ଜୟପୁର,୧୪।୮: ବହୁ ବାଦ ବିବାଦ ପରେ ଶୁକ୍ରବାର ରାଜସ୍ଥାନରେ ବିଧାନସଭା ଅଧିବେଶନ ଆରମ୍ଭ ହୋଇଛି। ବର୍ଷା ଯୋଗୁ ଅଧିବେଶନ ବିଳମ୍ବରେ ଆରମ୍ଭ ହୋଇଥିଲା। ଗେହଲଟଙ୍କ ସରକାରରେ ଆଇନ ଓ ସଂସଦୀୟ ବ୍ୟାପାର ମନ୍ତ୍ରୀ ଥିବା ଶାନ୍ତି କୁମାର ଧାରିଓ୍ବାଲ ଗୃହରେ ବିଶ୍ୱାସ ପ୍ରସ୍ତାବ ଆଗତ କରିଥିଲେ। ରାଜସ୍ଥାନରେ ରାଜନୈତିକ ଝଡ଼ ସିନା ଥମ୍ବିଯାଇଛି ହେଲେ ଗୃହରେ ମୁଖ୍ୟମନ୍ତ୍ରୀ ଅଶୋକ ଗେହଲଟ ଓ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କ ମଧ୍ୟରେ ଥିବା ଫାଟ ସ୍ପଷ୍ଟ ନଜର ଆସୁଛି। ଶୁକ୍ରବାର ବିଧାନସଭାରେ ସଚିନ ପାଇଲଟଙ୍କ ଆସନକୁ ପରିବର୍ତ୍ତନ କରାଯାଇଥିଲା। ତାଙ୍କ ଆସନ ସ୍ବାଧୀନ ବିଧାୟକଙ୍କ ସାଙ୍ଗରେ ଥିବା ଦେଖିବାକୁ ମିଳିଥିଲା। ସଚିନ ଓ ତାଙ୍କ ସମର୍ଥକ ବିଧାୟକଙ୍କ ଗ୍ୟାଲେରିରେ ବସିଥିଲେ। ତାଙ୍କୁ ଜାଣିଶୁଣି ଅଲଗା ବସାଯାଇଥିଲା ବୋଲି କୁହାଯାଉଛି। ଅନ୍ୟପଟେ ଗୃହକୁ ସମ୍ବୋଧିତ କରିବା ସମୟରେ ପାଇଲଟ କହିଛନ୍ତି, ଗୃହକୁ ଆସିବା ପରେ ଦେଖିଲି ମୋ ଆସନ ପଛରେ ରଖାଯାଇଛି। ସବା ଶେଷ ଧାଡିରେ ବସିଥିବା ବେଳେ ଭାବିଲି ସୀମାରେ ସବୁଠାରୁ ଶକ୍ତିଶାଳୀ ଯୋଦ୍ଧାଙ୍କୁ ପଠାଯାଇଥାଏ। ତେଣୁ ଯେପର୍ଯ୍ୟନ୍ତ ମୁଁ ଏଠାରେ ବସିଛି ସରକାର ସୁରକ୍ଷିତ ଅଛନ୍ତି। ସୀମାରେ ଯେତେ ଗୁଳିବିନିମୟ ହେଉ ନା କାହିଁକି ମୁଁ କବଚ ହୋଇ ଠିଆ ହେବି ବୋଲି ପାଇଲଟ ନିଜ ପ୍ରତିକ୍ରିୟାରେ କହିଛନ୍ତି।
