ନୂଆଦିଲ୍ଲୀ, ୨୭ା୯ (ପି.ଟି.)- ଗତ ମାସରେ କୋଭିଡ୍-୧୯ରେ ସଂକ୍ରମିତ ଭାରତର ୬ ଜଣ ପୁରୁଷ ହକି ଖେଳାଳି ଆରୋଗ୍ୟ ଲାଭ କରିବା ପରେ ଦଳର ଅବଶିଷ୍ଟ ଖେଳାଳିଙ୍କ ସହ ଟ୍ରେନିଂର ମୁଖ୍ୟ ସ୍ରୋତରେ ସାମିଲ ହୋଇଥିବା ମୁଖ୍ୟ କୋଚ୍ ଗ୍ରାହମ ରିଡ୍ ପ୍ରକାଶ କରିଛନ୍ତି। ଅଧିନାୟକ ମନପ୍ରୀତ ସିଂ, ସୁରେନ୍ଦର କୁମାର, ଯଶକରନ ସିଂ, ବରୁଣ କୁମାର, କ୍ରିଷନ ବାହାଦୁର ପାଠକ ଓ ମନଦୀପ ସିଂ ଅଗଷ୍ଟ ୧୭ରେ ବାଙ୍ଗାଲୋରର ଏକ ହସ୍ପିଟାଲରୁ ଛାଡ଼ ପାଇଥିଲେ। ଦଳ ସହିତ ଯୋଗଦେବା ପୂର୍ବରୁ ସେମାନଙ୍କୁ ଆଉ କିଛି ଦିନ କ୍ୱାରାଣ୍ଟାଇନ୍ରେ ରଖାଯାଇଥିଲା। ସେମାନେ ୨ରୁ ୩ ସପ୍ତାହ ହେଲା ଦଳ ସହିତ ମିଶି ଅନ୍ୟମାନଙ୍କ ଭଳି ଟ୍ରେନିଂ ନେଉଛନ୍ତି। କରୋନା ମୁକ୍ତ ଖେଳାଳିଙ୍କ ଧୀରେ ଧୀରେ ଟ୍ରେନିଂ ଆରମ୍ଭ କରିଥିଲେ। କ୍ରମେ ସେମାନଙ୍କ ଫିଟ୍ନେସ୍ ସ୍ତରରେ ଉନ୍ନତି ପରିଲକ୍ଷିତ ହେଉଛି ବୋଲି ହକି ଇଣ୍ଡିଆ ପକ୍ଷରୁ ଆୟୋଜିତ ଏକ ଓ୍ବେବିନାରରେ ଅଂଶଗ୍ରହଣ ପୂର୍ବକ ରିଡ୍ କହିଛନ୍ତି। କରୋନା ଏକ ସଂଘାତିକ ରୋଗ। କେତେକ କ୍ଷେତ୍ରରେ ନିଜେ ସୁସ୍ଥ ମନେ କରୁଥିଲେ ମଧ୍ୟ ବାସ୍ତବିକ କ୍ଷେତ୍ରରେ ତାହା ଜଣାପଡ଼ି ନ ଥାଏ। ରୋଗକୁ ଚିହ୍ନଟ କରାଯାଇ ଆବଶ୍ୟକ ଚିକିତ୍ସା କରାଯାଇପାରିଥିବାରୁ ମୁଁ ଖୁସି। ସମ୍ପୂର୍ଣ୍ଣ ଫିଟ୍ନେସ୍ ସ୍ତର ଫେରି ପାଇବା ଲାଗି କରୋନାମୁକ୍ତ ଖେଳାଳିଙ୍କୁ ଆହୁରି କିଛି ଦିନ ଲାଗିବ। ପରବର୍ତ୍ତୀ ୪-୫ ସପ୍ତାହରେ ସମସ୍ତ ଖେଳାଳିଙ୍କର ପୂରାମାତ୍ରାରେ ଟ୍ରେନିଂ ହେବ ବୋଲି ଅଷ୍ଟ୍ରେଲୀୟ ରିଡ୍ ପ୍ରକାଶ କରିଛନ୍ତି।
