ସମ୍ବଲପୁର,୨୪ା୧(ବ୍ୟୁରୋ):ଇତିହାସ ଦର୍ପଣ ଭଳି, ଯେଉଁଥିରେ ପରାକ୍ରମ, ସଂଗ୍ରାମୀ, ପରମ୍ପରା, ସଂସ୍କୃତି ଆଦି ବିଷୟରେ ଜାଣିବାକୁ ମିଳିଥାଏ। ଇତିହାସ ବିନା ଭବିଷ୍ୟତ ପରିକଳ୍ପନା କରାଯାଇ ପାରିବ ନାହିଁ। ପଶ୍ଚିମ ଓଡ଼ିଶାରେ ଊନବିଂଶ ଶତାବ୍ଦୀ ପୂର୍ବର ଇତିହାସ ରହିଛି। ଇଷ୍ଟଦେବୀ ସମଲେଇ, ମହାନଦୀ, ଶକ୍ତି ଓ ସଂଗ୍ରାମୀ ପୀଠଗୁଡିକ ଶତାଧିକ ବର୍ଷ ପୂର୍ବର ଇତିହାସ ସମ୍ପର୍କରେ ସୂଚନା ଦେଉଛି। ସମ୍ବଲପୁରରେ ବୌଦ୍ଧିକ କ୍ଷମତା, ଶିଳ୍ପାୟନ, କୃଷିଭିତ୍ତିକ ଅର୍ଥନୀତି ଭରି ରହିଛି। ଏହା ଏକ ତ୍ରିବେଣୀ ସଙ୍ଗମ। ଫରାସୀ ବିପ୍ଳବ ପୂର୍ବରୁ ସମ୍ବଲପୁରରେ ସ୍ବାଧୀନତା ସଂଗ୍ରାମର ବିଗୁଲ ବଜାଇଥିଲେ ବୀର ସୁରେନ୍ଦ୍ର ସାଏ। ଜୟନ୍ତୀ ଅବସରରେ ଦୁଇ ମହାନ ପୁରୁଷ ବୀର ସୁରେନ୍ଦ୍ର ସାଏ ଓ ନେତାଜୀ ସୁଭାଷ ଚନ୍ଦ୍ର ବୋଷ ପ୍ରାତଃ ସ୍ମରଣୀୟ। ଆଜି ମଧ୍ୟ ସମ୍ବଲପୁର
ନିବାସୀ ପି.କେ. ମିଶ୍ରଙ୍କର ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ପରିଚାଳନା କରିବାରେ ପ୍ରମୁଖ ଭୂମିକା ରହିଛି ବୋଲି ଆଇଆଇଏମ୍ ପକ୍ଷରୁ ତପସ୍ବିନୀ ପ୍ରେକ୍ଷାଳୟରେ ସୋମବାର ଆୟୋଜିତ ପରାକ୍ରମ ଦିବସରେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି।
ସେ ଆହୁରି କହିଥିଲେ, ସୁନ୍ଦରଗଡ ହେଉ କି ମୟୂରଭଞ୍ଜ ସବୁ ଜିଲାରେ ଭିନ୍ନ ପ୍ରସଙ୍ଗ ରହିଛି। ଏହି ପ୍ରସଙ୍ଗକୁ ନେଇ ଆଗକୁ ବଢିବାକୁ ହେବ। ଗବେଷଣା, ତଥ୍ୟ ପ୍ରମାଣ ସହ ଇତିହାସ ଲେଖି ବ୍ୟବସ୍ଥିତ କରିବାକୁ ପଡିବ। ଲୋକକଥାରେ ଇତିହାସକୁ ଜାଣି ହୁଏ ହେଲେ ପ୍ରମାଣିତ କରିହୁଏ ନାହିଁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପରିବର୍ତ୍ତନ କରି ଇତିହାସ ଯୋଡିବାକୁ ଯୋଜନା କରିଛନ୍ତି। ପରାଧୀନ ମାନସିକତାରୁ ବାହାରିବାକୁ ପଡିବ। ଗଣତନ୍ତ୍ର, ଜନତନ୍ତ୍ରର ଜନନୀ ଅଟେ ଆମ ଦେଶ। ଏହାକୁ ଆଗକୁ ବଢାଇବାରେ ଆଇଆଇଏମ୍ ତା’ର ଭୂମିକା ନିର୍ବାହ କରିବ ବୋଲି ଆଶା କରୁଛି। ସମ୍ବଲପୁରୀ ବସ୍ତ୍ର, ପରମ୍ପରା, ପ୍ରାକୃତିକ ସମ୍ପଦ ଭଳି ଅନେକ ସୁଯୋଗ ସମ୍ବଲପୁରରେ ଆଇଆଇଏମ୍ ପାଇଁ ରହିଛି। ଓଡ଼ିଶାର ଚରିତ୍ରକୁ ତିଆରି କରୁ ଆଇଆଇଏମ୍। ଶିକ୍ଷାବିଭାଗ ପକ୍ଷରୁ ସହଯୋଗ କରାଯାଉଛି, ଆଗକୁ ମଧ୍ୟ କରାଯିବ ବୋଲି ସେ କହିଥିଲେ। ଆଇଆଇଏମ୍ ନିର୍ଦ୍ଦେଶକ ପ୍ରଫେସର ମହଦେଓ ଜୟସ୍ବାଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ କେନ୍ଦ୍ରମନ୍ତ୍ରୀ ପ୍ରଧାନ ମୁଖ୍ୟଅତିଥି ଓ ବିରୋଧୀଦଳ ନେତା ଜୟନାରାୟଣ ମିଶ୍ର, ସମ୍ବଲପୁର ଏମ୍ପି ନୀତେଶ ଗଙ୍ଗଦେବ, ରେଙ୍ଗାଲି ବିଧାୟକ ନାଉରୀ ନାଏକ, ପଦ୍ମଶ୍ରୀ ହଳଧର ନାଗ, ପଦ୍ମଶ୍ରୀ ଜିତେନ୍ଦ୍ର ହରିପାଲ, ଆଇସିଏସ୍ଆର୍ ଅଧ୍ୟକ୍ଷ ପ୍ରଫେସର ରଘୁବେନ୍ଦ୍ର ତନୱାର ସମ୍ମାନିତ ଅତିଥିଭାବେ ଉପସ୍ଥିତ ଥିଲେ। ପଦ୍ମଶ୍ରୀ ହଳଧର ନାଗ ବୀର ସୁରେନ୍ଦ୍ର ସାଏଙ୍କ ଜୀବନୀ ଓ ବଳିଦାନ ଉପରେ କବିତା ପାଠ କରିଥିଲେ। ଏହି ଅବସରରେ ସଂଗ୍ରାମୀଙ୍କ ଦାୟାଦଙ୍କୁ ସମ୍ମାନିତ କରାଯିବା ସହ ସେମାନଙ୍କ ଫଟୋଚିତ୍ର ପ୍ରଦର୍ଶନ କରାଯାଇଥିଲା। ଏଥିରେ ବିଭିନ୍ନ ବିଶ୍ୱବିଦ୍ୟାଳୟର କୁଳପତି, ଶିକ୍ଷାବିତ୍, ସାମାଜିକ କର୍ମୀ ଉପସ୍ଥିତ ଥିଲେ।
