କଥାରେ ଅଛି ଘରକୁ ସୁନ୍ଦର ଘରଣୀ। ଘରଣୀଟିଏ ହିଁ ଘରକୁ ସୁନ୍ଦର କରି ସଜେଇ ରଖିବା ପାଇଁ ସବୁବେଳେ ପ୍ରୟାସ କରିଥାଏ। ଘରର କେଉଁ ଜିନିଷକୁ କେଉଁ ସ୍ଥାନରେ ଆଉ କିପରିଭାବେ ରଖିବାକୁ ହେବ ସେଥିପାଇଁ ସବୁବେଳେ ନୂଆ ନୂଆ ଚିନ୍ତା କରିଥାନ୍ତି ଗୃହିଣୀମାନେ। ଆଉ ସମୟ ଅନୁସାରେ ଜିନିଷପତ୍ରର କିପରି ଯତ୍ନ ନେବାକୁ ହେବ ସେକଥା ବି ଆଦୌ ଭୁଲି ନ ଥାନ୍ତି। ଖାସ୍ ସେଇଥି ପାଇଁ ଏବେ ବର୍ଷା ଦିନ ଆସିଥିବାରୁ ସ୍ବତନ୍ତ୍ରଭାବେ ପ୍ରସ୍ତୁତି ଆରମ୍ଭ କରିଛନ୍ତି ଗୃହିଣୀମାନେ…
ବର୍ଷାଦିନ ଆସିଲେ ସବୁ ଘରେ କିଛି ଛୋଟ ମୋଟ ସମସ୍ୟା ଦେଖାଯାଏ। ସେଥିପାଇଁ ସ୍ବତନ୍ତ୍ରଭାବେ ଯତ୍ନ ନେବାକୁ ହୋଇଥାଏ। ଯେମିତି କି ଘରର କୌଣସି ଆସବାବପତ୍ର ନଷ୍ଟ ହେବନି କିମ୍ବା ଘରର କୌଣସି ସଦସ୍ୟ ଯେପରି ଥଣ୍ଡା ଜ୍ୱର କି ଅନ୍ୟ ରୋଗର ଶିକାର ନ ହେବେ। ଏଥିପାଇଁ କାଠ ଜିନିଷଠାରୁ ଆରମ୍ଭ କରି ଲୁଗାପଟା ଆଉ ସ୍ବାସ୍ଥ୍ୟର ଠିକ୍ ଭାବେ ଯତ୍ନ ନେବାକୁ ହୋଇଥାଏ।
ଘରକୁ ଶୁଖିଲା ରଖନ୍ତୁ: ବର୍ଷାଦିନେ ଓଦାଳିଆ ଲାଗିବା ଏକ ସାଧାରଣ ସମସ୍ୟା। ଏହି ଋତୁରେ ଘରେ ଟୋପାଏ ପାଣି ପଡ଼ିଲେ ବି ସହଜରେ ଶୁଖି ନ ଥାଏ। କିନ୍ତୁ ଅଧିକ ସମୟ ଘରେ କୌଣସି ସ୍ଥାନରେ ପାଣି ଜମି ରହିଲେ ତା’ ଉପରେ ଚାଲିବା ଫଳରେ ଆପଣଙ୍କୁ ମଧ୍ୟ ଥଣ୍ଡା କିମ୍ବା ଇନଫେକସନ୍ ହେବାର ସମ୍ଭାବନା ସୃଷ୍ଟି ହୋଇଥାଏ। ତେଣୁ ଘରେ ପାଣି ପଡ଼ିବା ମାତ୍ରେ ତାକୁ ଶୀଘ୍ର ପୋଛି ଦେଇ ଶୁଖିବା ପାଇଁ ଛାଡ଼ି ଦିଅନ୍ତୁ।
