ନୀଳଗିରି,୭ା୭(ପ୍ରଶାନ୍ତ ବିଶ୍ୱାଳ):ବାଲେଶ୍ୱର ଜିଲା ନୀଳଗିରି ଥାନା ଅଧୀନ ଧୋବଶିଳା ପଞ୍ଚାୟତର କଇଁଫୁଲିଆରେ ନିଛାଟିଆ ରାସ୍ତାରୁ ଜଣେ ଯୁବକଙ୍କୁୁ ଟେକି ନେଇ ନରବଳି ଉଦ୍ୟମ କରାଯିବା ଘଟଣା ଆଲୋଡ଼ନ ସୃଷ୍ଟି କରିଛି। ତନ୍ତ୍ର ସାଧନା ପାଇଁ ଜଣେ ତାନ୍ତ୍ରିକ ଓ ତାଙ୍କର ୪ ସହଯୋଗୀ ବୁଧବାର ରାତିରେ ଏଭଳି କାଣ୍ଡ ଘଟାଇଥିବା ବେଳେ ଉପସ୍ଥିତ ବୁଦ୍ଧି ଖଟାଇ ଅପହୃତ ଯୁବକ ଜଣକ ସେମାନଙ୍କ କବଳରୁ ବର୍ତ୍ତି ଯାଇଛନ୍ତି। ଏନେଇ ଥାନାରେ ଅଭିଯୋଗ ପରେ ପୋଲିସ ତଦନ୍ତ ଜାରି ରଖିଛି। ତାନ୍ତ୍ରିକ ଓ ତାଙ୍କ ସହଯୋଗୀମାନେ ଗିରଫ ଭୟରେ ଫେରାର ହୋଇଯାଇଛନ୍ତି।
ସୂଚନା ଅନୁଯାୟୀ, କେରାଟପଡ଼ିଆ ଗଁାର ହରିଶ୍ଚନ୍ଦ୍ର ନାୟକଙ୍କ ପୁଅ ତପନ (୨୧) ବୁଧବାର ଧୋବଶିଳା ବଜାରକୁ ଯାଇ ସନ୍ଧ୍ୟା ସାଢ଼େ ୭ଟା ସମୟରେ ଘରକୁ ଫେରୁଥିଲେ। ଏହି ସମୟରେ ନିଛାଟିଆ ରାସ୍ତାରେ ୪ ଅଜଣା ବ୍ୟକ୍ତି ତାଙ୍କୁ ଅଟକାଇ ମୁହଁରେ କିଛି ଶୁଙ୍ଘାଇ ଦେବାରୁ ସେ ଚେତାଶୂନ୍ୟ ହୋଇ ପଡ଼ିଥିଲେ। ରାତି ୧୦ଟାରେ ଚେତା ଫେରିବା ବେଳକୁ ସ୍ବର୍ଣ୍ଣଚୂଡ଼ ଜଙ୍ଗଲର କଇଁଫୁଲିଆ ଠାକୁରାଣୀଙ୍କ ପୀଠରେ ସେ ନିଜକୁ ଠାବ କରିଥିଲେ। ସେଠାରେ ତରାମନଟୀ ଗ୍ରାମର ଜଣେ ତାନ୍ତ୍ରିକ ଓ ବରହମପୁର ଥାନା ଅଞ୍ଚଳର ୪ ସହଯୋଗୀ ପୂଜାର୍ଚ୍ଚନା କରୁଥିବା ସେ ଦେଖିବାକୁ ପାଇଥିଲେ। ସେମାନେ ତାଙ୍କୁ ବଳି ପକାଇବା ପାଇଁ ଯୋଜନା କରୁଥିବା ସନ୍ଦେହ କରି ପରିସ୍ରା ଯିବା ବାହାନାରେ ତପନ ସେଠାରୁ ଦୌଡ଼ି ପଳାଇ ଆସିଥିଲେ। କିଛି ବାଟ ଆସିବା ପରେ ରାତି ପ୍ରାୟ ସାଢ଼େ ୧୦ଟା ସମୟରେ ଡାହାଣୀମରା ଅଞ୍ଚଳର ଜଣେ ଦୋକାନୀଙ୍କ ପାଖରେ ପହଞ୍ଚତ୍ ତାଙ୍କ ମୋବାଇଲରୁ ଘଟଣା ସମ୍ପର୍କରେ ପରିବାର ଲୋକଙ୍କୁ ଜଣାଇଥିଲେ। ପରିବାର ଲୋକେ ସେଠାରେ ପହଞ୍ଚତ୍ ତପନଙ୍କୁୁ ଘରକୁ ଆଣିଥିଲେ। ଗୁରୁବାର ପରିବାର ଲୋକେ ସମ୍ପୃକ୍ତ ତାନ୍ତ୍ରିକଙ୍କୁ ତାଙ୍କ ଘରେ ଖୋଜାଖୋଜି କରିଥିବା ବେଳେ ସେ ଫେରାର ଥିବା ଜାଣିବାକୁ ପାଇଥିଲେ। ଘଟଣା ସମ୍ପର୍କରେ ତପନଙ୍କ ମା’ ସସ୍ମିତା ନାୟକ ନୀଳଗିରି ଥାନାରେ ଲିଖିତ ଅଭିଯୋଗ କରିଛନ୍ତି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଥାନା ଆଇଆଇସି ଗୋପାଳ ଚନ୍ଦ୍ର କର୍ଣ୍ଣ କହିଛନ୍ତି।
