ଓ୍ବାଶିଂଟନ,୧୦।୭: କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଉଥିବା ବେଳେ ଏବେ ଏଥିରୁ ମୁକ୍ତି ପାଇବାକୁ ସମସ୍ତ ବିକାଶଶୀଳ ଦେଶ ପ୍ରୟାସ ଜାରି ରଖିଛନ୍ତି। ପ୍ରଥମେ ଏହାର ଭ୍ୟାକ୍ସିନ ମୂଷା ଓ ମାଙ୍କଡଙ୍କଠାରେ ପରୀକ୍ଷା କରାଯାଉଥିବା ବେଳେ ଏବେ ଏହା ମାନବ ଶରୀରରେ ପରୀକ୍ଷା କରାଯିବାକୁ ଯୋଜନା ଚାଲିଛି। ଏବେ ବିଶେଷଜ୍ଞମାନେ ଏକ ବିଶେଷ ପ୍ରକାର କଙ୍କଡାକୁ କରୋନା ଚିକିତ୍ସା ପାଇଁ ବ୍ୟବହାର କରିବା କଥା ଚିନ୍ତା କରିଛନ୍ତି। ହର୍ଷସୁ କ୍ରାବର ରକ୍ତ(blood of horseshoe crab)ରେ କରୋନା ରୋଗୀଙ୍କ ଚିକିତ୍ସା କରାଯିବାକୁ ଯୋଜନା ଚାଲିଛି। ଏହା ପୂର୍ବରୁ ମେଡିକାଲ ସାଇନ୍ସରେ ଉପଯୋଗ ହୋଇ ସାରିଥିବା ବେଳେ ଏବେ ଏହା କରୋନା ଚିକିତ୍ସାରେ ବ୍ୟବହାର କରାଯିବ ବୋଲି ଚେଷ୍ଟା କରାଯାଉଛି। ତେବେ ଏହି କଙ୍କଡାର ରକ୍ତକୁ ବ୍ୟବହାର କରିବା ପୂର୍ବରୁ ପ୍ରଥମେ ମେଡିକାଲ ଉପକରଣ ସବୁ ବ୍ୟାକ୍ଟେରିଆ ଫ୍ରି ହେବା ଜରୁରୀ। ନଚେତ୍ ଏହାଦ୍ୱାର ସମସ୍ତ ରୋଗୀ ମୃତ୍ୟୁ ମୁଖରେ ପଡିବାର ସମ୍ଭାବନା ଅଧିକ ଥାଏ। ବିଶ୍ୱର ବହୁ ପୁରତନ ଜୀବମାନଙ୍କ ମଧ୍ୟରେ ଗୋଟିଏ ହେଉଛି ଏହି ହର୍ଷସୁ କ୍ରାବ। ଡାଏନାସୋର ପୂର୍ବରୁ ଏହି କଙ୍କଡା ପୃଥିବୀରେ ଦେଖାଯାଉଥିବା କୁହାଯାଏ। ତେବେ ୨୦୧୯ରେ ହୋଇଥିବା ଏକ ମେଡିକାଲ ଆନାଲିସିସରେ ଜଣାପଡିଥିଲା କି ଏହି କଙ୍କଡା ୩୦କୋଟି ବର୍ଷରୁ ଅଧିକ ସମୟ ହେବ ପୃଥିବୀରେ ଅଛନ୍ତି। ତେଣୁ ଏମାନଙ୍କୁ ଲିଭିଙ୍ଗ ଫାସିଲ୍ସ ଶ୍ରେଣୀରେ ରଖାଯାଇଛି। ପ୍ରତିକୂଳ ପରିବେଶରେ ବି ଏମାନେ ବଞ୍ଚି ରହିଥାଆନ୍ତି ବୋଲି କୁହାଯାଏ। ଏହି କଙ୍କଡ଼ାର ରକ୍ତ ନୀଳ ରଙ୍ଗର। ଏମାନଙ୍କ ରକ୍ତରେ ଆଇରନ ବଦଳରେ କପର ବା ତମ୍ବା ସହ ହେମୋସିଆନିନ(hemocyanin) ନାମକ ଏକ ରାସାୟନିକ ଥିବା କାରଣରୁ ଏମାନଙ୍କ ରକ୍ତର ରଙ୍ଗ ନୀଳ ହୋଇଥାଏ। ଏହି ରଙ୍ଗରେ ଥିବା ତତ୍ତ୍ୱ ସହଜରେ ବିଷାକ୍ତ ପଦାର୍ଥକୁ ଚିହ୍ନଟ କରିପାରିଥାଏ। ଏହାକୁ limulus amebocyte lysate (LAL) ବୋଲି କୁହାଯାଇଥାଏ। ବିଶେଷ କରି ଏହା ଏଣ୍ଡୋଟକ୍ସିନକୁ ସହଜରେ ଚିହ୍ନି ପାରିଥାଏ। ବ୍ୟାକ୍ଟେରିଆ ଶେଷ ହେବା ପରେ ଏହି ଏଣ୍ଡୋଟକ୍ସିନ ଶରୀରରୁ ନିର୍ଗତ ହୋଇଥାଏ। ଏହା ଏତେ ମାରାତ୍ମକ ଯେ ଯଦି ହସ୍ପିଟାଲର କୌଣସି ସର୍ଜରୀ ଉପକରଣ ଅବା ଇଞ୍ଜେକଶନରେ ଏହାର ସୁକ୍ଷ୍ମ ମାତ୍ରା ଥାଏ ତେବେ ଏହା ରୋଗୀର ଜୀବନ ପାଇଁ ବଡ ବିପଦ ସୃଷ୍ଟି କରିଥାଏ। ଏହି ନୀଳ ରଙ୍ଗର ରକ୍ତ ଏଣ୍ଡୋଟକ୍ସିନକୁ ଚିହ୍ନଟ କରିଥାଏ। ଏହାପରେ ଉକ୍ତ କଙ୍କଡା ଦେହରୁ ଏକ ରାସାୟନିକ ନିର୍ଗତ ହୋଇଥାଏ ଯାହା ବ୍ୟାକ୍ଟେରିଆ ସଂସ୍ପର୍ଶରେ ଆସିଥିବା ରକ୍ତକୁ ଏକାଠି କରିଥାଏ ଓ ତା’ରି ଭିତରେହିଁ ସେ ସେହି ବ୍ୟାକ୍ଟେରିଆକୁ ମାରି ଦେଇଥାଏ। ତେଣୁ ଏବେ କରୋନା ପାଇଁ ପ୍ରସ୍ତୁତ କରାଯାଇଥିବା ବହୁତ ଗୁଡିଏ ଭ୍ୟାକ୍ସିନକୁ ଏହି ନୀଳ ରକ୍ତ ସହ ମିଶ୍ରଣ କରାଯାଇ ଏହା ବିଷାକ୍ତ କି ନା ପରୀକ୍ଷା କରାଯିବ ବୋଲି ଜଣାପଡିଛି। ତେବେ ଏହି କଙ୍କଡାର ନୀଳ ରକ୍ତର ଗୋଟିଏ ଲିଟରର ଦାମ ପାଖାପାଖି ୧୧ ଲକ୍ଷ ଟଙ୍କା ବୋଲି କୁହାଯାଏ। ୧୯୭୦ରୁ ମେଡିକାଲ ଏକ୍ସପର୍ଟ ଏହି ହର୍ଷସୁ କ୍ରାବର ରକ୍ତକୁ ବ୍ୟବହାର କରି ଆସୁଛନ୍ତି। ଏହାଦ୍ୱାର ମେଡିକାଲ ଉପକରଣ ଓ ଔଷଧ ସମ୍ପୂର୍ଣ୍ଣ ଭାବେ ବ୍ୟାକ୍ଟେରିଆ ମୁକ୍ତ କି ନା ତାହା ପରୀକ୍ଷା କରାଯାଇଥାଏ।
