ଭଞ୍ଜନଗର,୧୪।୭(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର ସହରତଳି ବାଉଁଶଲୁଣ୍ଡି ରାଧାକୃଷ୍ଣ ପାଠାଗାରା ପକ୍ଷରୁ ରବିବାର ସନ୍ଧ୍ୟାରେ ସମ୍ବିଧାନର ମୁଖବନ୍ଧରୁ ଧର୍ମ ନିରପେକ୍ଷତା ଓ ସମାଜବାଦ ଶବ୍ଦର ଉଚ୍ଛେଦ କେତେ ଯଥାର୍ଥ? ଉପରେ ଏକ ଆଲୋଚନାଚକ୍ର ଅନୁଷ୍ଟିତ ହୋଇଯାଇଛି । ଏଥିରେ ପାଠାଗାର ସଭାପତି ନିରଞ୍ଜନ ପ୍ରଧାନ ସଭାପତିତ୍ୱ କରିଥିଲେ। ଭଞ୍ଜନଗର ବାର ଏସୋସିଏସନ ସଭାପତି ଲକ୍ଷ୍ମୀକାନ୍ତ ମହାପାତ୍ର ମୁଖ୍ୟ ଅତିଥି ଭାବେ ଯୋଗଦେଇ କହିଥିଲେ, ଇନ୍ଦିରା ଗାନ୍ଧୀ ପ୍ରଧାନମନ୍ତ୍ରୀ ଥିବା ସମୟରେ ୧୯୭୬ ମସିହାରେ ସମାଜବାଦ ଓ ଧର୍ମନିରପେକ୍ଷ ଦୁଇଟି ଶବ୍ଦ ସମ୍ବିଧାନର ମୁଖବନ୍ଧରେ ସ୍ଥାନିତ କରାଯାଇଛି। ସମ୍ବିଧାନ ସୁରକ୍ଷିତ ରହିଲେ ଗଣତନ୍ତ୍ର ସୁରକ୍ଷିତ ରହିବ ବୋଲି ସେ ଦୃଢୋକ୍ତି ପ୍ରକାଶ କରିଥିଲେ।
ବରିଷ୍ଠ ଆଇନଜୀବୀ ଅଭିମନ୍ୟୁ ଗୌଡ଼ ଆଲୋଚନା କହିଥିଲେ, ସୁପ୍ରିମକୋର୍ଟରେ ଉକ୍ତ ଶବ୍ଦ ଦୁଇଟିକୁ ସମ୍ବିଧାନର ମୁଖବନ୍ଧରୁ ଉଚ୍ଛେଦ ପାଇଁ ମକଦ୍ଦମା ହୋଇଥିଲେ ମଧ୍ୟ ସର୍ବୋଚ୍ଚ ନ୍ୟାୟାଳୟ ସ୍ଥାନିତ ଶବ୍ଦ ଦୁଇଟି ସମ୍ବିଧାନର ମୂଳ ଢାଞ୍ଚାର ବ୍ୟତିକ୍ରମ ନୁହେଁ, ବୋଲି କହି ମକଦ୍ଦମା ଖାରଜ କରିଦେଇଛନ୍ତି । ବର୍ତ୍ତମାନର ଶାସକମାନେ ଧର୍ମକୁ ରାଜନୀତି ସହିତ ଯୋଡି ବିଭିନ୍ନ ଧାର୍ମିକ କାର୍ଯ୍ୟରେ ଯୋଗ ଦେଉଛନ୍ତି । ଫଳରେ ସମ୍ବିଧାନର ମୌଳିକ ଧାରାକୁ ଏହା ଆଘାତ ଦେଉଛି । ବରିଷ୍ଠ ଆଇନଜୀବୀ ବୈଦ୍ୟନାଥ ସାହୁ କହିଥିଲେ, ସମ୍ବିଧାନର ମୁଖବନ୍ଧରେ ସ୍ଥାନିତ ହୋଇଥିବା ଉକ୍ତ ଦୁଇଟି ଶବ୍ଦକୁ ଉଚ୍ଛେଦ କରିବା ଅନାବଶ୍ୟକ। ଧର୍ମ ହେଉଛି ଜୀବନର ଅନୁସରଣ । ରାଷ୍ଟ୍ରର ନିର୍ଦ୍ଦିଷ୍ଟ ଧର୍ମ ନାହିଁ।
ସମ୍ମାନୀୟ ଅତିଥି ଭାବେ କବି ପ୍ରଶାନ୍ତ ମହାନ୍ତି ଯୋଗଦେଇ କହିଥିଲେ ଯେ, ଭାରତର ସାଧୀନତା ଆନ୍ଦୋଳନରେ ଜାତି, ସମ୍ପ୍ରଦାୟ ଓ ଧର୍ମ ନିର୍ବିଶେଷରେ ସମସ୍ତ ଭାରତୀୟ ଉପ ନିବେଶବାଦୀ ଇଂରେଜମାନଙ୍କ ବିରୁଦ୍ଧ ସଂଗ୍ରାମରେ ଅଂଶଗ୍ରହଣ କରିଥିଲେ । ତେଣୁ ସବୁ ଧର୍ମ ସମ୍ପ୍ରଦାୟକୁ ସମ୍ମାନ ଜଣାଇ ସମ୍ବିଧାନ ପ୍ରଣେତାମାନେ ଧର୍ମ ନିରପେକ୍ଷ ଦୂଷ୍ଟିଭଙ୍ଗୀକୁ ସମ୍ବିଧାନରେ ସ୍ଥାନିତ କରିଛନ୍ତି। ଆଜି ଯେଉଁମାନେ ଏହାକୁ ଉଚ୍ଛେଦ କରିବାକୁ ଦାବି କରୁଛନ୍ତି, ସେମାନଙ୍କର ସାଧୀନତା ଆନ୍ଦୋଳନରେ କିଛି ଭୂମିକା ନ ଥିଲା।
