ଦୁବାଇ, ୧୪।୭- ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି)ର ଦ୍ୱିତୀୟ ସଂସ୍କରଣ ପାଇଁ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ନୂଆ ପଏଣ୍ଟ ବ୍ୟବସ୍ଥା ପ୍ରଚଳନ କରିବାକୁ ଯାଉଛି। ଏଥର ବିଜେତା ଦଳକୁ ୧୨, ଡ୍ର ପାଇଁ ୪ ଏବଂ ମ୍ୟାଚ ଟାଇ ରହିଲେ ୬ ପଏଣ୍ଟ ଲେଖାଏ ମିଳିବ। ଆସନ୍ତା ଅଗଷ୍ଟରେ ଭାରତ-ଇଂଲଣ୍ଡ ୫ ମ୍ୟାଚ ବିଶିଷ୍ଟ ସିରିଜରୁ ଡବ୍ଲ୍ୟୁଟିସିର ଦ୍ୱିତୀୟ ସଂସ୍କରଣ ଆରମ୍ଭ ହେବ।
ପୂର୍ବରୁ ପ୍ରତି ଟେଷ୍ଟ ସିରିଜ ପାଇଁ ୧୨୦ ପଏଣ୍ଟ ପ୍ରଦାନ କରାଯାଉଥିଲା। ୨ ମ୍ୟାଚ ବିଶିଷ୍ଟ ସିରିଜରେ ପ୍ରତ୍ୟେକ ମ୍ୟାଚ୍ ବିଜେତାକୁ ଦିଆଯାଉଥିଲା ୬୦ ପଏଣ୍ଟ। ଆଉ ୫ ମ୍ୟାଚ ବିଶିଷ୍ଟ ସିରିଜ୍ରେ ମ୍ୟାଚ୍ ପିଛା ୨୪ ପଏଣ୍ଟ ପ୍ରଦାନ କରାଯାଉଥିଲା।
ଗତଥରର ପଏଣ୍ଟ ବ୍ୟବସ୍ଥାକୁ ନାପସନ୍ଦ କରିଥିଲେ ବହୁ ପ୍ରାକ୍ତନ ଖେଳାଳି। ଏଥର ଏହାକୁ ସରଳୀକରଣ କରାଯାଇଛି ବୋଲି ଆଇସିସି କାର୍ଯ୍ୟକାରୀ ମୁଖ୍ୟ କାର୍ଯ୍ୟନିର୍ବାହୀ ଜେଫ୍ ଆଲାର୍ଡିସ ପ୍ରକାଶ କରିଛନ୍ତି। ପୂର୍ବ ପଏଣ୍ଟ ବ୍ୟବସ୍ଥାକୁ ସରଳୀକରଣ କରିବା ପାଇଁ ଆମକୁ ଫିଡ୍ବ୍ୟାକ୍ ମିଳିଥିଲା। କ୍ରିକେଟ କମିଟି ପ୍ରତି ମ୍ୟାଚ ପାଇଁ ପଏଣ୍ଟ ବ୍ୟବସ୍ଥାକୁ ସ୍ଥିରୀକୃତ କରିବାକୁ ବିଚାର କରିଥିଲା ବୋଲି ସେ କହିଛନ୍ତି। ଗତଥର କରୋନା ମହାମାରୀ ପାଇଁ ସମସ୍ତ ସିରିଜ ସମ୍ଭବ ହୋଇ ନ ଥିବାରୁ ଆମେ ର଼୍ୟାଙ୍କିଙ୍ଗ ବ୍ୟବସ୍ଥାରେ ପରିବର୍ତ୍ତନ କରି ଉପଲବ୍ଧ ପଏଣ୍ଟର ପ୍ରତିଶତକୁ ବିଚାରକୁ ନେଇଥିଲୁ। ଏହାଦ୍ୱାରା ଫାଇନାଲିଷ୍ଟ ନିର୍ଣ୍ଣୟ କରାଯାଇଥିଲା ବୋଲି ସେ ପ୍ରକାଶ କରିଛନ୍ତି।
ଡବ୍ଲ୍ୟୁଟିସିର ଦ୍ୱିତୀୟ ସଂସ୍କରଣ ୨୦୨୩ ଜୁନ୍ରେ ଶେଷ ହେବ। ଏଥିରେ ଆଉ ଏକ ୫ ମ୍ୟାଚ ବିଶିଷ୍ଟ ସିରିଜ(ଇଂଲଣ୍ଡ-ଅଷ୍ଟ୍ରେଲିଆ ଆଶେସ ସିରିଜ) ସାମିଲ ରହିବ। ଭାରତ ଆସନ୍ତା ବର୍ଷ ଅଷ୍ଟ୍ରେଲିଆ ଗସ୍ତ କରି ୪ ମ୍ୟାଚ ବିଶିଷ୍ଟ ସିରିଜ ଖେଳିବ। ୯ଟି ଟେଷ୍ଟ ଦଳ ମୋଟ ୬ଟି ଲେଖାଏ (୩ ଘରୋଇ ପରିବେଶରେ ଏବଂ ୩ ବାହାରେ) ଟେଷ୍ଟ ସିରିଜ ଖେଳିବେ।
