କ ବୟସ ଏବେ ୨୩। ସେ ୩,୩୦୦ କି.ମି. ରାସ୍ତା ଅତିକ୍ରମ କରିପାରିଛନ୍ତି। ପ୍ରତିଦିନ ସକାଳ ୫.୩୦ରେ ସେ ତାଙ୍କ ଯାତ୍ରା ଆରମ୍ଭ କରନ୍ତି ଓ ଅପରାହ୍ନ ୪ଟା ଯାଏ ସାଇକେଲ ଚଳାନ୍ତି। ସୁବିଧାରେ ଚା’କରିବା ପାଇଁ ପାଣି ଓ କ୍ଷୀର ମିଳୁଥିତ୍ବା କୌଣସି ଏକ ଦୋକାନ ନିକଟରେ ଅଟକନ୍ତି। ବ୍ୟାଗରେ ନେଇଥିବା ଷ୍ଟୋଭ୍ ଓ ଚିନି,ଚା’ପାଉଡରରେ ୩୫ କପ୍ ଚା’ କରି ଏକ ଫ୍ଲାଶରେ ରଖିଥାନ୍ତି। ଚା’ ବିକି ଦିନକୁ ସେ ପାଖାପାଖି ୩୫୦ ଟଙ୍କା ରୋଜଗାର କରନ୍ତି। ଏଥିରେ ସେ ଖାଦ୍ୟ ଓ ଯାତ୍ରା ଲାଗି ଅନ୍ୟ ଆବଶ୍ୟକୀୟ ଜିନିଷ କିଣିଥାଆନ୍ତି। ବିନା ଚା’ରେ ଅନେକ ଲୋକ ତାଙ୍କୁ ଟଙ୍କା ବି ଦିଅନ୍ତି। ଚା’ବିକିବା ପରେ ନିଧିନ ନିକଟସ୍ଥ ପେଟ୍ରୋଲ ପମ୍ପ୍ରେ ଟେଣ୍ଟ ପକାଇ ରାତି କାଟନ୍ତି। ଅନେକ ସମୟରେ ଗୁଗଲ ମ୍ୟାପ ଫେଲ୍ ହେଲେ ସ୍ଥାନୀୟ ଲୋକମାନେ ତାଙ୍କୁ ବାଟ ବତାଇ ଦିଅନ୍ତି ବୋଲି କହନ୍ତି ନିଧିନ।