ବରିଷ୍ଠ ନାଗରିକ ମଞ୍ଚର ସଭାପତି ସୋମନାଥ ନାୟକ କହିଥିଲେ ଯେ, ସାମାଜିକ ଭାବେ ଶୋଷିତ, ଘୃଣିତ ପଛୁଆ ଓ ଅନଗ୍ରସର ଏବଂ ସଂଖ୍ୟାଲଘୁ ଲୋକମାନଙ୍କୁ ସାମାଜିକ ବୈଷମ୍ୟରୁ ମୁକ୍ତି ନିମିତ୍ତ ଓ ସେମାନଙ୍କୁ ବିକାଶର ପ୍ରତ୍ୟେକ କ୍ଷେତ୍ରରେ ସମାନ ସୁବିଧା ସୁଯୋଗ ପ୍ରଦାନ କରିବା ଆମ ସମ୍ବିଧାନର ମୌଳିକ ଲକ୍ଷ୍ୟ। ତେଣୁ ଉକ୍ତ ଦୁଇଟି ଶବ୍ଦ ସମ୍ବିଧାନର ମୁଖବନ୍ଧରେ ରହିବା ଯଥାର୍ଥ ବୋଲି ପ୍ରକାଶ କରୁଥିଲେ। ଆମ୍ବେଦକର ବିଚାର ମଂଚର ରାଜ୍ୟ ସ୍ତରୀୟ ସଂଗଠକ ସୁଧୀର ନାୟକ କହିଥିଲେ ଯେ, ଦଳିତ ଓ ଅନଗ୍ରସର ବର୍ଗଙ୍କୁ ରାଜନୈତିକ ସୁବିଧା ସୁଯୋଗ ସହିତ ସାମାଜିକ ଓ ଅର୍ଥନୈତିକ କ୍ଷେତ୍ରରେ ସମାନ ସୁବିଧା ସୁଯୋଗ ପ୍ରଦାନ କରିବା କଥା ଡ. ଭି. ଆର ଆମ୍ବେଦକରଙ୍କର ଦୃଷ୍ଟିଭଙ୍ଗୀ ଥିଲା। ତେଣୁ ଏହାର ବ୍ୟତିକ୍ରମ ହେଲେ ଉପେକ୍ଷିତ ସମ୍ପ୍ରଦାୟ ପ୍ରଚଳିତ ଶାସନ ବ୍ୟବସ୍ଥାର ଅନ୍ତଘଟାଇବାକୁ ଚେଷ୍ଟିତ ହେବେ।
ଅବସରପ୍ରାପ୍ତ ପ୍ରଧାନ ଶିକ୍ଷକ ପଦ୍ମ ଚରଣ ପ୍ରଧାନ, ନିରଞ୍ଜନ ପ୍ରଧାନ ଓ ସମ୍ପାଦକ ଭଞ୍ଜ କିଶୋର୍ ପ୍ରଧାନ ଆଲୋଚନାରେ ଅଂଶ ଗ୍ରହଣ କରି କହିଥିଲେ ଯେ, ୧୯୭୩ ମସିହାର କେଶବାନନ୍ଦ ଭାରତୀ ମକଦ୍ଦମାର ରାୟ ପରିପ୍ରେକ୍ଷିରେ ସମ୍ବିଧାନର ମୌଳିକ ଢାଞ୍ଚାର ର୍ନିଦ୍ଧାରଣ ହୋଇଯାଇଛି । ତଦନୁଯାୟୀ ଧର୍ମ ନିରପେକ୍ଷ ଓ ସମାଜବାଦ ଦୁଇଟି ଶବ୍ଦ ସମ୍ବିଧାନର ମୌଳିକ ଢାଞ୍ଚାର ଅଂଶ ବିଶେଷ ହୋଇଥିବା ଯୋଗୁଁ ଏହାର ଉଚ୍ଛେଦ ହେବା ଅନୁଚିତ। ସମ୍ବିଧାନର ମୌଳିକ ଢାଞ୍ଚାର ପରିବର୍ତ୍ତନ କରିବାର ପ୍ରୟାସ ଅର୍ଥ ଗଣତାନ୍ତ୍ରିକ ବ୍ୟବସ୍ଥା ଓ ସମ୍ବିଧାନ ପ୍ରତି ବିପଦର ସତର୍କ ଘଣ୍ଟି।
ଶିକ୍ଷକ ଜୟରାମ ଗୌଡ଼, ଅବସରପ୍ରାପ୍ତ ମୁଖ୍ୟ କିରାଣୀ ତାରିଣୀ ନାୟକ, ଶିକ୍ଷକ ଅରବିନ୍ଦ ସାହୁ, କୃଷ୍ଣ ବାଡତ୍ୟା, ଆମ୍ବେଦକର ବିଚାର ମଞ୍ଚର କର୍ମକର୍ତ୍ତା ପଞ୍ଚାନନ ନାୟକ , ସାହେବ ନାୟକ ଓ ଛାତ୍ର ଉତ୍ତମ ପ୍ରଧାନ ସମେତ ଅନ୍ୟମାନେ ଏ କାର୍ଯ୍ୟକ୍ରମରେ ଉପସ୍ଥିତ ଥିଲେ। ସମ୍ପାଦକ ଭଞ୍ଜ କିଶୋର ପ୍ରଧାନ କାର୍ଯ୍ୟକ୍ରମକୁ ସଂଯୋଜନା କରିବା ସହିତ ଧନ୍ୟବାଦ ଅର୍ପଣ କରିଥିଲେ।
