ଅନେକ ସମୟରେ ଜଣେ ମହିଳା ପରିବାର ପ୍ରତିପୋଷଣର ଦାୟିତ୍ୱ ବହନ କରିବା ଲାଗି ଏକ ପୁରୁଷକୈନ୍ଦ୍ରିକ ପେସାକୁ ଆଦରିନେବାକୁ ବାଧ୍ୟ ହୋଇଥାନ୍ତି, ଯାହା ଘଟିଛି ଜାନ୍ସୀ ବି.ଭି.ଙ୍କ ଜୀବନରେ। ସେ ଅଟୋ ଚଳାଉଛନ୍ତି। ଉଲ୍ଲେଖନୀୟ ବିଷୟ ହେଉଛି, ସେ ଅଟୋ ଚଳାଇବା ସହ ଅନ୍ୟ ମହିଳାଙ୍କୁ ମାଗଣାରେ ଡ୍ରାଇଭିଂ ଟ୍ରେନିଂ ଦେଉଛନ୍ତି। ସ୍ବାବଲମ୍ବୀ ହେବା ଲାଗି ଜାନ୍ସୀଙ୍କୁ ବହୁ କଷ୍ଟ ସ୍ବୀକାର କରିବାକୁ ପଡ଼ିଛି। ତାଙ୍କୁ ବୟସ ୧୨ ବର୍ଷ ହୋଇଥିବାବେଳେ ତାଙ୍କ ପିତାଙ୍କ ମୃତ୍ୟୁ ହୋଇଥିଲା। ତାଙ୍କ ମା’ ଅନ୍ୟମାନଙ୍କ ଘରେ କାମ କରି ପରିବାର ଚଳାଇଥିଲେ। ଅଭାବରୁ ଜାନ୍ସୀ ଦଶମ ପରେ ଆଉ ପଢ଼ିପାରି ନ ଥିଲେ। ମା’ଙ୍କୁ ସାହାଯ୍ୟ କରିବା ସକାଶେ ସେ ଏକ କାରଖାନାରେ କାମ କରିଥିତ୍ଲେ। ବିବାହ ପରେ ତାଙ୍କ ସ୍ବାମୀଙ୍କ ପ୍ରେରଣାକ୍ରମେ ପ୍ରଶିକ୍ଷଣ ନେଇ ଅଟୋ ଚଳାଇବା ଲାଗି ବାହାରି ଆସିଥିଲେ। ପ୍ରଥମ ଦିନ ୭୦୦ ଟଙ୍କା ରୋଜଗାର କରିଥିଲେ। ସମୟକ୍ରମେ ତାଙ୍କ ରୋଜଗାର ବଢ଼ିଲା ଓ ସେ ଅନ୍ୟ ମହିଳାଙ୍କୁ ଏହି ପେସାକୁ ଆଣିବା ଲାଗି ୨୦୨୧ରେ ମାଗଣାରେ ପ୍ରଶିକ୍ଷଣ ଦେବା ଆରମ୍ଭ କରିଥିଲେ। ଏବେ ସୁଦ୍ଧା ସେ ୫୦ରୁ ଊର୍ଦ୍ଧ୍ୱ ମହିଳାଙ୍କୁ ପ୍ରଶିକ୍ଷଣ ଦେଇସାରିଲେଣି। ଏହି ମହିଳାମାନେ ଏବେ ସ୍ବାବଲମ୍ବୀ ହୋଇପାରିଛନ୍ତି। ଜାନ୍ସୀ କହନ୍ତି, ତାଙ୍କ ଛାତ୍ରୀଙ୍କ ସଫଳତା ହିଁ ତାଙ୍କୁ ଅଧିକ ଆନନ୍ଦ ଦେଇପାରିଛି।
