ନୂଆଦିଲ୍ଲୀ, ୩୧।୫: ଟି୨୦ ବିଶ୍ୱକପ୍ ଆୟୋଜନ ସମ୍ପର୍କରେ ଅନ୍ତିମ ନିଷ୍ପତ୍ତି ପାଇଁ ଆଇସିସିକୁ ଅଧିକ ଏକ ମାସ ସମୟ ମାଗିବ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)। ଭିଡିଓ କନଫରେନ୍ସିଂ ମାଧ୍ୟମରେ ମଙ୍ଗଳବାର ହେବାକୁ ଥିବା ଆଇସିସି ବୋର୍ଡ ମିଟିଂରେ ଏହି ବିଶ୍ୱ ସ୍ଥରୀୟ ଇଭେଣ୍ଟର ଭେନ୍ୟୁ ସମ୍ପର୍କରେ ଆଲୋଚନା କରାଯିବ। ବିସିସିଆଇ ମୁଖ୍ୟ ସୌରଭ ଗାଙ୍ଗୁଲି ଏହି ବୈଠକରେ ଯୋଗଦେବା ପରେ ବୁଧବାର ୟୁଏଇ ଗସ୍ତ କରିବେ। ସେଠାରେ ଆଇପିଏଲ ଆୟୋଜକଙ୍କ ସହ ଆଲୋଚନା କରାଯିବ।
ଆଇସିସିର ବୋର୍ଡ ମିଟିଂରେ ଟି୨୦ ବିଶ୍ୱକପ୍ ଆୟୋଜନ ସମ୍ପର୍କରେ କୌଣସି ସ୍ପଷ୍ଟ ନିଷ୍ପତ୍ତି ହୋଇପାରିବନାହିଁ ବୋଲି ଆଶା କରାଯାଉଛି। ଜୁଲାଇ ୧ ତାରିଖରେ ବିସିସିଆଇ ଆଉ ଥରେ ଏସ୍ଜିଏମ୍ ଡକାଇବ। ସେଥିରେ ଟି୨୦ ବିଶ୍ୱକପ୍ ଭାରତରେ ହେବ କି ନାହିଁ ତାହା ସ୍ପଷ୍ଟ ହେବ। ଏ ସମ୍ପର୍କରେ ଆଇସିସି ଜୁଲାଇ ୧୮ରେ ହେବାକୁ ଥିବା ବାର୍ଷିକ ବୈଠକରେ ବିଧିବଦ୍ଧ ଘୋଷଣା କରିବ।
ଆଇପିଏଲର ବଳକା ମ୍ୟାଚ୍ ୟୁଏଇରେ ହେବାକୁ ଥିବାରୁ ବିସିସିଆଇ ଟି୨୦ ବିଶ୍ୱକପ୍ ଆୟୋଜନ ଅଧିକାର ଛାଡ଼ିବାକୁ ଚାହୁଁନାହିଁ। ଏହି ଆଇସିସିି ଇଭେଣ୍ଟ ଲାଗି ୟୁଏଇକୁ ବ୍ୟାକ ଅଫ୍ ଭେନ୍ୟୁ ଭାବେ ରଖାଯାଇଛି। ଭାରତରେ କୋଭିଡ୍-୧୯ ସ୍ଥିତିରେ ସୁଧାର ଆସିଛି। ପ୍ରାୟ ରାଜ୍ୟରେ ଜାରି ରହିଛି ଲକଡାଉନ। କେବେ ପୁଣି ଥରେ ସଂଖ୍ୟା ବଢ଼ିବ, ତାହା କୁହାଯାଇପାରିବ ନାହିଁ। ଏଣୁ ଟି୨୦ ବିଶ୍ୱକପ୍ ଆୟୋଜନ କଲା ଭଳି ସ୍ଥିତି ଆସିନାହିଁ। ଗାଙ୍ଗୁଲି ଓ ସାଧାରଣ ସମ୍ପାଦକ ଜୟ ଶାହ ଆଇସିସିକୁ ଅନ୍ତିମ ନିଷ୍ପତ୍ତି ପାଇଁ ଏକ ମାସର ସମୟ ମାଗିବେ ବୋଲି ବିସିସିଆଇ ସୂତ୍ରରୁ କୁହାଯାଇଛି।
