ଗଞ୍ଜାମ,୧୯।୯(ବିଦ୍ୟାଧର ସାହୁ): ଗଞ୍ଜାମ ସହର ବଡ଼ବଜାରସ୍ଥିତ ବହୁ ପୁରାତନ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପରିଣତ କରିବା ଦାବି ଜୋର ଧରିଛି। ରାଜପଥ ପାର୍ଶ୍ୱରେ ଅବସ୍ଥିତ ଏହି ସ୍ବାସ୍ଥ୍ୟକେନ୍ଦ୍ରକୁ ପ୍ରତିଦିନ ଶହ ଶହ ରୋଗୀ ପ୍ରାଥମିକ ଚିକିତ୍ସା ପାଇଁ ଆସୁଛନ୍ତି। ଗଞ୍ଜାମ ବ୍ଲକ ସମେତ ପୁରୀ ଜିଲାର କୃଷ୍ଣପ୍ରସାଦ ବ୍ଲକର ଲୋକମାନେ ମଧ୍ୟ ଏହି ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭର କରୁଛନ୍ତି।
ବିଶେଷକରି ସ୍ବାସ୍ଥ୍ୟକେନ୍ଦ୍ରଟି ଡେଲିଭରି ପଏଣ୍ଟ ହୋଇଥିବାରୁ ଗଞ୍ଜାମ ବ୍ଲକର ୧୫ଟି ପଞ୍ଚାୟତ, ରମ୍ଭା ଓ ଆଖପାଖ ଅଞ୍ଚଳର ଗର୍ଭବତୀ ମହିଳାମାନେ ପ୍ରସବ ପାଇଁ ଏଠାକୁ ଆସିଥାନ୍ତି। ଏଥିସହ ରାଜପଥରେ ଦୁର୍ଘଟଣା ଘଟିଲେ ଆହତମାନଙ୍କୁ ମଧ୍ୟ ଏଠାରେ ପ୍ରାଥମିକ ଚିକିତ୍ସା ଦିଆଯାଏ। ଗୁରୁତର ରୋଗୀଙ୍କୁ ଛତ୍ରପୁର କିମ୍ବା ବ୍ରହ୍ମପୁର ବଡ଼ ମେଡିକାଲକୁ ରେଫର କରାଯାଉଛି।
ସ୍ଥାନୀୟ ଲୋକଙ୍କ କହିବା ଅନୁଯାୟୀ, ପୂର୍ବରୁ ଏହି ସ୍ବାସ୍ଥ୍ୟକେନ୍ଦ୍ରରେ ୧୨ଟି ଶଯ୍ୟାର ବ୍ୟବସ୍ଥା ଥିଲା। ବର୍ତ୍ତମାନ ସେହି ବ୍ୟବସ୍ଥା ବନ୍ଦ ହୋଇଯାଇଥିବା ବେଳେ ମାତ୍ର ୨ଟି ବେଡ୍ରେ ଚିକିତ୍ସା ଚାଲିଛି। ଏଠାରେ ରାତ୍ରିକାଳୀନ ସ୍ବାସ୍ଥ୍ୟସେବା ମଧ୍ୟ ଉପଲବ୍ଧ ନଥିବା ଅଭିଯୋଗ ହୋଇଛି।
ବର୍ତ୍ତମାନ ଜଣେ ଡାକ୍ତର ଓ ଜଣେ ଆୟୁଷ ଡାକ୍ତରଙ୍କ ଦ୍ୱାରା ରୋଗୀ ସେବା ଚାଲିଛି। ରୋଗୀଙ୍କ ସଂଖ୍ୟା ତୁଳନାରେ ଡାକ୍ତର ଓ ଶଯ୍ୟା ସଂଖ୍ୟା ଅତ୍ୟନ୍ତ କମ ଥିବାରୁ ଉନ୍ନତ ଚିକିତ୍ସାସେବା ଯୋଗାଇବାରେ ସମସ୍ୟା ଦେଖାଦେଉଥିବା ସ୍ଥାନୀୟ ଲୋକେ କହିଛନ୍ତି।
ସ୍ଥାନୀୟ ଅଞ୍ଚଳର ଲୋକଙ୍କ ସ୍ବାର୍ଥ ଓ ସ୍ବାସ୍ଥ୍ୟସେବାର ଆବଶ୍ୟକତାକୁ ଦୃଷ୍ଟିରେ ରଖି ଏହି ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପରିଣତ କରିବାକୁ ସ୍ଥାନୀୟ ଯୁବ ସ୍ବେଚ୍ଛାସେବୀ ସୁଧୀର କୁମାର ପାଢ଼ୀ ଦାବି କରିଛନ୍ତି।
ଏଥିପାଇଁ ରାଜନୈତିକ ଇଚ୍ଛାଶକ୍ତିର ଅଭାବ ରହିଥିବା ସେ ଅଭିଯୋଗ କରିଛନ୍ତି। କେବଳ ନୂତନ ମେଡିକାଲ ବିଲ୍ଡିଂ ନିର୍ମାଣ କଲେ ସମସ୍ୟାର ସମାଧାନ ହେବ ନାହିଁ ବୋଲି ପାଢ଼ୀ କହିଛନ୍ତି। ସହରର ସମସ୍ତ ବର୍ଗର ଲୋକ ଦଳମତ ନିର୍ବିଶେଷରେ ଏକଜୁଟ ହୋଇ ଜିଲାପାଳଙ୍କ ଜରିଆରେ ରାଜ୍ୟ ସ୍ବାସ୍ଥ୍ୟମନ୍ତ୍ରୀଙ୍କୁ ଲିଖିତ ଦାବିପତ୍ର ପ୍ରଦାନ କରିବାକୁ ସେ ଆହ୍ବାନ ଦେଇଛନ୍ତି। ଅଞ୍ଚଳର ଜନସଂଖ୍ୟା ଓ ରୋଗୀଙ୍କ ଆବଶ୍ୟକତା ଦୃଷ୍ଟିରୁ ଆବଶ୍ୟକ ଆମ୍ବୁଲାନ୍ସ ବ୍ୟବସ୍ଥା କରିବାକୁ ପାଢ଼ୀ ଜିଲା ଉଚ୍ଚ ପ୍ରଶାସନ ନିକଟରେ ଦାବି କରିଛନ୍ତି।
ସେହିପରି, ସ୍ବାସ୍ଥ୍ୟକେନ୍ଦ୍ରକୁ ଲାଗି ନିର୍ମାଣାଧୀନ ନୂତନ ବିଲ୍ଡିଂ କାମରେ ଅହେତୁକ ବିଳମ୍ବ ହେଉଥିବା ନେଇ ସେ କ୍ଷୋଭ ପ୍ରକାଶ କରିଛନ୍ତି। ନିର୍ମାଣ କାର୍ଯ୍ୟ ଶୀଘ୍ର ସାରିବା ସହ ଏହି ସ୍ବାସ୍ଥ୍ୟକେନ୍ଦ୍ରକୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମାନ୍ୟତା ଦେଇ ଅଧିକ ଡାକ୍ତର, ଶଯ୍ୟା, ରାତ୍ରିକାଳୀନ ସେବା ଓ ଆମ୍ବୁଲାନ୍ସ ସୁବିଧା ଯୋଗାଇବାକୁ ସ୍ଥାନୀୟ ମହଲରେ ଦାବି ହୋଇଛି।
Dharitri – Odisha’s No.1 Odia Daily