କାଠ ଜିନିଷର ଯତ୍ନ: ବର୍ଷାଦିନେ କପବୋର୍ଡ ସବୁର ଠିକ୍ ଭାବେ ଯତ୍ନ ନେବାକୁ ହେବ। କପବୋର୍ଡରେ ଯେପରି ପାଣି ନ ଲାଗେ କିମ୍ବା ଓଦା ଜିନିଷ କିଛି ନ ରହେ ସେଥିପ୍ରତି ଦୃଷ୍ଟି ଦିଅନ୍ତୁ। ବେଳେବେଳେ ବର୍ଷାଦିନେ ଜଳୀୟବାଷ୍ପ ପ୍ରଭାବରେ ବି କପବୋର୍ଡ କିମ୍ବା ଟେବୁଲ ଡ୍ର ଆଦି ଠିକ୍ ଭାବେ ବନ୍ଦ ହୋଇ ନ ଥାଏ। ସେ ସମୟରେ ଜୋର କରି କପବୋର୍ଡ ବନ୍ଦ କରିବାକୁ ଚେଷ୍ଟା କରନ୍ତୁ ନାହିଁ, ହୁଏତ ଭାଙ୍ଗି ଯାଇପାରେ। ବରଂ କପବୋର୍ଡକୁ ଭଲଭାବେ ଶୁଖିବା ପାଇଁ ଦିଅନ୍ତୁ, ତାହା ଆପେ ଆପେ ଠିକ୍ ହୋଇଯିବ।
ଲୁଗାପଟାର ଯତ୍ନ: ବର୍ଷାଦିନେ ସାଧାରଣତଃ ଲୁଗାପଟା ଶୀଘ୍ର ଶୁଖି ନ ଥାଏ। ତେଣୁ ଏହି ଋତୁରେ ପତଳା ଲୁଗା ପିନ୍ଧନ୍ତୁ। ପିଲାଙ୍କୁ ମଧ୍ୟ ସେହିଭଳି ପୋଷାକ ପିନ୍ଧାନ୍ତୁ, ଯାହା ଶୀଘ୍ର ଶୁଖିପାରିବ। ତା’ ଛଡ଼ା ଆଲମୀରାରେ ସାଇତା ହୋଇ ରହିଥିବା ଲୁଗାପଟାକୁ ମଧ୍ୟ କିଛି ସମୟ ବ୍ୟବଧାନରେ ବାହାର କରି ଅଳ୍ପ ଖରା ଦିଅନ୍ତୁ। କାରଣ ବେଶି ଦିନ ଲୁଗା ଭଙ୍ଗା ହୋଇ ରହିବା ଫଳରେ ଲୁଗା ବେଳେବେଳେ ଫିମ୍ପି ମାରିବା ଭଳି ହୋଇଥାଏ କିମ୍ବା ଭାଙ୍ଗ ହୋଇରହିଥିବା ସ୍ଥାନରୁ ଚିରି ଯାଇଥାଏ। ବିଶେଷକରି ପାଟଲୁଗାର ସ୍ବତନ୍ତ୍ର ଯତ୍ନ ନିଅନ୍ତୁ। ଭଲଭାବେ ଶୁଖି ନ ଥିବା ଲୁଗା ଆଦୌ ପିନ୍ଧନ୍ତୁ ନାହିଁ।
ଖାଦ୍ୟ ପ୍ରତି ସତର୍କ :ଏହି ଋତୁରେ ଖାଦ୍ୟପେୟ ପ୍ରତି ସବୁଠୁ ଅଧିକ ସତର୍କ ରହିବାକୁ ହୋଇଥାଏ। କାହିଁକି ନା ବର୍ଷାଦିନେ ହଜମ ନ ହେବାର ସମସ୍ୟା ଅଧିକ ଦେଖା ଦେଇଥାଏ। ତେଣୁ ସହଜରେ ପେଟ ଖରାପ ହେବା କିମ୍ବା ଝାଡ଼ା ବାନ୍ତି ଭଳି ସମସ୍ୟା ଦେଖା ଦେଇଥାଏ। ଏହି ସମସ୍ୟାରୁ ରକ୍ଷା ପାଇବା ପାଇଁ ଘରର ସମସ୍ତଙ୍କୁ ଗରମ ଖାଦ୍ୟ ହିଁ ଖାଇବାକୁ ଦିଅନ୍ତୁ। ବାସି ଖାଦ୍ୟ ଆଦୌ ଘରେ ରଖନ୍ତୁ ନାହିଁ। ନିଜେ ବାସି ଖାଦ୍ୟ ଖାଆନ୍ତୁ ନାହିଁ କିମ୍ବା ଘରେ କାହାକୁ ଦିଅନ୍ତୁ ନାହିଁ।
ଏମାନେ କ’ଣ କହନ୍ତି
ଗରମ ଖାଦ୍ୟ ଖାଇବାକୁ ଦିଏ
