ତହରାନ୍,୨୬।୬: ଇରାନ ଓ ଆମେରିକା ମଧ୍ୟରେ ବୁଝାମଣା ପରେ ଇନ୍ଧନ ପରିବହନ ନେଇ ବିଶ୍ୱର ସବୁଠୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ଜଳପଥ ହର୍ମୁଜ୍ ଷ୍ଟ୍ରେଟ୍ ସ୍ବାଭାବିକ ହୋଇଛି। ଗତ କିଛି ମାସ ଧରି ଇରାନର ଉପକୂଳବର୍ତ୍ତୀ କ୍ଷେପଣାସ୍ତ୍ର ଘାଟି (କୋଷ୍ଟାଲ ବ୍ୟାଟେରୀ) ନଜରରୁ ଖସି ଲୁଚିଛପି ରାତିରେ ହର୍ମୁଜ ପାର୍ ହେବା ପାଇଁ ତୈଳ ଟ୍ୟାଙ୍କରଗୁଡ଼ିକ ସେମାନଙ୍କର ସାଟେଲାଇଟ ଟ୍ରାକିଂ ସିଷ୍ଟମ ବନ୍ଦ କରିଦେବା ଆବଶ୍ୟକତା ମଧ୍ୟ ନାହିଁ। ଏବେ ଦିବାଲୋକରେ ଜାହାଜ ଚଳାଚଳ ସ୍ବାଭାବିକ ହେବା ସହିତ ଗୁରୁବାର ସୁଦ୍ଧା ଦ୍ୱିଗୁଣିତ ହୋଇଛି। ଫେବୃଆରୀ ଶେଷ ଭାଗରେ ଇରାନ-ଆମେରିକା ସଂଘର୍ଷ ଆରମ୍ଭ ହେବା ପୂର୍ବରୁ ଏହି ପଥରେ ଦିନକୁ ଯେତିକି ସଂଖ୍ୟାରେ ଜାହାଜ ଚଳାଚଳ କରୁଥିଲା ଏବେ ତାହାର ଏବେ ପୁନରାବୃତ୍ତି ଘଟିଛି।
୧୫୦ରୁ ଅଧିକ ଜାହାଜ ଏହି ପ୍ରବେଶ ପଥ ବାହାରେ ଲଙ୍ଗର ପକାଇ ରହିଥିବା ବେଳେ ବହୁ ସଂଖ୍ୟକ ଜାହାଜ ସେଠାରୁ ପ୍ରସ୍ଥାନ କରୁଥିବା ଜାହାଜ ଟ୍ରାକିଂ ତଥ୍ୟରୁ ଜଣାପଡ଼ିଛି। ସେଗୁଡିକ ମଧ୍ୟରେ ରହିଥିବା ପ୍ରତ୍ୟେକ ୫ ନିୟୁତ ବ୍ୟାରେଲ ତୈଳ ନେଇ ଫସି ରହିଥିବା ତିନୋଟି ପ୍ରମୁଖ ଟ୍ୟାଙ୍କର ମଧ୍ୟ ଯାତ୍ରା ଆରମ୍ଭ କରିଛନ୍ତି। ଯାହାକୁ ନେଇ ଇନ୍ଧନ ଯୋଗାଣ କ୍ଷେତ୍ରରେ ବୈଶ୍ୱିକ ସ୍ତରରେ ସୃଷ୍ଟି ହୋଇଥିବା ପ୍ରତିବନ୍ଧକରୁ ଆଶ୍ୱସ୍ତିର ସଙ୍କେତ ମିଳିଥିବା କୁହାଯାଇଛି।
