ଗୁଡାରି,୮ା୧୦(ପ୍ରମୋଦ କୁମାର ପତି ): ରାୟଗଡା ଜିଲାର ଗୁଡାରି – ଢେପାଗୁଡା – କର୍ଲାଘାଟି ରାସ୍ତାର ପ୍ରଶସ୍ତୀକରଣ ପ୍ରକଳ୍ପ ମଞ୍ଜୁର ହୋଇଛି । ଏନେଇ ପୂର୍ତ୍ତ ବିଭାଗ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଘୋଷଣା କରିଛନ୍ତି । ଗୁରୁବାର ପୂର୍ତ୍ତ ବିଭାଗ ପକ୍ଷରୁ ମଞ୍ଜୁର ହୋଇଥିବା ଏହି ପ୍ରକଳ୍ପ ପାଇଁ ୧୧ କୋଟି ୧୯ ଲକ୍ଷ ୩୩ ହଜାର ଟଙ୍କା ବ୍ୟୟ ବରାଦ ହୋଇଛି । ଗୁଡ଼ାରୀ-ଢ଼େପାଗୁଡ଼ା – କର୍ଲାଘାଟି ରାସ୍ତାର ଉନ୍ନତିକରଣ ଓ ପ୍ରଶସ୍ତିକରଣ ପାଇଁ ପ୍ରଶାସନିକ ମଞ୍ଜୁରି ପ୍ରଦାନ କରାଯାଇଛି । ଏହି ପ୍ରକଳ୍ପ ଦ୍ୱାରା ଗୁଡାରି ଅଞ୍ଚଳବାସୀଙ୍କ ଯାତାୟାତକୁ ଅଧିକ ସୁଗମ କରିବା ସହ ଜିଲାର ବିକାଶ ପ୍ରକ୍ରିୟାକୁ ଆହୁରି ଗତିଶୀଳ କରିବ।
ଦୀର୍ଘ ୨୫ କିମି ଏହି ରାସ୍ତାର ଓସାର ବର୍ତ୍ତମାନ ୩.୬୫ ମିଟର ଥିବାବେଳେ ଏହି ପ୍ରକଳ୍ପ ଦ୍ୱାରା ୭ ମିଟର ଓସାର ହେବ । ବ୍ଲକର ମଧୁବନ, ପେଣ୍ଡିଲି, ଖାରିଗୁଡା, କର୍ଲାଘାଟି ଗ୍ରାମପଞ୍ଚାତ ଓ ଗୁଡାରି ସହର ବାସିନ୍ଦା ଏହି ରାସ୍ତା ଦ୍ୱାରା ଅଧିକ ଉପକୃତ ହେବେ । ମୁଖ୍ୟତଃ ଗୁଡାରି ଅଞ୍ଚଳବାସୀ ସ୍ୱାସ୍ଥ୍ୟ ସେବା ନିମନ୍ତେ ବିଷମକଟକ ଖ୍ରୀଷ୍ଟିଆନ ହସ୍ପିଟାଲ ଉପରେ ଅଧିକ ନିର୍ଭରଶୀଳ ହୋଇଥାନ୍ତି । ଏହି ପ୍ରକଳ୍ପ ହେବା ଫଳରେ ପ୍ରାୟ ଦେଢ ଘଣ୍ଟା ମଧ୍ୟରେ ଗୁଡାରି ଅଞ୍ଚଳବାସୀ ବିଷମକଟକ ପହଞ୍ଚି ପାରିବେ। ଏହି ପ୍ରକଳ୍ପ ନେଇ ବିଧାୟକ ସତ୍ୟଜିତ ଗମାଙ୍ଗ କହିଛନ୍ତି ଏ ସମ୍ପର୍କରେ ସେ ପୂର୍ବରୁ ବିଧାନ ସଭାରେ ପ୍ରଶ୍ନ କରିଛନ୍ତି ଏବଂ ବିଭାଗୀୟ ମନ୍ତ୍ରୀ ଏବଂ ସଚିବଙ୍କୁ ମଧ୍ୟ ଲିଖିତ ଭାବେ ଅଵଗତ କରିଛନ୍ତି। ଏହି ପ୍ରକଳ୍ପ ଦ୍ୱାରା ଗୁଡାରି ଅଞ୍ଚଳବାସୀ ଯୋଗାଯୋଗ କ୍ଷେତ୍ରରେ ଅଧିକ ଉପକୃତ ହୋଇପାରିବେ ବୋଲି ସେ କହିଛନ୍ତି।
ତେବେ ଅନେକ ଦିନ ଧରି ଦାବି ହୋଇ ଆସୁଥିବା ୫୨ କିମି ପଦ୍ମପୁର -ଗୁଡାରି -ରାଇବିଜି (ପିଜିଆର) ରୋଡ୍ ପ୍ରକଳ୍ପର କାର୍ଯ୍ୟକାରିତା ମନ୍ଥର ଗତିରେ ଚାଲିଥିବା ଜଣାପଡ଼ିଛି । ଗୁଡାରି ଅଞ୍ଚଳର ଗମନାଗମନ ପାଇଁ ନିତାନ୍ତ ଆବଶ୍ୟକ ଥିବା ଏହି ପ୍ରକଳ୍ପ ପ୍ରଥମେ ଗ୍ରାମ୍ୟ ଉନ୍ନୟନ ବିଭାଗ ଅଧିନରେ ଥିବା ବେଳେ ଏବେ ପୂର୍ତ୍ତ ବିଭାଗକୁ ସ୍ଥାନାନ୍ତର ହୋଇଛି। ଏହାପରେ ଏବେ କେଉଁ ରାସ୍ତା ଦେଇ ଉକ୍ତ ରାସ୍ତାଯିବ ଓ କେତେ ଅଧିକ ଜମି ଅଧିଗ୍ରହଣ ଆବଶ୍ୟକ ସେନେଇ ସର୍ବେକ୍ଷଣ ଚାଲିଥିବା ଜଣାପଡ଼ିଛି। ଏହାପରେ ପ୍ରକଳ୍ପ ମଞ୍ଜୁରି ପାଇଁ ବିଭାଗୀୟ ସ୍ତରରେ ପଦକ୍ଷେପ ଗ୍ରହଣ କରାଯିବ ବୋଲି ସୂଚନା ମିଳିଛି ।