ବର୍ଷାଦିନେ ମୁଁ ସବୁବେଳେ ପିଲାଙ୍କର ବେଶି ଯତ୍ନ ନେବାକୁ ଚେଷ୍ଟା କରେ। ସେମାନଙ୍କୁ ଗରମ ପାଣିରେ ଗାଧୋଇ ଦିଏ ଆଉ ସକାଳୁ ଗରମ ପାଣି ପିଇବାକୁ ଦିଏ। ପ୍ରତିଦିନ ରାତିରେ ମୁଁ ସମସ୍ତଙ୍କୁ କ୍ଷୀରରେ ହଳଦୀ ମିଶାଇ ପିଇବାକୁ ଦିଏ। ତା’ ଛଡ଼ା ପ୍ରତିଦିନ ତୁଳସୀ ପତ୍ର ମହୁ ଖାଇବା ସହିତ ରସୁଣ ମଧ୍ୟ ସମସ୍ତଙ୍କୁ ଖାଇବାକୁ ଦେଇଥାଏ। ଖାଲି ସେତିକି ନୁହେଁ ରାତିରେ ଶୋଇବା ସମୟରେ ସମସ୍ତଙ୍କ ପାଦରେ ତେଲ ମାଲିସ କରିବାକୁ କହିଥାଏ।
-ଧରିତ୍ରୀ ନାୟକ, ଗୃହିଣୀ, ରାଇଘରପୋଖରୀ,
ପୀରହାଟ ବଜାର, ଭଦ୍ରକ
ବାସି ଖାଦ୍ୟ ଆଦୌ ରଖେ ନାହିଁ
ବର୍ଷାଦିନେ ମୋର ରୋଷେଇ ଘର ସଫା କରିବା ପାଇଁ ବହୁ ସମୟ ଯାଏ। ରୋଷେଇ ଘରକୁ ସଫା ରଖିବା ପାଇଁ ମୁଁ ସବୁବେଳେ ସତର୍କ ରହିଥାଏ। ତା’ ଛଡ଼ା ଘରେ ସମସ୍ତଙ୍କୁ ଫ୍ରେଶ ଖାଦ୍ୟ ହିଁ ତିଆରି କରି ଦେଇଥାଏ। ଯଦି କୌଣସି କାରଣରୁ ଜଳଖିଆ ତିଆରି କରି ପାରେ ନାହିଁ ତେବେ ବିସ୍କୁଟ, ମୁଢି କିମ୍ବା ଚୁଡା ଆଦି ଖାଇବାକୁ ଦିଏ। କିନ୍ତୁ ବାସି ଖାଦ୍ୟ କି ଜଙ୍କ୍ ଫୁଡ୍ ଆଦୌ ଖାଇବାକୁ ଦିଏନି।
-କରିଶ୍ମା ବିଶ୍ୱାଳ, କର୍ମଜୀବୀ, ଗଡମହାବୀର ବିହାର, ଓଲ୍ଡ ଟାଉନ୍, ଭୁବନେଶ୍ୱର
କାଢା ପିଇବାକୁ ଦେଉଛି
ବର୍ଷାଦିନେ ଘରର ସମସ୍ତେ ଛଣା ଖାଦ୍ୟ ପକୁଡି ବରା ଆଦି ଖାଇବାକୁ ଭଲପାନ୍ତି। କିନ୍ତୁ ସବୁବେଳେ ସେସବୁ ଖାଦ୍ୟ ମୁଁ ସେମାନଙ୍କୁ ଖାଇବାକୁ ଦିଏନି। ବାହାରୁ ଏସବୁ ଖାଇବା ଆଣିବା ବଦଳରେ ମୁଁ କେବେକେବେ ଘରେ ଏସବୁ ଖାଦ୍ୟ ତିଆରି କରି ଦେଇଥାଏ। ତା’ ଛଡା ଥଣ୍ଡା ଶର୍ଦ୍ଦି ନ ହେବା ପାଇଁ ଘରେ ସମସ୍ତଙ୍କୁ ସକାଳୁ ତୁଳସୀ ପତ୍ର ସହିତ ମହୁ ଖାଇବାକୁ ଦିଏ। ଏବେ କରୋନା ଆସିବା ପରଠୁ ପ୍ରାୟ ସବୁଦିନ କାଢା ବି ପିଇବାକୁ ଦେଉଛି।
-ମଧୁସ୍ମିତା ମହାନ୍ତି,
କର୍ମଜୀବୀ, ହଂସପାଳ, ଭୁବନେଶ୍ୱର
