ବିଷମକଟକ,୨୪ା୧(ଡି.ଏନ୍.ଏ.):ବିଷମକଟକ ବ୍ଲକ ଆଖପାଖ ଅଞ୍ଚଳରେ ଦିନକୁ ଦିନ ବେଆଇନ ମଦ କାରବାର ବୃଦ୍ଧିପାଉଛି। ଅବକାରୀ ବିଭାଗ ଓ ପୋଲିସର ନୀରବତା ଯୋଗୁ ନିର୍ଭୟରେ କାରବାର ଚାଲିଥିବା ଅଭିଯୋଗ ହେଉଛି। ବିଷମକଟକ ବ୍ଲକର ୨୧ ପଞ୍ଚାୟତ ଅଞ୍ଚଳରେ ରହିଥିବା ବିଭିନ୍ନ ଢାବା, ପାନଦୋକାନ, ଜଳଖିଆ ଦୋକାନ, ହୋଲେଟରେ ବେଆଇନ ଭାବେ ଦେଶୀ ଓ ବିଦେଶୀ ମଦ ବିକ୍ରି ହେଉଛି। ସମସ୍ତ ସ୍ଥାନରେ ବିଦେଶୀ ମଦଠାରୁ ଆରମ୍ଭକରି ଭାଟିମଦ ଏବଂ ବିଷାକ୍ତ ରନ୍ଧାମଦ ବ୍ୟବସାୟ ବଢ଼ିଚାଲିଛି। ଏମିତିକି ମଦ ବିକ୍ରିର ସମୟସୀମା ରହୁନାହିଁ। ୨୪ ଘଣ୍ଟା ମଦ ବିକ୍ରି ଯୋଗୁ ଆଇନଶୃଙ୍ଖଳା ପରିସ୍ଥିତି ମଧ୍ୟ ବିଗିଡ଼ିବାରେ ଲାଗିଛି। ଯୁବଗୋଷ୍ଠୀ ନିଶାରେ ଅପରାଧ ଦୁନିଆରେ ପାଦଦେବା ସହ ଦୁର୍ଘଟଣା ମଧ୍ୟ ବଢ଼ୁଛି।
ବେଆଇନ ମଦ କାରବାରକୁ ରୋକିବା ଅବକାରୀ ବିଭାଗ ଓ ପୋଲିସର ଦାୟିତ୍ୱ। ହେଲେ ବିଷମକଟକ ବ୍ଲକରେ ବେଆଇନ ମଦ କାରବାରରେ ରୋକ ଲାଗିପାରୁ ନ ଥିବାରୁ ଉଭୟ ବିଭାଗର କାର୍ଯ୍ୟକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ବ୍ଲକ ଅନ୍ତର୍ଗତ ୨୧ ପଞ୍ଚାୟତର ସମସ୍ତ ୨୭୧ ଗାଁରେ ଛୋଟ ପାନଦୋକାନଠାରୁ ଆରମ୍ଭକରି ସହରରେ ଥିବା ପ୍ରତ୍ୟେକ ସାହି ଓ ବିଷମକଟକ ଦେଇ ଯାଉଥିବା ମୁଖ୍ୟରାସ୍ତା, ରାୟଗଡ଼ାରୁ କଳାହାଣ୍ଡି ଓ କନ୍ଧମାଳ ଜିଲାକୁ ସଂଯୋଗ କରୁଥିବା ମୁଖ୍ୟରାସ୍ତା ସ୍ଥିତ ସମସ୍ତ ଢାବା, କୋର୍ଟ, ମେଡିକାଲ ସାମ୍ନା, ଚାଟିକଣା, ହଟାମୁନିଗୁଡ଼ା, ଡୁକୁମ, ସାହାଡ଼ା, କଙ୍କୁବାଡ଼ି, ଭାତପୁର ଏଭଳି ଅନେକ ପଞ୍ଚୟତରେ ଦେଶୀ, ବିଦେଶୀ ଓ ବିଷାକ୍ତ ରନ୍ଧାମଦ ଦୋକାନ ଖୋଲିଛି। ଅବକାରୀ ବିଭାଗର ନାକ ତଳେ ଅର୍ଥାତ୍ ଜାଣତରେ ଏସବୁ ଚାଲିଥିବା ଅଞ୍ଚଳର ବୁଦ୍ଧିଜୀବୀ ମତପ୍ରକାଶ କରିଛନ୍ତି। ବାରମ୍ବାର ଅଭିଯୋଗ କରିବା ପରେ ମଧ୍ୟ ଅବକାରୀ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବା ଜଣାପଡ଼ିଛି।
ଏ ନେଇ ଅବକାରୀ ବିଭାଗର ଅଧିକାରୀଙ୍କ ପ୍ରତିକ୍ରିୟା ନେବାରୁ, ଏ ପର୍ଯ୍ୟନ୍ତ ଗାଁରୁ କୌଣସି ଅଭିଯୋଗ ଆସି ନ ଥିବା ପ୍ରକାଶ କରିଛନ୍ତି। ଅଭିଯୋଗ ଆସିଲେ ପଦକ୍ଷେପ ନିଆଯିବ ବୋଲି କୁହାଯାଉଛି। ବିଷମକଟକ ବ୍ଲକଠାରୁ ମାତ୍ର ୧ କି.ମି. ଦୂର କଙ୍କୁବାଡ଼ି ପଞ୍ଚାୟତର ଏକ ଗ୍ରାମରେ ପ୍ରତ୍ୟେକ ଘରେ ରନ୍ଧାମଦ ବିକ୍ରି ହେଉଛି। ରାତାରାତି ବିଭିନ୍ନ ଉପାୟରେ ପଡ଼ୋଶୀ ବ୍ଲକ ଓ ପଞ୍ଚାୟତକୁ ପଠାଇ ଦିଆଯାଉଛି। ଏଠାରେ ଅବକାରୀ ବିଭାଗ କେମିତି ଜାଣିପାରୁ ନାହିଁ ତାହାକୁ ନେଇ ପ୍ରଶ୍ନ ଉଠିଛି।
